مسکوادا تانینمیش آذربایجانلی یازیچی، تاریخچی و شرق شناس عالیم عبدول حسینوو وفات ائدیب.

آپا-نین وئردیی معلوماتا گؤره، تانینمیش یازیچی عمرونون ۹۲-جی ایلین‌ده دونیاسینی دییشیب.

قید ائدک کی، عبدول عنبی اوغلو حسینوو ۱۹۲۵-جی ایل، اوکتیابرین ۲۷-ده باکی‌دا آنادان اولوب. ابدول حسینوو یئددی مونوقرافییانین، ۲۰-دن چوخ تاریخی پووست و رومانین، ۷ بدیعی فیلم سسناری‌سینین، سوسیال-اقتصادی پروبلملره و مدنیته دایر ۵۰۰-دک مقاله‌نین، کینوفیلملره یازیلمیش چوخسایلی رسنزییالارین مؤلفی‌دیر. «صلاحددین»، «مصطفی خانین خزینه‌سی»، «اکین‌چی تاختدا»، خاقانینین حیاتینا حصر اولونموش «شیروانلی زوار»، «آبشروندان اونتاریویادک»، «آرزاماسلی قیز»، «بیز اصلن باکیدانیق» و اوخوجولارین ماراقلا قارشیلادیقلاری بیر سیرا دیگر تاریخی رومانلار و پووستلر اونون قلمینه مخصوصدور. اونون اثرلری اینگیلیس، آلمان، فرانسیز، ایسپان و عرب دیللرینه ترجومه ائدیلرک، آذربایجاندا، ایراندا، تورکییه‌ده، کانادادا، بولغاریستاندا، منقولوستاندا و روسییادا چاپ اولونموش‌دور. او، «ییلماز گونل»، «مؤوسون ارتوغرول»، «تورک کینوسو» و سایر مونوقرافییالارین مؤلفی‌دیر.

حسینووون تکجه یارادیجی‌لیغی دئییل، حیاتی دا آذربایجانلا باغلی‌دیر. مسکوادا و باکی‌دا چاپ‌دان چیخمیش «20-جی عصرین ۱۰۰ نفر تانینمیش آذربایجانلیسی» کیتابی بونا عیانی ثبوتدور. آذربایجان یازیچیلار اتفاقینین عضوو اولان حسئینوو هم ده عموم روسییا آذربایجان کنگرسی و آذ-روس فدرال میللی مدنی مختاریتینین مرکزی شورالارینین عضوو ده اولوب.