فلسفی اثرلرین یازی‌چی‌سی، آراش‌دیرماچی و ترجمه‌چی مهدی سلیمینی اهرده ساخلانیلاراق تهرانین ائوین حبسخاناسینا آپاریلیب.

آخار. آذ خبر وئریر کی، بو باره‌ده مهدی سلیمینین قارداشی جلال سلی‌می اینستاقرام صحیفه‌سین‌ده معلومات وئریب.

«قارداشیم مهدی سلیمی ایول آیینین ۷-ده ساعت ۰۹:۳۰ حدودون‌دا اهرده‌کی آتا ائوین‌ده ساخلانیلاراق، دیندیریلدیک‌دن سونرا تهرانین ائوین حبسخاناسینا کوچورولوب. اونا قارشی ایر‌لی سوروله‌ن اتهاملار هله‌لیک معلوم دئییل»،- او بیلدیریب.

آذربایجان‌لی فعال یاخالاندیغی واخت اونا عایید بیر سیرا شخصی اشیالار، او جمله‌دن، موبایل تلفنو، نوتبوکو و یازیلاری مصادیره ائدیلیب.

قئید ائدک کی، ۱۹۸۴-جو ایلده تبریزده آنادان اولان مهدی سلیمی یزد اونیورسیتتین‌ده تحصیلینی بیتیریب. فعال تهران‌دا یاشاییر. اوللر «زوغال» و «آرت کالت» اونلاین ژورنالینین باش رئداکتورو، «میندموتور» سایتینین مدیری اولان آذربایجان‌لی یازی‌چی بیر چوخ کیتاب و مقاله‌لر ترجمه ائدیب. او، همچینین، بیر سیرا رومان، فلسفه کیتابلاری ایله باغلی مقاله‌لر و شرحلر یازیب.