روسیا پرزیدنتی ولادیمیر پوتین باکی-گروزنی طیاره‌سینین قضاسینا نیین سبب اولدوغونو ایلک دقیقه‌لرده بیلممیش دئییلدی. روسیا مدافعه ناظیرلیی سرنیشین طیاره‌سینین «سهوا» وورولماسییلا باغلی حساباتی قضانین ایلک ساعتلاریندا کرمل صاحبینه چاتدیریب. بؤیوک احتماللا پوتین همین ساعتلاردا مستقل دولتلر بیرلیی دولت باشچیلارینین سانکت-پتربورگدا غیر-رسمی ساممیتینی آچارکه‌ن، باکی-گروزنی طیاره‌سینین روسیالی حرب‌چیلر طرفیندن وورولدوغونو بیلیردی.

Axar.az خبر وئریر کی، بو سؤزلری پولیتولوق ائلخان شاهین‌اوغلو قید ائدیب.

«اساس سوال باشقادیر: سرنشین طیاره‌میز «سهوا» وورولدوقدان سونرا اونون گروزنی یاخینلیقداکی هوا لیمانلاریندان بیرینه ائنمه‌یه اجازه وئریلمه‌مه‌سینی کیم امر ائدیب؟ کیم وورولان طیاره‌نین ایزینین ایتیریلمه‌سینی و خزرده باتماسینی ایسته‌ییب؟ بو امر گروزنیداکی یوکسک رتبه‌لی حرب‌چیلر طرفیندن وئریله بیلمزدی. ایزی ایتیرمک مقصدیله طیاره‌نین سرنشینلرینین اؤلومه محکوم ائدیلمه‌سی بین‌الخالق جنایتدیر. بو باغیشلاناسی حادثه دئییل»، - او بیلدیریب.

قید ائدک کی، ۲۵ دکابردا باکی-گروزنی اوچوشو حیاتا کئچیرن آزال-آ مخصوص طیاره آکتاودا قضایا اوغراییب. گؤیرته‌ده اولان ۶۷ سرنشیندن ۳۸-ی اؤلوب، ۲۹ نفر ساغ قالیب.

ایلکین معلوماتا گؤره، طیاره‌میز گروزنی اوزرینده روسیانین «پانتسیر اس۱» راکتینین هدفی اولوب، عینی زمان‌دا رادیوالکترون مبارزه سیستمی طیاره‌نین الکترون سیستمینی سیرادان چیخاریب. گروزنی، ماهاچقالا و مینوود هوالیمانلاری ائنیشه اجازه وئرمدیکلریندن، طیاره آکتاو هوا لیمانینا اوز توتوب.