بابکی حبس ائد‌ن ابوساج داها سونرا آذربایجان‌دا یارانان ساجیلر خاندانلیغینین (۸۷۹-۹۴۱) ایلک نماینده‌سی اولوب.

کولت. آز خبر وئریر کی، بو باره‌ده تانینمیش تاریخچی اکبر نجف قید ائدیب. او بیلدیریب کی، اورتا عصر تاریخ‌چیسی طبری «تاریخ الرسول» اثرینده خیلافت ایمپرییاسینا قارشی ۲۰ ایل موباریزه آپاران قدرتلی آذربایجان سرکرده‌سی بابکین حبسی ایله باغلی مفصل معلومات وئریب:

«آفشینین امرین‌ده‌کی اوردولار ایکی ایللیک محاربه‌دن سونرا بز شهرینی اله کئچیردیکده چیخیش یولو قالمایان بابک بیر مدتدیر مکتوبلاشدیغی بیزانس ایمپراتورونون حمایه‌سینه سیغینماق مقصدیله بزده دهشتلی کوچه دؤیوشلرینین داوام ائتدیی بیر واخت‌دا قاریشیقلیقدان ایستیفاده ائدیب، قاچماغا نایل اولدو.

دؤیوشلری سونا چاتدیریب، بابکین قاچدیغینی اؤیره‌نه‌ن آفشین ابوساجین امرینده‌کی ۴۰۰-۵۰۰ نفرلیک دسته‌نی اونون آردینجا گؤندردی. ابوساج ارمنییه اراضی‌سینده بابکه چاتیب، گیردیی دؤیوشده اونو توتا بیلمدی. لاکین قارداشینی، آناسینی، آروادینی و امیرلریندن معاوییه‌نی اسیر آلیب آفشینه گؤندردی.

بوندان سونرا بابکین تعقیبینه داوام ائد‌ن ابوساج، نهایت، ۸۳۷-جی ایل سنتیابرین ۱۵-ده بابکی حبس ائتدی و قیمتلی اسیری ایله برابر برزندده اوردوگاهیندا اوتوران آفشینین یانینا گلدی».