بو گون شوشا شهرینده مدنیت ناظرلیگی و تورکسوی-اون بیرگه تشکیلاتچیلیغی ایله «شوشا-تورک دونیاسینین مدنیت پایتختی» ایلینین رسمی آچیلیش مراسمی کئچیریلیب.

Kult.az خبر وئریر کی، شوشانین ۲۰۲۳-جو ایل اوچون «تورک دنیاسینین مدنیت پایتختی» اعلان ائدیلمه‌سی ایله باغلی تدبیرلر حاقیندا» آذربایجان پرزیدنتینین ۶ دکابر ۲۰۲۲-جی ایل تاریخلی سرانجامینا اویغون اولاراق تشکیل ائدیله‌ن تدبیرده دولت رسمیلری، بین‌الخالق تورک مدنیتی تشکیلاتی - تورکسوی-آ عضو اؤلکه‌لرین نماینده هیئتلری، تورک امکداشلیق تشکیلاتلارینین رهبرلری و دیگر قوناقلار اشتراک ائدیبلر.

قید ائدک کی، ۲۰۲۲-جی ایل مارتین ۳۱-ده تورکیه‌نین بورسا شهرینده تورکسوی-آ عضو اؤلکه‌لرین مدنیت ناظرلری دائمی شوراسینین قراری ایله قدیم موغام-صنعت بئشییمیز شوشا شهری ۲۰۲۳-جو ایل اوچون «تورک دنیاسینین مدنیت پایتاختی» اعلان اولونوب.

ماین ۹-دان ۱۱-دک شوشادا کئچیریله‌ن «خاری بولبول» بین‌الخالق موسیقی فستیوالینا تورکسوی اؤلکه‌لرینین موسیقی و رقص گروپلاری، صنعت آداملاری دا قاتیلیبلار. فستیوال باشا چاتسا دا، شوشادا تورک دنیاسی مدنیتینین تنته‌نه‌سی هله بیر چوخ لایحه و مراسملرله ایلین سونونادک داوام ائد‌جک.

خاتیرلاداق کی، «تورک دنیاسینین مدنیت پایتختی» لایحه‌سینین اساسی ۲۰۱۰-جو ایلده تورک‌دیللی اؤلکه باشچیلارینین استانبول شهرینده کئچیریله‌ن ۱۰-جو ساممیتینده قویولوب. قرارا اساساً، تورک دنیاسیندان هر ایل بیر شهر «مدنیت پایتختی» اعلان ائدیلیر.

بو گونه قدر آستانا (۲۰۱۲، قازاخیستان)، اسکی‌شهر (۲۰۱۳، تورکیه)، کازان (۲۰۱۴، تاتاریستان - روسیا فدراسیاسی)، مرو (۲۰۱۵، تورکمنیستان)، شکی (۲۰۱۶، آذربایجان)، تورکوستان (۲۰۱۷، قازاخیستان)، کاستامونو (۲۰۱۸، تورکیه)، اوش (۲۰۱۹، قیرغیزیستان)، خیوه (۲۰۲۰، اؤزبکیستان) و بورسا (۲۰۲۲، تورکیه) شهرلری «تورک دنیاسینین مدنیت پایتختی» اولوب. شوشا بو میسیانی یئرینه یئتیرن ۱۱-جی شهردیر.