دونیا، تورکییه و آذربایجانین گونده‌می حاضردا تورکییه‌ده‌کی سئچکیلر...

سئچیم سونوجو اولاراق دوشونجه‌لریمی - سیاسی فیکیرلریمی، ایستکلریمی بیر کنارا بوراخیب، اوبیکتیو اولاراق، بند-بند یازماغا چالیشاجاغام:

۱. هر نه قدر پرزیدنت سئچکیسینده نامیزد محرم اینجه گئری چکیلسه و بو، میللت اتفاقینین ایشینه یاراسا دا، اؤنجکی فیکیرلریم دییشمدی – قطعی دئیه بیلمه‌سه‌م ده، سئچیمین ایکینجی تورا قالاجاغینی دوشونوره‌م؛

۲. سئچکی‌ده میللت اتفاقینین ۴۷-۴۸% سس آلاجاغی فیکرینده‌یم. بعضی آنکت سورغولاریندا آراداکی فرق یوکسک گؤستریلسه ده، من او شکیلده بؤیوک فرق یاراناجاغینی سانمیرام؛

۳. سایین جمهورباشقانی اردوغان ایکینجی تورا قالان سئچکیده معاش آرتیملاری، سوسیال-اقتصادی داخیل، بوتون امکانلاری یاخشیجا ایستیفاده ائدیب، قرارسیز و بیطرف، سئچیمه قاتیلمایان سئچیجیلری تأثیرلندیرمه‌یه چالیشاجاق. نتیجه‌سی اولاجاقمی؟

خصوصیله ساحل زولاغینین بیر حیصه‌سی استثنا اولماقلا، بونون ثمره‌سیز اولاجاغینی دئیه بیلمره‌م؛

۴. ان غیری-معین اولانی آلیناجاق میللت وکیلی ساییدیر. هانسی اتفاقین چوخلوغو آلاجاغینی کیمسه دئیه بیلمز.
میللت و جمهور اتفاقلاری بیر-بیریندن ان چوخو ۲۰ میللت وکیلی ایله فرقلنه بیلرلر.

۵. حسابلانمایان و چوخ دا قید اولونمایان بیر وضعیت وار: تورکییه‌ده سیستم هم جمهورباشقانلیغی، هم ده پارلامنت چوخلوغو بیر پارتییا و یا اتفاقدا اولارسا، ایشلییر. اگر پرزیدنت باشقا، بؤیوک میللت مجلیسینین اکثریتی باشقا پارتییاداندیرسا، خاوس یاراناجاق.

بو سبب‌دن:
بو سئچکیلرده سئچیم نتیجه‌سی اولاراق خاوسون اورتایا چیخا بیلجیی چوخ نورمالدیر. تورکییه خالقی بونو بیلدییندن و خاوس اولماماسی منطیقی ایله داوراندیغیندان، همچینین میللت وکیللری بیرینجی توردا معین اولوناجاغیندان، مجلیسده چوخلوغو قازانان ایکینجی توردا آوانتاژ الده ائد‌جک؛
۶. دئییلمه‌سه و مذاکیره ائدیلمه‌سه ده، ان اؤنملیسی:

میللت اتفاقینین بو شکیلده سیخینتیسی وار: بو اتفاق سیستمی دییشدیرمک وعدی ایله گلیر. بونو نئجه ائد‌جک، مذاکیره ائدیلمیر.
سیستمی دییشدیرمک آنایاسانی دییشدیرمکدیر؛ آنایاسانی دییشدیرمک اوچون تکلیفلری جمهورباشقانلیغینا گؤندرمه‌یه ۳۶۴ میللت وکیلینین سسی لازیمدیر. بیر دئییل، ۱۰ سئچیم اولسا بئله، بو قدر میللت وکیلی سایینا میللت اتفاقی چاتا بیلمز.

اگر دوروم بئله‌دیرسه، خصوصیله ده عهده‌لیک گؤتوردوکلری سیستم دییشیکلیگی اوچون نه ائتملیدیرلر؟

گؤروله‌سی یالنیز بیر ایش وار: قارشیلیقلی اولاراق آنلاشاجاقلارینی و ایکی ایل ایچینده تکرار سئچیمه گئده‌جکلرینی دوشونوره‌م. دولاییسی ایله بو سئچیم بیردن چوخ سئچیمی آرخاسی ایله گتیره‌جک.

پارلامنت سیستمینده کئچیریله‌جک سئچکیلرده سایین اردوغان رهبرلیک ائتدیی مدتده آ.ک.پ ۳۰%-دن آشاغی سس آلمایاجاق و بو دفعه اردوغان پارلامنت سیستمینده یئنی‌دن حاکمیته گله‌جک؛

۷. پارتییالارین آلاجاقلاری سسلر حاقدا تخمینلریم:
آ.ک.پ - ۳۳، ج.ح.پ - ۲۷، م.ح.پ - ۹، ایگی پارتییاسی - ۱۳، ح.د.پ – ۱۰ فایز.

سهو احتیمالیم ۲%-دیر – آشاغی و یا یوخاری اولا بیلر؛

۸. پرزیدنت سئچکیلرینده جمهور اتفاقینین سس ایتکیسی اولماز، آنجاق میللت اتفاقیندان بعضی پارتییالارین سسلرینین، خصوصیله ایگی پارتییاسی، ح.د.پ، همچینین سایین اینجه‌نین سسلرینین بیر حیصه‌سینین جمهور اتفاقینا، یعنی سایین اردوغانا گئدجیینی دوشونوره‌م.

فیکریمجه، بو یئردییشمه‌لر اونا گتیریب چیخاراجاق کی، پرزیدنت سئچکیلری بیرینجی توردا بیتمه‌یه‌جک، ایکینجی تورا کئچه‌جک؛
۹. سینان اوغانین سسی بیر چوخ آنکتده ۲-۲.۵% اولاراق گؤستریلیر. ایگی پارتییاسی و سایین محره‌م اینجه‌نین پرزیدنت سئچکیلرینده سسلرینین بیر حیصه‌سی سایین سینان اوغانا گئده بیلر.

بو اوزده‌ن سایین سینان اوغانین سسی گؤزله‌نیلندن چوخ اولارسا، تعجبلنمره‌م؛

۱۰. ۸ و ۹-جو بندلرده گؤسترمیش اولدوغوم سببلردن پرزیدنت سئچکیلرینین ایکینجی تورا قالاجاغینا یؤنه‌لیک دوشونجه‌لریم آرتیر؛

۱۱. آذربایجانلی قارداشلاریما بیر نئچه سؤزوم وار:

راحت اولون!
نتیجه نه اولورسا-اولسون، ایندییه قدر جمهور اتفاقینین مکمل اولاراق حیاتا کئچیردیینی گؤردویوموز تورک بیرلیگی و آذربایجان سیاستی دییشمز! بو سیاستین دییشمه‌سینه تورکییه‌نین ۶۰%-نی تشکیل ائد‌ن و اساس گوج اولان بیز میللتچیلر امکان وئرمریک!
اؤنملی اولان میللتین قراریدیر!

هر کسدن نتیجه‌لری قبول ائد‌رک، تخریباتا دوشممیی، تله‌لره گلمه‌میی، بیر-بیرینی اینجیتمه‌میی خواهیش ائد‌جه‌م.
سئچکیلر وطنه، دولته، میللته خییرلر گتیرسین!