آنا صحیفه کولت |
کولت. آذ آذربایجانین گؤرکهملی یازیچیسی فرمان کریمزادنین " تبریز ناموسو" آدلی تاریخی رومانینی تقدیم ائدیر:
کؤچورن آینوره مممدووا
"یوخودا .... بئله شئی اولار؟.. کئچیب گئدر". اونو دهشت گوتورموشدو کی، یوخوسونا نه اوچون اری یوخ، باشقا کیشی گیرمیشدی؟ او، اوزونو بویوک گناه صاحبی بیلیردی. قاییدیب ااوزاندی. چول ده پاییز اولدوغونا گوره آلاچیق دا هاوا سویوموشدو. یورغانی اوستونه چکدی. اما اوزون زامان یاتا بیلمه دی. باجادان گئجه لر، اخی، دائم اولدوزلار گورونردی. هاوا آچیق اولاندا. هله شامان بابا دئییردی کی، بو باجا اولدوزلارین گورونمه یی اوچون دئییل، هامی بو اولدوزلارا باخا بیلر. اما باخماق آزدیر. اوللر اولدوزلارین حکمتینی اویرنن آداملار دا اولوب. بس ایل هاردان گلدی، آی، هفته هاردان گلدی؟ بس قیش، یاز، یای، پاییز نئجه اولور؟ اونلاری درک ائدنلر، گلیشینی حسابلایانلار وار. او اولدوزلاردا بویوک علم، بویوک حکمت گیزلنیر. نییه آی اول دیلیم کیمی گورونور، سونرا یاریسی، سونرا بوتوولشیر؟ بونلار هامیسی گونشین، اودوزلارین سریدیر. اولدوزلار دا تک- تک، بیر- بیر دئییل، اونلارین ییغیملاری وار. هره سینین ده اوز آدی. عقرب بورجو، اژدها بورجو، بالیق بورجو، آیی بورجو... یئر اوزونده ده درک اولونمالی حکمتلر چوخدور. ایللریمیزین آدلارینا باخ! اون ایکی حیوان آدی. یعنی اژدها ایلی، ایت ایلی... نه بیله سن، داها، نه، نه ایلی. او واختدان قوا اولدوزلارا ائله بئله جه، کول دا ایشیلدایان بوجکلر کیمی یوخ، جانلی، معجزه لی، سرلی مخلوق کیمی باخماغا باشلامیشدی. بو دردلی گونلرده اونار دا، هئچ اولماسا ، گورونمورلر کی، بیرلیکده پیچیلداشسین، دردینی، هئچ کیمه دئه بیلمسه ده، تک- تک اولدوزلارا آچسین.
بیردن معجزه باش وئردی. اولدوز عوضینه باجادا شعاع گوروندو، بوتون دایره ایشیقلاندی و همین شعاع آشاغی یا، دوز اونون اوستونه شیغیدی، گوزلرینی قاماشدیردی. قوا واهمه ایچینده گوزلرینی یومدو. بیردن- بیره جانیندا، وارلیغیندا خوش بیر راحاتلیق، قشنگ بیر لذت دویدو.
گوزلرینی آچدیمی، یومدومو، هئچ اوزو ده بیلمه دی. قیرمیزی ساققاللی، ماوی گوزلو کیشی گوروندو. همین شعاع یوخ ایدی. او دونوب انسانا بنزر بیر وارلیق اولموشدو، تانری...
قوا هوشونو ایتیردی. اما هوشسوزلوقدا دونیا ذوقلری ایچینده اوزوردو و هئچ جور قیشقیریب بیر سوز دیه بیلمیردی.
بو حادسه هر گئجه تکرار اولونوردو. سحره یاخین اونو خجالت تری باسیر، اولوم قورخوسو بورویوردو. او شعاع یا ائله اویرنمیشدی کی، واخت چاتاندا گوزلری باجادا قالیر، ائله بیل اصیل سئوگیلیسینی گوزله ییردی. سون گونلر حتی اونون گئجیکه بیله جهییندن بئله قورخوردو. بیردن گلمه سه، بیردن اونو اونوتسا، نئجه اولاجاق؟ تانری سئویملی ارینی الیندن آلدیسا، دئمک اونو سئویرمیش، اونون عوضینده بو شعانی، بو خیال اویونونو وئردیمی اونا؟ "قادینلیقحسیتیمی اولدورمه دی، تاپدالامادی، لاکن یادلارا قسمت اولماغا قویمادی، منییییی خجالتلی ائتمه دی." شعاع اونون ارینین ساغلیغیندا، اونون بویرونده اولدوغوندان دا شوقلو، اوندان دا احتراصلی ائتمیشدی. اما فرقی واردی کی، شعانی نه قوجاقلایا، نه باغرینا باسا، نه ده اوپه بیلیردی. اونون گول دوداقلاری قورویوب چات- چات اولوردو آلان-قوا ارینین واختیندا اولدوغو کیمی یاتاغاا یرمه میشدن اول عطیرلنیر، آرینیب- دارانیر، اوزونو بو گوروشه حاضیرلاییردی.
هردن چوخ هیجانلی فیکیرلره دوشوردو.
داوامی وار
تاریخ
2020.01.30 / 18:12
|
مولف
فرمان کریمزاده
|