اعتراضلارین تغیان ائلدیی، آرتیق قادینلارین دا اؤز حاقلارینی طلب ائلمک اوچون کوچه‌لره آخیشدیغی بیر واختدا اسکولو مرضییه‌نی یادا سالماق یئرینه دوشر...

۱۹۴۱-جو ایلده شرقی آذربایجان ایالتینین اسکو شهرین‌ده آنادان اولان مرضییه شاعر، معلم، انقلاب‌چی، شاه رژیمینه قارشی مقاومت حرکاتینین تانینمیش قادین عضولریندن بیری، همچینین ایران خالق پارتیزانلاری-فداییلری تشکیلاتینین عضوو اولوب.

Axar.az خبر وئریر کی، اورتا مکتبی بیتیردیکدن سونرا تبریز پداگوژی تکنیکومونا (دانشکده تربیت معلم) داخیل اولان مرضییه تحصیلینی باشا ووردوقدان سونرا اسکو محالین‌دا ابتدای مکتبلرده معلم کیمی فعالیته باشلاییر.

بورادا ۳ ایل فعالیت گؤستردیکدن سونرا تبریز اونیورسیتتینه داخیل اولور و تحصیلینی داوام ائتدیرمکله یاناشی او هم ده معلم ایشلییر.

کند مکتبلرینی گزه‌رک اونلار اوچون "کتاب ائولری" یاراتماغا چالیشان گنج معلمه ایلک شعرینی "دالغا" لقبی ایله چاپ ائدیب.

او، بوتون فارسجا یازدیغی اثرلری تورکجه‌یه، اؤز آنا دیلینده قلمه آلدیغی بوتون اثرلری ایسه فارس دیلینه ترجمه ائدیب.

۱۹۷۰-جی ایلده طلبه‌لرین اعتراضلاریندا (تظاهرات) رهبرلیک ائد‌ن مرضییه خصوصی خیدمت اورگانلارینین دقتینی جلب ائدیر. حبس ائدیله‌رک اسکویه سورگون (تبعید) اولونور. داها سونرا بو گونلر حاقین‌دا خاطره‌لرینی یازیب.

او، ۲۶ آپرل ۱۹۷۴-جو ایلده دسته‌نین ایکی عضوونون گؤروشوندن خبر توتان ساواک مأمورلاری حاقین‌دا معلومات آلیر.

یولداشلارینا وضعیتی بیلدیرمک اوچون گؤروش یئرینه گئدن مرضییه اونلاری خبردار ائتسه بئله گئج اولور. آتیشما باشلاییر و او، ساواک ایله سلاح‌لی توققوشمادا گوله‌لنه‌رک اؤلدورولور.

۳۳ یاشین‌دا اؤلدوروله‌ن انقلاب‌چی شاعره یاخین دوستلاری بهروز دهقانی و علیرزا نابدل ایله تهران‌داکی بهشت زهرا قبیریستانلیغینین ۳۳ سایلی گوشه‌سینده دفن ائدیلیب.

آذربایجانین خالق شاعری بختیار واهابزاده مرضییه اوسکویینین خاطره‌سینه «مرضیه» آدلی پوئما شعر حصر ائدیب.

"دالغا
خیرداجا، اینجه آرخ ایدیم
مئشه‌لردن، داغلاردان
دره‌لردن آخیردیم
بیلیردیم دورغون سولار
اؤز ایچین‌ده بوغولار
بیلیردیم دریالاردا
دالغالار قوجاغین‌دا
خیرداجا آرخلار اوچون
یئنی حیات دوغولار.
نه یولون اوزاق‌لیغی
نه قاران‌لیق چوخورلار
نه دورغونلوق هوه‌سی
منی یولدان قویمادی.
ایندی قاریشمیشام من
قورتولماز دالغالارا
وارلیغیمیز چالیشماق
یوخلوغوموز دایانماق!"