اولی بورادا...

Kult.az آذربایجان ملی علملر آکادمیاسینین فولکلور اینستیتوتونون جنوبی آذربایجان فولکلورو شعبه‌سینین مدیری متانت ماشاللاه‌قیزینین تبریز فولکلورو ایله باغلی آراشدیرماسینی تقدیم ائدیر:

تبریز فولکلورونون ان زنگین قوللاری سیراسین‌دا آشیق یارادیجی‌لیغی دا آیریجا یئر آلماقدادیر. قید ائدک کی، آذربایجان آشیق صنعتینین اوستاد بیلیجیلریندن – آشیق قوربانی (XVI یوزیل‌لیک)، آشیق عباس توفارقان‌لی (XVII یوزیل‌لیک)، خسته قاسیم تیکمه‌داشلی (XVIII یوزیل‌لیک) و س. آشیقلار محض گونئی محیطین‌ده بؤیویوب، بویا-باشا چاتیب و دده-اوزان اولاراق خالقین سئویملی‌سینه چئوریلیبلر. بو اوستادلارین اؤزلریندن سونرا قویوب گئتدیی زنگین معنوی خزینه هم آذربایجان داستان یارادیجی‌لیغینی، هم ده آشیق موسیقی‌سینین اسرارنگیز عنعنه‌لرینی احاطه ائتمک‌ده‌دیر. تبریز آشیق‌لیق گلنیین‌ده اوزان، داستان‌چی آشیقلار زامان-زامان ائل ایچین‌ده فورمالاشیب، ساز و سؤز اوستالیقلاری ایله خالق طرفین‌دن سئویلیبلر.

تبریز آشیقلارینین یارادیجی‌لیغی «عباس و گولگز»، «غریب ایله شاه‌سنم»، «کرم ایله اصلی»، «لیلی ایله مجنون»، «محمود ایله گول اندام»، «واله ایله زرنگار»، «قاچاق نبی»، «کوروغلو» کیمی قهرمان‌لیق؛ اوستادلارا قوشولان «خسته قاسیم»، «آشیق غریب»، «بابا لیسان و پریزاد»؛ ائلجه ده تاریخی شخصیتلری یاشادان «شاه ایسماییل و گولزار»، «بابک» و س. کیمی داستانلاری ایله سئچیلمکده‌دیر. بوندان باشقا، «روستم و سهراب»، «شکاری» کیمی اوریژینال داستانلارین یارانماسی دا تبریز آشیقلارینین یارادیجیلیغینا باغلیدیر.

تبریز – قاراداغ آشیق محیطین‌ده داستان یارادیجلیغین‌دا «آزافلی دوبیتی»، «باش ساریتل»، «دیلقمی»، «دوراخانی»، «کرم شیکسته‌سی»، «یانیق کرم»، «یورد یئری»، «حیدری»، «ایروان چوخورو»، «قارا کهری»، «مینا گرایلیسی»، «گرایلی»، «اینجه‌گولو»، «قاراداغ گرایلی‌سی»، «قاراداغ تجنیسی»، «پاشا کؤچدو» و س. آشیق هاوالاری دا گئنیش یئر توتماقدادیر.

بوتؤولوکده، تبریز فولکلور اؤرنکلری بابالاریمیزین، ننه‌لریمیزین گله‌جه‌یه میراث قویدوغو ان دیرلی بیر ارثدیر. بو گون بو خزینه‌نین اؤیرنیلمه‌سی بوتؤو بیر خالقین یئنی سیاسی مکاندا قورونان فولکورو و معنوی دوشونجه‌سینه آچیلان بیر قاپیدیر. گومان ائدیریک کی، بو قاپیدان هله چوخ-چوخ ضیالیلاریمیز، عالیملریمیز کئچه‌جکلر. بون‌دان سونرا دا دقتدن کناردا قالان فولکلور مدنیتیمیزین بیر آرادا اؤیرنیلمه‌سی تاریخی وظیفه‌یه چئوریله‌جکدیر.

تبریز نیسگیللی بایاتیلار:

جاتیلیب قاشین تبریز

آخیر گؤز یاشین تبریز،

کیمین دردینی چکیر،

باجی-قارداشین تبریز.

داغلاردا گزه‌ن منم،

آل گئییب، بزنمرم.

یوواسیز قوشلار کیمی،

سرگردان گزن منم.

آغزیندا دیلین اوللام،

الین‌ده گولون اوللام.

تبریزه آپار منی،

آنانا گلین اوللام.

آراز آخسین، سوزولسون،

دوشمن باغری اوزولسون.

آراز اوسته یوز کؤرپو،

قوی یان-یانا دوزولسون.

آ تبریز، سونا تبریز،

گونلری سانا، تبریز.

بیزی آیری سالانی

اود توتا، یانا، تبریز.

باشیندا تاج تبریزیم،

درده علاج تبریزیم.

داها بیر ده قالمازسان،

یادا محتاج تبریزیم.

بوستان ندی، تاغ ندی؟

باغچا ندی، باغ ندی؟

تبریزده سینم اوسته

دوشمن چکن داغ ندی؟

چاتیلیب قاشین تبریز،

داغلارین، داشین، تبریز.

قارداش دردی چکمکدن

آغاردی باشین، تبریز.

دؤرد یانی قالا تبریز،

بورونوب شالا تبریز.

قویما بیر ده گؤزلریم

یولوندا قالا، تبریز.

تبریزم سینه-سینه،

گون دوشسون سینه‌سینه.

ستار گوله‌سی دیسین

دوشمنین سینه‌سینه.

باریز فولکلورونون ان زنگین قوللاری سیراسین‌دا آشیق یارادیجی‌لیغی دا آیریجا یئر آلماق‌دادیر. قید ائدک کی، آذربایجان آشیق صنعتینین اوستاد بیلیجیلرین‌دن – آشیق قربانی (XVI یوزیل‌لیک)، آشیق عباس توفارقانلی (XVII یوزیل‌لیک)، خسته قاسم تیکمه‌داشلی (XVIII یوزیل‌لیک) و س. آشیقلار محض گونئی محیطین‌ده بؤیویوب، بویا-باشا چاتیب و دده-اوزان اولاراق خالقین سئویملیسینه چئوریلیبلر. بو اوستادلارین اؤزلریندن سونرا قویوب گئتدیی زنگین معنوی خزینه هم آذربایجان داستان یارادیجیلیغینی، هم ده آشیق موسیقی‌سینین اسرارنگیز عنعنه‌لرینی احاطه ائتمک‌ده‌دیر. تبریز آشیق‌لیق گلنیین‌ده اوزان، داستان‌چی آشیقلار زامان-زامان ائل ایچینده فورمالاشیب، ساز و سؤز اوستالیقلاری ایله خالق طرفیندن سئویلیبلر.

متانت ماشاللاه‌قیزی (عباسووا)آذربایجان ملی علملر آکادمیاسینین فولکلور اینستیتوتونون جنوبی آذربایجان فولکلورو شعبه‌سینین مودیری، فیلولوگییا اوزره فلسفه دوکتورو، دوسئنت

«خالق قزئتی»