قادینلار دونیانین بیر چوخ یئرین‌ده یاشیندان، دینیندن، دیلیندن آسیلی اولمایاراق ایش، تحصیل، عائله و جمعیتده‌کی حقوقلاری، سئچیملری اوغروندا مباریزه آپاریرلار. بدیعی کیتابلاردا دا اؤز یئرینی آلان بو مؤوضوع‌دا یوزلرله اثر یازیلیب کی، بونلارین بیر چوخو بئستسئللئره چئوریلیب. قادین حیاتیندان بحث ائد‌ن «آننا کارئنینا» (ل. ن. تولستوی)، «جن ائیر» (شارلوتتا برونت)، «گونده‌لیک» (آننا فرانک)، «مین محتشم گونش» (خالید حسینی)، «چالیقوشو» (رشاد نوری گونتکین)، «منیم پاییم» (پرینوش سنیی)، «لیلا» (آلئکساندرا کاوئلیوس)، «آلژیر» (اولوییه طاهیر) و س. اوخوجونو اؤزونه باغلایان اثرلردیر.

Kult.az بو دفعه تحصیل اوغرون‌دا مباریزه‌سینه گؤره طالبان طرفیندن گوله‌لنه‌ن ۱۵ یاشلی قیزدان بحث ائد‌ن "ملاله منه‌م" کیتابی حاق‌دا معلوماتی تقدیم ائدیر.

بوتون دونیایا سس سالان، نوبل مکافاتی لاورئاتی مالاله یوسیفزئیین بین‌الخالق بستسلر اولان "ملاله منه‌م" آدلی آوتوبیوگرافیک اثری ملاله‌نین گؤزونو خسته‌خانادا آچماسی ایله باشلاییر و اؤز دوغوموندان باشلایاراق حیاتی، عائله‌سی، پاکیستانین تاریخی، سیاسی وضعیتی، یاشادیغی سوات ویلایتی حاقین‌دا اطرافلی دانیشیر. ملاله اؤز دوغومونو بئله تصویر ائدیر: «من اوغلانلارین دوغولماسینین توفنگدن آتش آچیلاراق قید ائدیلدیی، قیزلارین ایسه پرده آرخاسیندا گیزلدیلدیی، اونلارین حیاتداکی رولونون یالنیز یئمک بیشیریب دونیایا اوشاق گتیرمکدن عبارت اولدوغو یئرده گؤز آچمیشدیم».

بلی، ملاله کاسیب، ساوادسیز، قیز اوشاقلارینین اوخودولمادیغی، یوک اولاراق گؤرولدویو بیر جمعیت‌ده دوغولور. دوغولدوغو جغرافییا بیر چوخ اینسان کیمی اونون دا حیاتینا ایستیقامت وئرمیشدی. لاکین اونون بختی گتیرمیشدی کی، زیاددین کیمی آتاسی وار ایدی. چلیمسیز، دیل قوسورلو اولماسینا باخمایاراق اؤز عزمی ایله تحصیل آلان، خالقینی معاریفلندیرمک، مکتب آچا بیلمک اوچون دریدن-قابیقدان چیخان، یوخسوللوغونا باخمایاراق اؤز ایدئیاسیندان دؤنمه‌یه‌ن بیر آتادیر زیاددین. آتاسینین آچدیغی کهنه مکتب بینالاریندا اوشاقلیغینی کئچیرن ملاله چوخ کئچمیر کی، آتاسینا لاییق بیر قیز اولور. آرد-آردا صینیف بیرینجیسی اولاراق معلملرینین سئویملیسینه چئوریلیر. اؤزو یاشدا اوشاقلارین کوچه‌لرده زیبیل ییغماسی، تحصیل آلا بیلمه‌مه‌سی بالاجا قیزجیغازا پیس تأثیر ائدیر. کیچیک اوریینده مکتبه گئده بیلمه‌یه‌ن بوتون اوشاقلارین دردینی چکیر.

ملاله پاکیستانین مستقیللیک قازانماسی تاریخیندن، سیاستچیلریندن، بی‌نظیر بوتودان، دینی گروپلاشمالاردان، طالبان‌دان بحث ائدیر. بو معلوماتلاری اوخودوقجا پاکیستانین همین دؤورکو وضعیتینی داها یاخشی تصور ائتمک اولور. اینسانلارین جاهیللییندن، یوخسوللوغوندان فایدالانان طالبان اؤلکه‌نی حیصه-حیصه اله کئچیرمه‌یه باشلاییر. اونلار قادینلارین تحصیل آلماماسی اوچون مکتبلری پارتلادیر، اونلارین آزادلیقلارینی محدودلاشدیریر، ائولره کیلیدلییر، کوچه‌لرده اینسانلاری هدلییر، شاللاقلاییر، رقصی، موسیقینی، تلویزورا باخماغی قاداغان ائدیر و س. اوردو، پلیس بئله طالبانین عهده‌سیندن گله بیلمیر. کامیکادزه‌لر اؤلکه‌نی ایفلیج وضعیتینه سالیر، هر گون اؤلوم خبرلری یاییلیر. جماعت قورخوسوندان سسینی چیخارا بیلمیر. ملاله و عائله‌سی بو یاشادیقلارینا اینانا بیلمیرلر. بوتون قاداغالارا، تهلوکه‌لره باخمایاراق ملاله تحصیلینی دایاندیرمیر. و نهایت، طالبان مکتبلرین باغلانماسینا نایل اولور. لاکین ملاله و آتاسی اؤز مباریزه‌سیندن ال چکمیر. اونلار مختلیف تلویزییا وئریلیشلرینده اشتراک ائدیر، اینتروو وئریر، دونیانین دقتینی پاکیستاندا باش وئره‌نلره جلد ائتمک ایستییر، طالبانا میدان اوخویورلار. و بئله‌لیکله ده، اونلارین اساس هدفینه چئوریلیرلر. ملاله ببج اوردو اوچون گیزلی آدلا اؤز حیاتین‌دان، طالبانین اسارتینده یاشاماغین چتینلیکلریندن بلوگ یازماغا باشلاییر. «من قلمین و اوندان گلن سؤزون پولمیوت، تانک و هلیکوپترلردن داها گوجلو واسطه اولدوغونو گؤرمه‌یه باشلادیم»، دئین ملاله کیچیک بویو ایله بؤیوک ایشلر گؤرمیی باجاریر.
و او دهشت‌لی گون... زیایددین آغلینا دا گتیرمزدی کی، هدف اونون قیزی، یعنی بیر اوشاق اولا بیلر. اوزونه سلاح توشلانان‌دا بئله ملاله اونلارلا دانیشماق، مکتبلری باغلاماماغی خواهیش ائتمک ایستییردی. «ملاله کیمدیر؟» سوالینین آردیندان آچیلان آتش، قارالان دونیا، شیکست قالان بیر اوشاق...

ملاله‌نین حیاتی، اونون تحصیله، مکتبه، کیتابلارا اولان سئوگیسی اینسانی والئه ائدیر. یاشیدلاری «توی-توی» اویونو اویناییب کؤرپه یاشدا اره گئتمک خولیالاری قورارکه‌ن او تحصیل آلماق، بینظیر بوتویا بنزه‌مک ایستییر. الینه خینادان بزک وورماق یئرینه، تنلیکلر، دوستورلار یازیر.

ملاله هر بیر گنج قیزین اؤرنک گؤتورجیی بیر مدلدیر. اونون مباریزه‌سی پاکیستان سرحدلرینی آشاراق عمومبشری کاراکتر داشیییر. اونون گوله‌له‌نمه‌سی بیر آندا بوتون دونیانین دقتینی پاکیستانا، طالبان وحشیلیینه، قیزلارین تحصیلینه یؤنلتمیش اولور. بیر چوخ دونیا اؤلکه‌لری، مشهور شخصلر ملاله‌یه دستک اولور. بیونس، سلنا قومز، آنجلینا جولی اونون حاقیندا دانیشیر، آدینا ماهنیلار یازیلیر. بیرلشمیش میللتلر تشکیلاتی ۱۰ نیابر تاریخینی "ملاله گونو" اعلان ائدیر. ۱۶ یاشی اولان گون ملاله نیو-یورکدا ب.ام.ت ساممیتینده چیخیش ائد‌رک بوتون اوشاقلارا پولسوز تحصیل وئریلمه‌سینی طلب ائدیر. ۱۷ یاشدا ان گنج نوبل صولح مکافاتینا لاییق گؤرولور. مکافاتلا برابر وئریلن ۱ میلیون دلاری پاکستاندا قیزلارا مکتبلر آچیلماسی اوچون باغیشلاییر. او، قیز اوشاقلارینین تحصیل آلا بیلمه‌سی و داها یاخشی گله‌جک قورا بیلمه‌سی اوچون ملاله فوندو یارادیر. میسییاسینین داوامی کیمی بو کیتابی یازیر: «منیم بو کیتابی یازماقدا مقصدیم بوتون دونیاداکی قیزلارین - مکتبه گئتمه‌سینه و پوتنسیالینی حیاتا کئچیرمه‌سینه قاداغا قویولموش میلیونلارلا قیزین آدیندان سسی‌می چیخارماق ایدی». کیتاب بؤیوک ماراق گؤره‌رک بیر چوخ دیله ترجمه ائدیلیر و دفعه‌لرله نشر ائدیله‌رک، اساسیندا فیلم چکیلیر.

ملاله ب.ام.ت-دکی چیخیشیندا دئییر: «بیر اوشاق، بیر معلم، بیر کیتاب، بیر قلم دونیانی دییشدیره بیلر. تحصیل یگانه حل یولودور».