اهالی‌سینین سایینا گؤره آوروپانین بیرینجی، دونیانین ۶-جی شهری ساییلان ایکی قیطعه‌ده یئرلشه‌ن دونیانین یئگانه شهری ایستانبول‌دا ایلک اینسان مسکه‌نلری میلاددان اول ۵۵۰۰--۳۵۰۰-جو ایللرده سالینیب.

شهرین ایلک آدی بیزانتیون اولوب. بو آدین یونان کولونیستلرینین کرالی بیزانسین آدیندان گؤتورولدویو احتیمال ائدیلیر. ایستانبول آدینا ایسه ایلک دفعه ۱۰-جو عصرده عرب منبع‌لرین‌ده راست گلینیر. ایستانبول دونیا تاریخینین ۴ ان بؤیوک ایمپراتورلارینین پایتختی اولوب. ۳۳۰-جو ایلده کونستانتین ایستانبولو روما ایمپئرییاسینین شرق پایتختی اعلان ائدیر. او، شهرین آدینی "نووا روما" قویماق ایسته‌سه ده، بو آد ایستیفاده ائدیلمیر. ۴۷۶-جی ایلده غربی روما ایمپئرییاسی داغیلدیقدان سونرا اکثر رومالیلار بو شهره کؤچور و شهر بیزانس ایمپئرییاسینین پایتختی اولور. ۵۴۳-جو ایلده شهرده یاییلان اؤلومجول ائپیدمییا زامانی شهر اهالی‌سینین یاریدان چوخو تلف اولور.. ۷۰۰-جو ایللرده ایستانبول ساسانیلرین و آوارلارین، ۸۰۰-جو ایللرده بولغار و عربلرین، ۹۰۰-جو ایللرده ایسه روسلارین هوجوم و تالانینا معروض قالیر. بو هوجوملاردان ان دهشتلیسی ۱۲۰۴-جو ایلده خاچلی یوروشو زامانی اولوب. یوخسوللوق‌دان اینسانلار شهردن قاچیرلار. ۱۴۵۳-جو ایلده عثمانلی حکمداری ۲-جی محمت بیزانس ایمپئرییاسینین پایتختی اولان کونستانتییپولو فتح ائدیر. بون‌دان سونرا شهر "ایستانبول" آدلانیر. عثمانلی ایمپئرییاسینین دؤردونجو و سونونجو پایتختی اولور. شهر بوتون دونیادا "کونستانتینوپول" "کونستانتییه" کیمی تانینیر. تاریخ بویو شهرده فرق‌لی سیویلیزاسییالار، دین، دیل و ایرق‌دن اولان اینسانلار یاشاییب. بونا گؤره ده دونیانین ان کوسموپولیت شهرلرین‌دن بیری حساب ائدیلیر. ۱۵۰۹-جو ایلده شهرده باش وئره‌ن ۸ بال‌لیق زلزله‌دن سونرا ایستانبول قیسا مدت "کیچیک قیامت" آدینی آلمیشدی. بیر ایل سونرا سلطان ۲-جی بیازید شهری یئنی‌دن برپا ائدیر.. سلطان سلیمانین دؤورون‌ده ایسه شهرده یئنی معمارلیق عابده‌لری اوجالدیلیر. ۱۸۹۴-جو ایل زلزلزه‌سی شهری یئنی‌دن داغیدیر. ۱۹۱۸-جی ایلده ایستانبول آنتانتا دؤولتلری طرفین‌دن ایشغال ائدیلیر.. ۱۹۲۳-جو ایلده تورکییه جمهوریتینین قورولماسی ایله پایتخت آنکارایا کؤچورولور. ۱۹۳۰-جو ایل ۲۸ مارت‌دا قبول ائدیله‌ن قرارا اساساً بوتون رسمی سندلرده شهرین آدی "ایستانبول" یازیلیردی. ۱۹۰۰-جو ایلده شهرده ۱ میلیون اینسان یاشاییردی‌سا، ۱۹۲۷-جی ایلده بو شهرده جمعی ۶۹۰ مین آدام یاشاییردی. بو گون ایستانبول‌دا اهالینین سایی ۱۵ میلیون‌دان چوخ‌دور. ۷۰-جی ایللرده بوغاز کؤرپوسونون سالینمای ایله نقلیات پروبلئمی حل اولدو. حاضردا دولماباخچا، توپقاپی سارایی، قالاتا قولله‌سی ، آیاصوفیا موزئیی و محتشن بوغاز گؤرونتولو ایستانبولا هر ایل ۱۰ میلیوندان آرتیق توریست گلیر.