محمد انصاری آوروپادا مؤوجود شرایط سایه‌سین‌ده سیاحت ائتمیین اولدوقجا آسانلاشدیغینی دئییر. گولدسمیتش-لوندون اونیورسیتتین‌ده بستکارلیق اوزره دوکتورلوق درجه‌سی اوزرین‌ده چالیشان تبریزلی صنعت‌چی آمریکانین سسی ایله صحبت‌ده آوروپادا سیاحت ایمکانلاری، غرب و شرق توپلوملاریندا سیاحت مدنیتی، ائلجه ده تاریخ‌ده غرب سیاحلارینین علمی فعالیتلرینی دیرلندیرمیش، و اؤز سیاحت تجروبه‌لرینی پایلاشمیشدیر.

«سیاحلیغی گؤزو آچیق و ماتئریال توپلاماق شکلین‌ده نظرده توتان‌دا، گؤروروک کی، آوروپادا سیاحلار فرق‌لی میللتلرین کولتورلرینه، موسیقیلرینه باخاراق نوتلار آلیردیلار و قاییدان‌دا بونو عکس ائدیب و انسیکلوپدییالار یارادیردیلار،» دئیه محمد انصاری آوروپادا شرق شناس‌لیق و سیاحلیق آراسین‌داکی علاقه‌یه دقت چکیر.

کئچن آیلاردا بیر نئچه آوروپا اؤلکه‌سی او جمله‌دن، فرانسا، ایسپانییا، اوکراینا، سلوواکییا، آوسترییا، چخییا و مجاریستانا سفر ائد‌ن موسیقی‌چی سیاحت زامانی سورپریزلرله اوزلشدیینی، ائلجه ده گزدیی یئرلرین مدنیتی و صنعتی ایله تانیش اولماغا، یئرلی اهالی ایله علاقه قورماغا چالیشدیغینی سؤیلییر.

«گئدجییم نقطه‌نی چوخ معینلش‌دیرمیردیم، باشلاییب یاواش-یاواش گئدیردیم... بعضا، سورپریزلر اولوردو، بعضا حتی آزاجیق تهلوکه‌لی اولوردو... مقصدیم دینجلمک دئییلدی، داها چوخ گؤرمک، یئریمک، موختلیف اینسانلارلا تانیش اولماق، موختلیف یئرلره گئتمک ایدی...»

آوروپادا سیاهت مدنیتی و تاریخینه دقت چکن محمد انصاری شرقشوناس سیاهلارین علمی فعالیتلری حاقین‌دا دانیشیر:

«غرب‌ده شرقشوناس‌لیق، یا شرقشوناس‌لیق فاکولته‌سی وار، اما شرق‌ده قربشوناس‌لیق فاکولته کیمی یوخ‌دور یا چوخ آزدیر یا یئنی باشلاییر،» دئیه او، آوروپالی سییاهلارین ائنسیکلوپئ‌دییالارین حاضرلانماسی، ائل‌جه ده شرقشوناس‌لیق و ائتنیک-موسیقیشوناس‌لیق کیمی علمی فعالیتلرده روللارینا ایشاره ائدیر.

محمد انصاری آوروپادا سیاحت ائتمیی آسانلاشدیران ایمکانلار و اوبیئکتلره دقت چکه‌رک همین کونتکستده ایران آذربایجانی و عمومیتله ایران‌داکی دورومو تصویر ائدیر.

«ایران ساکینلری قاپالی موحیط‌ده یاشاییرلار. بونون ندنلری ده آیدین‌دیر. ایران اوزرین‌ده سانکسییالار اولور، مادی چتینلیکلر وار. من دوستلاریم و یا عائله‌م‌دن گؤروره‌م کی بیر نئچه ایل اول قونشو اؤلکه‌لر، مثال اوچون تورکییه و آذربایجانا ایلده بیر دفعه گئدیردیلر. اما، ایندی قونشو اؤلکه‌لره گئتمک‌ده بئله چتین‌لیک چکیرلر،» بستکار قید ائدیر.