ملا رژیمینین مدنیتیمیزه، تاریخی عابده‌لریمیزه ووردوغو ضربه‌لری سایماقلا بیتمز. بونلاردان بیری ده رژیمین محو سیاستینه معروض قالان تبریز شیر خورشید تئاتریدیر. تبریز شیر خورشید تئاترینا ارک تئاتری دا دئییرلر.

Kult.az خبر وئریر کی، تاریخی عابده گنرال-لیتنانت امیر احمدی‌نین فرمانی، ائلجه ده قیرمیزی شیر و گونش جمعیتینین تشبوثو ایله عرصه‌یه گلیب.

سن پترزبورگ تئاتریندان الهاملاناراق اس.اس.ار مهندسلری و معمارلاری طرفیندن تیکیلن عابده ۱۹۲۷-جی ایلده تماملانیب، ائله همین ایلده ده آچیلیشی ائدیلیب.

بینانین معماری دقیق بیلینمیر. احتمال ائدیلیر کی، معمار قفقازدان گلیب. چونکی تئاترین بناسی سن پترزبورگ تئاتریندان علاوه، باکی و تفلسده‌کی انتباه دؤورونون ایتالیان اصلوبو ایله یوکسک دکوراتیو اینتریره مالک آلمان روکوکو اصلوبونو اؤزونده بیرلشدیریب.

اساس زالین اوزونلوغو ۳۰ متر، ائنی ۱۰ متردیر. ۱۰ نفرلیک ۱۶ لوژادان عبارت تئاترین عمومی توتومو ۸۰۰ نفر اولوب. دؤشه‌مه‌لرین، تاوانین و گیریش دهلیزینین اطرافیندا نادر و اؤزونه مخصوص صنعت اثرلری وار ایدی.

زالین ان واجب جهتی ایسه مرتبه‌لر و بینانین تاوانیندا اولان خصوصی آکوستیکایا گؤره بورادا هئچ بیر سس گوجلندیریجی آلتلره احتیاجین اولماماسیدیر. زالین بیرینجی جرگه‌سینده اوتوران تاماشاچیلار موسیقینی نئجه ائشیدیردیلرسه سونونجو جرگه‌ده اوتورانلار دا ائله ائشیدیرمیشلر.

۱۹۴۵-جی ایل دکابرین ۱۲-ده آذربایجان ملی حکومتین قورولماسی تبریز تئاترینین انکشافیندا یئنی بیر دؤور آچیر. بو دؤورده تئاتر اساسلی شکلده تعمیر ائدیلیب، پرده‌لری و چلچراقلاری دییشدیریلیر. ۸ مارت ۱۹۴۶-جی ایلده تبریز دولت درام تئاترینین طنطنه‌لی آچیلیشی اولور. کلکتیوین اساسینی مختلف تروپالارین هوسکار آکتیورلاری تشکیل ائدیر. صنعت اوجاغی جلیل ممدقولوزاده‌-نین «آنامین کتابی» پیسینین تماشاسی ایله فعالیته باشلاییر.

بو تاریخی بنا ۱۹۸۰-جی ایلده - ایران اسلام انقلابیندان سونرا، مسلم ملکوتینین تبریزین جمعه امامی اولدوغو زمان جهاد سازندگی ناظرلیی طرفیندن داغیدیلیر، یئرینده ایسه مصلی مسجدی تیکیلیر.