اینسانلارین یارانیشیندان، دیلین یارانیلماسینا دک دئمک اولار اینسان بدویتده یاشاییرمیش، ارتباط(ایلگی) قورماماسینا گوًره محصور بیر دوشونجه ده قالیرمیش، تا خطین یارانماسی دئورینه گلیب چاتانا دک. بو یارانیش بشرییته بؤیوک بیر یول آچیر و اونو داها ایرلی گئتمک ایچین اومودلو و دوردورولماز ائدیر.

خطین یارانماسی کولتورل بیردئپرم اولاراق مدنیت یولونو داها آچیق و آواند ائتدی. انسان یاراتدیقلارینی یازیب ساخلایا بیلدی.

تاریخ لر یاراندی و یازیلدی، بیلگینلر بیلگیلرینی گئتدیکجه گئنیش بیر شکلیده بوتون دونیایا یایدیلار و دئمک اینسان اوغلو یالنیز یاشادیغی زامانیندا دئییل بلکه گلجکده یاشاماغادا کورپو یارادا بیلدی. آیری آیری سویلار و میللتلر بیربیرییله آپاردیقلاری تجارت ایشلری و ایلگییه کئچمه لری و بعضا بیر میللت اوز هئگمونیاسینی او بیری میللته یایقینلاشدیرماق ایچین کولتور آلیش وئریشی باش وئردی. بوردایدی کی کولتور بیتیکلرده یازییا دؤندو. بونلاردان بونو سونوج آلماق اولار کی دونیا ایرلی له مه یه باشلادی. بیر حدده گلدی چاتدی کی هر بیر کیتاب بیر میللتین کولتورو اوزره یاراندی و اونودولموشلار آنیمساندی. انسانلار بونو آنلادیلار کی اگر بیلیک لی و ضیالی اولماق ایسته ییرلرسه کئچمیشینی بیلیب و اویره نیب گله جه یه آددیم آتمالیدیرلار و بوردا کیتاب نه دئمکدیر اوزونو آرتیق بللندیریر.

کیتاب بیر میللتین کئچمیشینده یئر سالان دردلری کدری سئوینجی، کولتورل مجادله سی وداها دوغرو دئسک کیملییینی وورغولایان بیر کوکدیر.
انسان کیتابلاری اوخودوقجا کئچمیشینی گؤره رک گلجه یه آددیم آتماقلا تاریخینده باش وئرن ساواشلاری واونلاردا ائدیلن قهرمانلیقلاری آنلاییب میلتینه اولان خیانتلری تانییاراق بو اوجسوز بوجاقسیز دونیادا قالماق اوچون بونلاردان عبرت آلیب دایاناجاق.

کیمسه بیر میلتین کتابلارینی یاندیرماقلا اونون کولتورونو، کئچمیشینی و اینامینی یوخ ائتمک ایسته ییرسه بو کیتاب یاندیرماقلا ساده جه بیر کولتوره یوخ، بیر میللته یوخ، بلکه بوتون بشرییتین دوشونجه سینه و وارلیغینا خیانت ائدیر. و بونو بیر کولتورل سوی قیریم آدلاندیرماق اولار.

آنجاق کیتابی یانمیش بیر میللتین گنج لری، بیلگین لری وضیالی لاری و میللتین قایغیسینی چکن لر او کیتابلارین یاندیریلماسییلا داها آرتیق میللتینین وارلیغینی یاشاتماغا اؤزلرینی گؤره ولی بیلیب کئچمیشدن درس آلاراق بو گون تاریخ یارتماقلا بیر داها وار اولماق نه دئمکدیر، یئرینه یئتیرمه یی باجاریرلار. تام آنلامییلا بو سؤزو دوشونجه دوشمانلارینا چاتدیریرلار: ((سیز تاریخی دانین، کیتابلاری و اینسانلاری یاندیرین آنجاق بیزیم گنج لر تاریخ یارادیب و یازاجاقلار)) آرتیق بیز بونو آنلامیشیق کی حماسه یارادیب تاریخ یازمالیییق و بونلاری ثبت ائدیب گلجه یه بوراخمالیییق.

ایندی دوشونجه دوشمانلارینا بونو چاتدیریریق کی بوتون گوجونوزله بیزی ده اؤز کیتابلاریمیزلا یاندیرین نییه کی هر یاندیقدا یارانان آلوولاردان قوقنوسا بنزر بیر میللت دوغولور، اودلار یوردوندا دوغولوب یئر سالان و سونسوزا دک یاشایان آذربایجان تورک میللتی...