۲۰-جی یوزیل‌لیکده او تایلی-بو تایلی آذربایجان آشیق صنعتینین مشهور سیمالاریندان اولان، امکدار مدنیت ایشچی‌سی حسین جوان اولوب.

Kult.az خبر وئریر کی، او هم گؤزل ساز ایفاچی‌لیغی، هم ده آشیق شعیرینین مختلیف ژانرلاریندا قلمه آلدیغی دیقته‌لاییق بدیعی نمونه‌لرله ادبی-مدنی محیط‌ده بؤیوک شهرت قازانیب.

حسین میکاییل اوغلو علیئو (حسین جوان) ۱۹۱۶-جی ایلده جنوبی آذربایجادا، قاراداغ محلینین اوتی کندینده یوخسول بیر عائله‌ده دونیایا گؤز آچیب.

چوخ کیچیک ایکن آتاسی غفلته‌ن وفات ائدیر، عائله چتینلیکلرله اوزلشیر. آناسی زهره خانیم اوغلو ایله بیرگه شمالی آذربایجانا پناه گتیریر. آغدام رایونونون شرفخانلی کندینده مسکونلاشیرلار.

اونون ملاحت‌لی سسی چوبان یولداشلارینین دقتینی چکیر. ائل یایلاغا گئدرکن کندین آغساققالی حسینی آشیق علسگرین قارداشی اوغلو آشیق موسی ایله تانیش ائدیر. حسین سکیز ایل اونون یانیندا قالیر، صنعتین سیرلرینی اؤیرنیر. یاواش-یاواش ائل شنلیکلرینه ده قاتیلیر، آشیق کیمی تانینماغا باشلاییر. شفاهی خالق ادبیاتینی دریندن منیمسییر.

آشیق-شاعر ۲۰-۲۵ یاشلاریندا قلمه آلدیغی «تبریز» ردیفلی شعرین‌ده علم، سؤز-صنعت مرکزی، آرزولارین شهرینه اولان حسرتینی بئله ایفاده ائدیردی:

ساریلیب بوینونا بیر کؤرپه سایاق،

دویونجا هوسنونه باخایدیم، تبریز.

سن بیر داغ اولایدین، من ده بیر بولاق،

شیرهاشیر سینندن آخایدیم، تبریز.

شعیرلرینده تئز-تئز گونئی آذربایجانین داغلارینی، شهرلرینی یادا سالان شاعر «قاراداغ» ردیفلی قوشماسیندا دوغما ائلینی تبریزله مقاییسه ائدیر:

تبریز بیر آنادیر، سن ده اوغلوسان،

ائل بیلیر، اورکدن اونا باغلیسان.

اوغلون ستارخاندان سینه داغلیسان،

اونونچون آغاریب باشین، قاراداغ...

آشیق حسین ۱۹۳۸-جی ایلده جنوبی آذربایجان منشأ‌لی اولدوغوندان سوویت آذربایجانینی ترک ائتمه‌لی اولور. تزه-تزه ایسینیشدیی دوست-تانیشلاریندان آیری دوشور. همین ایل تبریزده مسکونلاشیر.

حسین جوانین ایلک قلم تجروبه‌سی اولان «گول آذربایجان»، «اویان، وطنداشیم»، «آنا وطن» و س. شعیرلری تبریزده نشر ائدیلن «وطن یولوندا» قزئتین‌ده درج اولونوب. او، جنوبی آذربایجاندا سید جعفر پیشه‌ورینین رهبرلیک ائتدیی میللی دموکراتیک حرکاتین آلوولاندیغی گونلرده سازی و سؤزو ایله فداییلری غلبه‌یه روحلاندیریب. جنوبی آذربایجان میللی حکومتی اونون بو فعالیتینی «۲۱ آذر» مئدالی ایله مکافاتلاندیریب.

۱۹۴۶-جی ایلین مارتین‌دا تبریزده دولت درام تئاتری تشکیل اولونور. آشیق-شاعر دیرکتور معاوینی وظیفه‌سینه تعیین ائدیلیر. رسمی تدبیر و شنلیکلرده جوشقون انقلابی روحلو نغمه‌لری ایله چیخیشلار ائدیر. تبریزده آشیقلار آنسامبلی یارادیر. امیی یوکسک قیمتلندیریلن حسین جوان آذربایجان دموکرات فیرقه‌سی طرفیندن «خالق آرتیستی» فخری آدینا لاییق گؤرولور.

۱۹۴۶-جی ایلده آشیق حسین جوان بیر داها سوویت آذربایجانینا پناه گتیریر. او، واختینین بؤیوک حیصه‌سینی یارادیجیلیغا حصر ائدیر. اوچ خالق داستانی یارادیر. بیر مدت سونرا م . ماقومایئو آدینا آذربایجان دولت فیلارمونییاسینین سولیستی اولور.

گونئی‌لی-قوزئی‌لی آذربایجاندا ایستعدادلی صنعتکار کیمی تانینان آشیق-شاعرین ساغلیغیندا «آزادلیق ماهنیلاری»، «آشیغین آرزولاری»، «صدف‌لی ساز»، «قوشمالار»، «دانیش، تللی سازیم» و س. کیتابلاری ایشیق اوزو گؤروب. خالق شاعری صمد وورغون اونون یارادیجیلیغینا یوکسک قیمت وئریب، آذربایجان یازیچیلار اتفاقی سیرالارینا قبول ائدیب.

امکدار مدنیت ایشچیسی آشیق حسین جوان ۱۴ نیابر ۱۹۸۵-جی ایلده، ۶۹ یاشین‌دا وفات ائدیب، گورانبوی رایونوندا دفن اولونوب. ۲۰۱۶-جی ایلده صنعتکارین ۱۰۰ ایللیک یوبیلیی اؤلکه‌میزده گنیش قید ائدیلیب.