آذربایجان بسته‌کارلیق مکتبینین گؤرکملی سیمالاری آراسیندا سعید روستمووون اؤز یئری، دست خطی وار. اونون موسیقی دیلی آنلاشیقلی و یادداقالاندیر. یوکسک خالق سئوگیسیندن یارانان بو موسیقی انسانلارین قلبینه یول تاپماغا، اونلارین حسلرینه حاکم کسیلمه‌یه قادیردیر.

بو سؤزلری Kult.az-آ عزیر حاجی‌بیلی آدینا باکی موسیقی آکادمیاسینین «موسیقی تاریخی» کافدراسینین معلمی ،موسیقی‌شناس آینور ایسگندرووا دئییب.

او، بسته‌کارین اثرلرینین بو گونده سئویلدیینی دقته چاتدیریب.

«آذربایجان ماهنیسی چوخ اوزون انکشاف یولو کئچیب. بیزیم ماهنی صنعتیمیز کلاسیک بستکارلار طرفیندن یارادیلان گؤزل عنعنه‌لره مالیکدیر. میللی قایناقلاردان بهره‌لنه‌رک پارلاق صنعت اینجیلری یارادان آذربایجانین گؤرکه‌ملی ماهنی اوستاسی، بستکاری، دیریژور، معلم، فولکلورشناس، اپرتا و اینسترومنتال اثرلرین مؤلفی، اجتماعی خادم سعید روستموو میللی موسیقی مدنیتیمیزین آپاریجی سیمالاریندان اولوب. موسیقی مدنیتیمیزین انکشافیندا اونون خدمتلری دانیلمازدیر. بستکار لیریک ماهنیلاری ایله موسیقی خزینه‌میزه دیرلی تحفه‌لر وئریب. اونون لیریک، بنزرسیز، کؤنول اوخشایان ماهنیلاری خالقیمیز طرفیندن بو گون ده سئویله-سئویله اوخونور".

موسیقی‌شوناس بستکارین خالق صنعتینین نوتا کؤچورولمه‌سینده‌کی خدمتلرینی ده وورغولاییب:

"بستکار اوچ اپرتا، خالق چالغی آلتلری اوچون «بایاتی-کورد فانتازیاسی»، دؤرد سوئیتا، خور، سولیست و ارکستر اوچون اوچ کانتاتا، تار ایله ارکستر اوچون کنسرت، بیر سیرا انسترومنتال پیئسلر و ماهنیلارین مؤلفیدیر. سعید روستمووون میللی ثروتیمیز اولان خالق موسیقی نمونه‌لرینین، موغام، آشیق موسیقیسی، خالق ماهنیلاری و رقصلرین نوتا کؤچورولمه‌سی ساحه‌سینده‌کی دانیلماز رولو موسیقی فولکلورشوناسلیغینین انکشافیندا تاریخی اهمیته مالکدیر. او، ۱۹۳۵-جی ایلده ارکستر اوچون گئنیش هجملی اثر اولان «بایاتی-کورد» فانتازیاسینی یازمیش و ایلک دفعه اولاراق عینی‌آدلی موغامی ارکستر اوچون ایشلمیشدیر. اونون ۱۹۳۷-جی ایلده «آذربایجان خالق رقصلری» ، ۱۹۳۸-جی ایلده جابار قاریاغدینین اوخوماسیندا «۵۰ آذربایجان خالق ماهنیسی»، همین ایلده «آشیق ماهنیلاری» آدی ایله نشر اولونموش دؤرد مجموعه‌سینین آدینی قید ائده بیلریک".

بسته‌کارین اؤزونه‌مخصوص ملودیک استعدادا مالک صنعتکار اولدوغونو بیلدیره‌ن موسیقی‌شناس اونون اثرلرینین خصوصیتلرینی دقته چاتدیریب:

"سعید روستمووون صمیمی، یاددا قالان، آیدین موسیقی دیلی اؤز بدیعی افاده‌لیلیگی ایله سئچیلیر. اونون ۷۰ ایل اول یاراتدیغی ماهنیلاری بو گون ده اؤز طراوتی، مهربانلیغی، صمیمی‌لیگی ایله بیز دینلییجیلرین قلبینه یول تاپاراق هر زمان یاشاییر و یاشایاجاق. بستکارین ماهنیلاری آراسیندا پوئتیک جاذبه‌سی ایله سئچیله‌ن «آلاگؤز»، «بنؤوشه»، «قوربان آدینا»، «گلمدین»، «اوخو گؤزل»، «شعر دئییلمی؟»، «سنیندیر»، «سئوگی ماهنیسی»، «سوریا»، «اوخو تار» انسانین ان خفیف، گیزلی حسلرینی افاده ائدیر".

قید ائدک کی، روستموو رسپوبلیکامیزین موسیقی حیاتیندا فعال اشتراک ائد‌ن اجتماعی خادم ایدی. او، آذربایجان دولت ماهنی و رقص آنسامبلینین بدیعی رهبری، آذربایجان دولت کنسرواتوریاسینین پروفسسورو، ۱۹۴۰-۱۹۴۹-جو ایللرده آذربایجان دولت فلارمونیاسینین دیرکتورو وظیفه‌لرینده چالیشیب. اؤلمز، پارلاق بستکاریمیز سعید روستمووون بو گون آنادان اولماسیندان ۱۱۶ ایل اؤتور.