بو گون گونئی آذربایجان‌دا ملی مقاومت ادبیاتینین گؤرکملی نماینده‌سی، شاعر حبیب ساهیرین آنیم گونودور.

Axar.az خبر وئریر کی، او، دکابرین ۱۵-ی ۱۹۰۳-جو ایلده میانا شهری نین تورک قصبه سینده آتادان اولوب و اوشاض یاشیندا عائله سی ایله بیرلیکده تبریزه کوچوب.

آتاسینی ائرکن یاش‌دا ایتیرن حبیب ساهیر ایلک تحصیلینی ملاخانادا آلیب. داها سونرا اورتا تحصیلینی تبریزده محمدییه مدرسه‌سین‌ده باشا ووروب.

فرانسیز دیلی و ادبیاتی معلمی اولان، ایران‌دا "آغ شعر" آدلانان مودرن شعر اصلوبونون ایلک یازاری و قوروجوسو تقی روفعت اونون معلمی اولوب.

ایسته‌مم نقش نگاریم قالا
شعریم اوخونا
ایسترم بیر سیزی، حسرت تک
اورکلرده قالام…

۱۹۲۷-جی ایلده تورکییه‌یه گئدن حبیب ساهیر اورادا یاشایان ایران‌لیلار اوچون آچیلمیش "دبستان ایرانییان" مکتبین‌ده ایکی ایل فارس دیلی و ادبیاتی معلمی کیمی ایشله‌ییب.

۱۹۲۹-جو ایلده ایستانبول اونیورسیتتینین تاریخ و جغرافییا فاکولته‌سینه قبول اولدوقدان سونرا بورادا چاغداش تورک و فرانسیز پویزییاسی ایله یاخین‌دان تانیش اولور. تحصیل آلدیغی مدتده فرانسیز دیلینی اؤیرنیب، بو دیلده ادبی اثرلری مطتالعه ائدیب.

حبیب ساهیر معلمی سعدی بیین توصیه‌سی ایله «ایران آذربایجانینین طبیعی جغرافییاسی» آدلی بوراخیلیش ایشینین خلاصه‌سینی ۱۹۳۴-جو ایلده «آذربایجان یورد بیلگیسی» ژورنالین‌دا سیلسیله شکلین‌ده نشر ائتدیریب.

تورک و فرانسیز شعرینه یاخیندان بلد اولان ساهیر لامارتینین مشهور "گؤل" پویماسینی آذربایجان تورکجه‌سینه ترجمه ائدیب.

ساهیرین تبریزده یاشادیغی ایللرده بیر-بیرینین آردینجا فارسجا یازدیغی "شقایق" ("کؤلگه‌لر")، "گئجه افسانه‌سی"، "سئچیلمیش شعرلر" آدلی کیتابلاری چاپ اولونوب.

فرانسیز، عرب و روس دیللرینی یاخشی بیله‌ن شاعر بودلردن، لامارتین‌دن، گورکی‌دن، لرمنتوو، سعدی، حافظ، خیام‌دان دیلیمیزه بیر سیرا اثرلری ترجمه ائدیب. عینی زاماندا اونون فرانسیزجا شعرلر و عربجه کیچیک حکایه‌لر یازماسی ادبیات تاریخیمیزده یئنیلیک اولوب.

گونئی آذربایجانین تانینمیش ضیالیلاری تقی روفعت‌دن سونرا آذربایجان دیلینده سربست شعر نمونه‌لرینین یارادیلماسینی حبیب ساهیرین آدی ایله باغلاییرلار. شاعر شعر یازماغا عروض وزنی ایله باشلاسا دا، سونرالار هجا وزنینه اوستونلوک وئریب.

گونئی آذربایجان‌دا مرکزی حکومتین یریتدیی عدالتسیز سیاسته قارشی چیخان حبیب ساهیر حاکم دوروما باش ایمه‌یه‌ن، ائل-اوباسینا، ملی کیملیینه بیگانه یاناشان «ضیالی»لارلا عمرونون سونونادک باریشمایان آز سایدا شخصیتلردن بیری اولوب.

او، عدالتلی مؤوقعینه گؤره دایم باسقیلارا معروض قالیب. کوسکون شاعر تجرید اولونموش حیات طرزی یاشاماسینا باخمایاراق، گونئی آذربایجانین ادبی-مدنی حیاتین‌دا اؤنملی رول اویناییب، یئنی ادبی نسیلین یئتیشدیریلمه‌سینده بؤیوک امیی اولوب.

تانینمیش شاعرین اؤلومو ده فایجه‌لی اولوب. بئلکی او، ۱۹۸۵-جی ایلده ۸۲ یاشین‌دا تهرانین آریا شهرجیین‌ده یاشادیغی ائوین پنجره‌سیندن اؤزونو آساراق اینتیحار ائدیب. او، تهرانین «بهشت زهرا» قبریستانلیغیندا دفن اولونوب.

گونئی آذربایجانین سئویملی شاعری اولان حبیب ساهیرین "قورخما" شعرینی تقدیم ائدیریک:

قورخما، بو ماوی گؤی آلتین‌دا یانان آل گونشین،

و اوفوقلرده گولن آل شفقین سؤنمه‌یه‌جک.

ایلک بهاردا آچاجاق گول، اؤتجک بولبوللر،

دونیامیز بیر ده بو عالم‌ده خزان گؤرمه‌یه‌جک.

دونیا دوردوقجا سهندین اوجا بورجون‌ده یانان

او گوموش رنگلی آیین یوللاری آیدینلاداجاق.

آخاجاق نهرلرین، هم آچاجاق لاله‌لرین،

بیرده ائولرده اینان سؤنمه‌یه‌جک اود و اوجاق.

ای منیم شانلی ائلیم، هموطنیم، آل گونشیم،

آینا تک پارلاق اوفوق، دریا تکین چرخ اسیر.

ای قادینلار، آنالار، بیرجه آچین پنجره‌نی،

صبح آچیلماقدادی، صبح‌ون یئلی داغلاردان اسیر...