اوزان آراز ائلسه‌سین Kult.az-آ مصاحبه‌سی:

- آراز بی، سون حادثه‌لر ایزلییرسینیزمی؟ خصوصیله ایرانین ارمنیستانلا علاقه‌لری گوجلندیرمه‌سی و زنگزور دهلیزینه قارشی چیخماسی فونوندا ایران-آذربایجان مناسبتلرین‌ده یارانان گرگینلیگی نئجه قیمتلندیرردینیز؟

- دیرناق‌آراسی «ایران ایسلام رسپوبلیکاسی» آرتیق اؤزونون سون دؤورلرینی یاشاییر. اؤزلری ده یاخشی بیلیرلر کی، ساعت آرتیق اونلار اوچون گئرییه دوغرو ایشلمه‌یه باشلاییب. اصلینده حاضردا اونلارین اؤزلری بؤیوک تهدیدلرله قارشی-قارشییادیرلار. تهران اؤز خالقینی داخیل‌ده اولان درین پروبلم و ناراضی‌لیقلاردان یایین‌دیرماق اوچون آذربایجانی تهدید ائتمکله مشغول‌دور. هامیمیز ایران‌دا وضعیتین قاریشیق اولدوغونو چوخ یاخشی بیلیریک و بئله دوروم‌دا تهران هئچ واخت هانسی‌سا خاریجی اؤلکه ایله محاربه‌یه گیره بیلمز. آذربایجان تک دئییل، تورکییه یانیمیزدادیر. بونلار یالنیز هده‌دیر، تهدیددیر. البته، ایران حاکمیتینین بئله ایرنج‌لیکلری، اونلارا چالیشان جاسوسلارین تخریباتچی فعالیتلری داوام ائد‌جک. لاکین تهران‌دا اوتورانلار بونو چوخ یاخشی و دقیق بیلیرلر کی، آذربایجانا قارشی رئال تهدید و تهلوکه یارانسا، ایران ایچین‌دن یاناجاق. چونکی اورادا ایندی ۳۰ میلیون‌دان چوخ آذربایجان تورکو یاشاییر، اونلار دا هئچ واخت بونا سس‌سیز قالمایاجاق. ایندی اوتوز ایل اؤنجکی دؤور دئییل. ایندی جنوبی آذربایجان‌دا میللی دوشونجه چوخ یوکسک و یتکین بیر سوییه‌ده‌دیر. ساده‌جه گؤز قورخوتماق و گوج‌لو گؤرونمک اوچون هانسی‌سا حمله‌لر ائتمه‌یه چالیشیرلار. ایران بو گون آذربایجانا رئال تهلوکه یاراداجاق گوجده دئییل.

- حاضردا اؤلکه‌میزده سیزین یولونوزو گؤزله‌یه‌ن مینلرله اینسان وار. نه واخت باکییا گلمیی و کنسرت ورمیی پلانلاشدیریرسینیز؟

- آذربایجانا، باکییا گلمیی چوخ ایستییرم. من ده سویداشلاریمیزلا، قارداش-باجیلاریملا گؤروشوب دردلشمک، صحبت ائتمک، دده قورقود دئمیشکن، بوی بویلاماق، سوی سویلاماق ایستییرم. مندن اولسا، ایندی قانادلانیب اوچا-اوچا باکییا گلره‌م. آنجاق اولجه‌دن کنسرت اوچون حاضرلیقلار گؤرولمه‌لی و اویغون شرایط اولمالیدیر.

- سویداشلاریمیزا نه دئمک ایستردینیز؟

- بونا امینم و سویداشلاریمیزا دا دئمک ایستییرم کی، بیر گون مطلق بوتؤو آذربایجان‌دا گؤروشجییک. اؤزونوزه یاخشی باخین، اسن قالین.