بو گون بوتون دنیادا و آذربایجانین هر ایکی تایین‌دا یاشایان آذربایجان تورکلرینین آدینی غرورلا چکه بیلجیی و بوتون دنیایا غرورلا نشان وئره بیلجیی داهی شخصیت جواد هیئتین آنیم گونودور.

Kult.az خبر وئریر کی، جاواد هئیت ۱۹۲۵-جی ایل مایین ۲۴-ده تبریزده آنادان اولوب.

امک فعالیتینه ۱۹۴۶-جی ایلده استانبول اونیورسیتئتین‌ده باشلایان جواد هیئت ۱۹۴۹-جو ایلدک بورادا جرراه‌لیق کلینیکاسیندا چالیشیب، داها سونرا اختصاصینی تکمیللشدیرمک اوچون پاریس اونیورسیتتینین جراحلیق کافدراسیندا ایشله‌ییب.

او، ۱۹۵۲-جی ایلده یوکسک درجه‌لی جرراه اختصاصینا ییه‌لنه‌رک ایرانا قاییدیب، ۱۹۵۳-جو ایلده‌ن تهران‌دا هدایت و عدلیه خسته‌خانالاریندا جراحلیق کلینیکالاری قوراراق اونلارا رهبرلیک ائدیب.

دکتر جواد هیئت ایران‌دا اکسپریمنتال جراحیه‌نین تملینی قویوب. ۱۹۵۴-جو ایلده‌ن اعتباراً اورک اوزرینده آپاردیغی عملیاتلار اونو استعدادلی جراح کیمی تانیدیب. دکتر جواد هیت ۱۹۵۴-جو ایلده قاپالی اورک عملیاتی، ۱۹۶۲-جی ایلده ایسه ایران‌دا ایلک دفعه آچیق اورک جراحییه‌سینی موفقیتله حیاتا کئچیریب. بوندان سونرا او، ایران‌دا ایلک دفعه اورک قاپاقلارینی دییشدیرمه، حیوانلاردا اورک دییشدیرمه، تهران‌دا ایلک دفعه انسان‌دا بؤیرک دییشدیرمه عملیاتینی اوغورلا حیاتا کئچیردیینه گؤره "بیرینجی درجه‌لی امک اوردنی" ایله تلطیف اولونوب. طب ساحه‌سینده قازاندیغی ناعیلیتلر جواد هیئته گئنیش شهرت گتیریب.

جواد هیئت دوستو پروفسور دؤکتور حمید نطقی ایله بیرلیکده ایران‌دا علمی تورکولوگییانین اساسینی قویوب.

جواد هیئتین زنگین و چوخشاخلی ثمره‌لی فعالیتین‌ده آذربایجان ادبیاتی تاریخی، تورک خالقلارینین کئچمیشی، ملی فولکلور و ائلجه ده اسلام شناسلیغا دایر تدقیقاتلار مهم یئر توتور.

ایکی‌سی فارس و بئشی ده تورک دیلینده اولان یئددی جلدلیک تورکولوگیا کیتابین مؤلفی‌دیر.

تورکولوگییا ساحه‌سین‌ده ۳۰۰، طب ساحه‌سین‌ده ایسه ۱۰۰ مقاله‌سی واردیر.

ایران‌دا سونونجو انقلاب‌دان سونرا آذربایجان دیلینین علمی تاریخی ایله دوکتور جاواد هئیت و دوکتور همید نیطقی مشغول اولوبلار. ج. هئیت فارس دیلین‌ده چاپ ائتدیردیی "تورک دیلینین تاریخی و لهجه‌لری" اثرینی پهلوی رژیمی زمانی ایران دیلچی‌لیک علمینین و حاکم ایدئولوگییانین آذربایجان دیلینین اؤزونه‌مخصوص مستقیل و زنگین بیر دیل اولماسینی اینکار ائتمه‌سینه جواب اولاراق یازیب.

بون‌دان علاوه، جاواد هئیت فیلولوگییا و تورکولوگیا ساحه‌سین‌ده "آذربایجان ادبیات تاریخینه بیر باخیش"، "آذربایجان شفاهی خالق ادبیاتی"، "تورک دیلی و لهجه‌لرینین تاریخی"، "ایکی دیلین مقایسه‌سی" کتابلارینین مؤلفی‌دیر.

جواد هیئت باکی دولت اونیورسیتتینین، آذربایجان طب اونیورسیتتینین، خزر اونیورسیتتینین فخری دکترو، آذربایجان ملی علملر آکادمییاسینین، طوسی آدینا آذربایجان دولت پداقوژی اونیورسیتتینین فخری پروفسورو، آذربایجان جراحلاری علمی جمعیتینین فخری عضوودور.

آذربایجان یازی‌چیلار بیرلیینین آخوندوو آدینا مکافاتینا و "دده قورقود" آسوسیاسییاسینین تاسیس ائتدیی "مممد آراز" مکافاتینا لایق گؤرولوب.

او، باکینی چوخ سئومه‌سینه باخمایاراق، تبریزده باسدیریلماسینی، ممکن اولمادیقدا ایسه باکی‌دا دفن اولونماسینی وصیعت ائتمیشدی.

آنجاق ایران حکومتی اونون تبریزده شهریارین دفن اولوندوغو مقبره الشعرا عابده کوملکسینده تورپاغا تاپیشیریلماسینا اجازه وئرمه‌دیی اوچون، آوگوستون ۱۵-ده آذربایجان میللی علملر آکادمییاسین‌دا اونونلا ویدا مراسمی کئچیریلیب.

مراسیم‌دن سونرا او، باکی‌دا ایکینجی فخری خیاباندا تورپاغا تاپیشیریلیب.