آوسترییادا فعالیت گؤسترن «اؤست انسمبل» آنسامبلی ویانادا ایلک کنسرت پروگرامی ایله چیخیش ائدیب.

Kult.az خبر وئریر کی، ویانا موسیقی و صحنه صنعتلری اونیورسیتتین‌ده رئاللاشان ایلک کونسرتده آنسامبل موسیقی سئورلرین گؤروشونه «آرزو بالیق» داستانی ایله چیخیب.

«آرزو بالیق» داستانی گؤرکملی تبریزلی یازیچی، تانینمیش ترجمه‌چی-پوبلیسیست صمد بهرنگینین «بالاجا قارا بالیق» ناغیلی اساسین‌دا آریا تورکانبووری طرفین‌دن یازیلیب. بو پرفورمانس باشدان-باشا آذربایجان-تورک آشیق داستان عنعنه‌سی اساسیندا قورولوب. یعنی فرقلی موسیقی و رقص مدنیتلریندن سئچیلن و ایفا اولونان اثرلرین هامیسی داستان روایتی اساسیندا، آشیقلارین داستان دئمه فورماسینا دایاناراق یئنی فورمادا ایفا اولونوب.

«آرزو بالیق» داستانین‌دا آذربایجان موسیقی مدنیتین‌دن فیکرت امیرووون «من سنی آرارام»، «مین بیر گئجه» بالتین‌دن رقص، نیازینین «قایتاغی» و گونئی آذربایجان آشیق ماهنیسی «چال، آشیق، چال» کیمی اثرلر باشقا موسیقیلرله یاناشی تقدیم ائدیلیب. بونلارلا یاناشی، آذربایجان «ماهور» و «شوشتر» مغاملاری دا ویانادا یاشایان تبریزلی سولیست هادی مصطفایی طرفین‌دن ایفا ائدیلیب. آذربایجان تورکجه‌سین‌دن کنار گیلک، فارس، گورجو، تورکییه تورکجه‌سی، قازاخ تورکجه‌سی، ماقدونییه و مجار دیللرینده ماهنیلار دا سسلندیریلیب. داستانین اؤزو ایسه بئرلین شهرینده یاشایان و اصله‌ن تبریزلی حمید سانعی طرفین‌دن آذربایجان و آلمان دیللرین‌ده سؤیلنیلیب.

«آرزو بالیق» داستانیندان اؤنجه آذربایجان-تورک آشیق صنعتینه حصر اولونموش دیپلم ایشینی ویانا موسیقی و سهنه صنعتلری اونیورسیتتینین اتنوموسیقی شناس‌لیق اینستیتوتوندا بیتیریب. آ. تورکانبووری بوتؤو آذربایجان بؤلگه‌سین‌ده داستان ایفاچیلیغینین آرادان گئتدیی و اجتماعی فونکسییاسینی الده‌ن وئردیی بیر زاماندا، دونیانین موسیقی مرکزی ساییلان ویانادا بو عنعنه‌نی یئنی فورمادا صحنه‌یه چیخارماغی اهمیت‌لی بیر آددیم کیمی گؤرور. بسته‌کارین دئدیینه گؤره، »آرزو بالیق» داستانی بوتون اینجسنت ساحه‌سین‌ده چالیشانلارا، خصوصیله آذربایجان موسیقی‌سی، تئاتر و ادبیات ساحه‌سینده اولان صنعت آداملارینا اوغورلو بیر اؤرنک اولا بیلر. تخمیناً ایکی ساعت داوام ائد‌ن کونسئرت داستان سؤیله‌مه، موسیقی و رقص ترکیبین‌ده ایفا اولاراق، ویانادا کونسئرت‌ده اشتراک ائد‌ن بین‌الخالق تاماشاچی کوتله‌سی طرفین‌دن بؤیوک ماراق و زوقله قارشیلانیب.

سئچیله‌ن اثرلرین هامی‌سی غرب موسیقی سس سیستمین‌دن فرقلی اولاراق، شرق موسیقی سس سیستمینین تونال قانونلاری اساسین‌دا بسته‌کار طرفین‌دن آنسامبل اوچون آرانژمان اولونوب.

آذربایجان‌دا تحصیل آلان آریا تورکانبووری، عاریف ملیکوو، جیحون آللاهوردیئو، آذر داداشوو، لاله رضایئوا و ایوب قولیئو کیمی معلملرین طلبه‌سی اولموشدور. بسته‌کار ۲۰۲۱-ده اوزئییر حاجیبیلی بسته‌کارلیق مکافاتی قازانیب. عینی زاماندا، گونئی آذربایجانین «طالبی نور« آدلی ایلک اوپراسینی ۲۰۱۴-ده اوزییر حاجیبیلینین «لیلی و مجنون» اوپراسی اساسیندا یازدیغی یئنی روایت اساسیندا صحنه‌یه چیخاریب.