گونئی آذربایجانین تانینمیش سیاسی خادیمینین قیزی ایسوئچین ان مهم رگیونال اداره‌ائتمه قوروملاریندان بیرینه رهبرلیک ائد‌جک.

Axar.az خبر وئریر کی، ایسوئچده یاشایان آذربایجانلی خانیم آیدا کریمی آوروپا سیاستینده مهم اوغورا امضا آتیب. او، ایسوئچین ان بؤیوک بؤلگه‌لریندن بیری اولان وسترا یوتالاندین رگیونال انکشاف کمیسیاسینین صدری سئچیلیب.

آیدا کریمی ایسوئچین نفوذلو سیاسی قوه‌لریندن اولان مرکز پارتییاسینین (سنترپارتیت) تمثیلچیسی‌دیر. او، رگیونال سئچکیلرده پارتیاسینین وسترا یوتالاند بؤلگه‌سی اوزره بیرینجی نامزدی کیمی سئچیلیب، داها سونرا بؤلگه‌نین ۱۵ آپاریجی سیاسی رهبریندن بیری اولاراق رگیونراد استاتوسو قازانیب.

ایندی ایسه آذربایجانلی سیاستچییه بؤلگه‌نین اقتصادی و سوسیال گلجیینین معیینلشدیریلمه‌سینده مهم رول اوینایان رگیونال انکشاف کمیسیاسینا رهبرلیک ائتمک حواله اولونوب.

بو قوروم رگیونون اقتصادی انکشافی، یئنی ایش یئرلرینین یارادیلماسی، صاحبکارلیغین دستکله‌نمه‌سی، اقتصادی آرتیم و اوزون‌مدتلی انکشاف استراتگییاسی ایله باغلی قرارلارین حاضرلانماسیندا مهم صلاحیتلره مالکدیر.

ایسوئچده رگیونال اداره‌ائتمه سیستمی گئنیش صلاحیتلره اساسلانیر. بونا گؤره ده آیدا کریمینین یئنی وظیفه‌سی یالنیز سیاسی نفوذ دئییل، هم ده جدی اداره‌چیلیک مسئولیتی دئمکدیر.

آیدا کریمینین کیملیی ایسه بو اوغورو آذربایجانلیلار اوچون داها دا علامتدار ائدیر.

او، گونئی آذربایجان ملی حرکاتینین تانینمیش نماینده‌لریندن، گونئی آذربایجان دموکرات پارتییاسینین سؤزچوسو محمود بیلگینین قیزیدیر.

بئله‌لیکله، گونئی آذربایجان اصیللی بیر خانیم آوروپانین انکشاف ائتمیش اؤلکه‌لریندن بیرینده یوکسک سیاسی وظیفه‌یه یوکسه‌له‌رک ایسوئچین رگیونال اداره‌ائتمه سیستمینده سؤز صاحبی اولوب.

آیدا کریمینین اوغورو هم ایسوئچده یاشایان آذربایجانلی اجماع‌سی، هم ده دنیانین مختلف اؤلکه‌لرینده فعالیت گوسترن سویداشلاریمیز اوچون غروروئریجی حادثه‌دیر.