فرق‌لی اؤلکه‌یه، دینه، ایرقه منصوب اولان قهرمانلارین حیاتلارینی اوخوماق، و بو قهرمانلاری رئال حیاتدا تانیماق چوخ ماراقلی اولور. بو جهت‌دن سومالیدن اولان سامییه‌نین حیاتیندان بحث ائد‌ن "دئمه کی، قورخورام..." اثری چوخ ماراقلی و تقدیرلاییقدیر.

Kult.az بیلدیریر کی، سامییه ایتالیان یازیچیسی جوزف کاتوتسللانین ۴۰ اؤلکه‌ده ۵۰۰ مین نسخه‌دن چوخ ساتیلان رومانینین، هم ده سومالینین قهرمانی‌دیر.

مؤلف ۲۰۱۲-جی ایلده تلویزییادا سامییه‌نین حیات حکایه‌سینی ائشی‌دیر و قیسا بیر واخت‌دا بو اثری یازماغی قرارا آلیر.

اثر قومبارا یاغیشی آلتین‌دا درس آلماغا مجبور اولان، تئاترین، ایله‌نجه‌نین (حتی رنگلی گئیینمیین بئله) قاداغان اولدوغو، اینسانلارین باریت ایگی ایله نفس آلدیغی، قانونسوزلوغون حکم سوردویو سومالیده سامییه آدلی قیزین قاچماق سئوگی‌سین‌دن بحث ائدیر.

ایکی دوشمه‌ن قبیله‌دن، آبقال و دارود قبیله‌سین‌دن اولان ۸ یاشلی علی و سامییه بیر دامین آلتین‌دا یاشایان دوستلاردیر. بو سارسیلماز دوستلوق اونلارا آتادان، بابادان میراث قالیب. گؤزونو محاربه ایله آچمیش، دنیزه اوزاقدان حسرتله باخان بو اوشاقلارین تک ایله‌نجه‌سی توزلو کوچه‌لرله قاچماق‌دیر. اؤزلری جانسیز، جیلیز اولسالار دا، کیچیک اورکلرینده بؤیوک آرزولار بسلییرلر. سامییه آتلت اولماق، اؤلکه‌سینی دونیادا تانیتماق، علی ایسه اونون مشقچی‌سی اولماق ایستییر.

سامییه بؤیودوکجه اؤز آرزولارینا دوغرو داها قطیعت‌لی آددیملار آتیر، هر گون داواملی اولاراق قاچیر، بالاجا مشقچی دوستونون پلاستیک بوتولکالاردان حاضیرلادیغی چکی داشلاری ایله مشق ائدیر. آیاغینا گئیدیی نیمداش آیاققابییا باخمایاراق یاشادیغی شهرده یاریشلاردا اشتراک ائدیر و دفعه‌لرله بیرینجیلیک قازانیر. سونرا او، بو اوغورلارینی اؤلکه‌میقیاس‌لی یاریشلاردا دا داوام ائتدیریر.

هئچ واخت پئشه‌کار قاچیشلا مشغول اولمایان سامییه ۲۰۰۸-جی ایلده پکین اولیمپییا اویونلاریندا سومالینی تمثیل ائدیر و فینیش ختتینه سونونجو چاتیر. نه نورمال ایدمان آیاق قابیسی، نه ده نورمال ایدمان گئییمی اولان سامییه بیر آندا بوتون دونیانین ماراغینی جلب ائدیر، حتی اولدوزا چئوریلیر. آنجاق بو اولدوز وطنینه قاییدان کیمی سؤنور...

اسلام‌چی "الشاباب" گروپلاشماسینین، وطنداش محاربه‌سینین حیاتی ایفلیج ائتدیی بیر واختدا سومالیده هئچ کسی هانسی‌سا بیر آتلتین آرزولاری ماراقلاندیرمیر، حتی مانعه‌لر، قاداغالار داها دا شدتلنیر. آرتیق حیاتی باهاسینا مشقلره داوام ائد‌ن سامییه کوچه‌لرده ایستدیی کیمی قاچا بیلمیر. قاداغالار سامییه‌نی نینکی هوس‌دن سالیر، عکسینه اونو داها دا اینادکار، عزملی ائدیر. ایندی اونون هدفی ۲۰۱۲-جی ایلده باش توتاجاق لوندون اولیمپییا اویونلاریندا اشتراک ائتمک، وطنینی تمثیل ائتمکدیر.

لاکین گونلرین بیر گونو هر شئی محو اولور، ایندی سامییه بیر آن بئله سومالی‌ده قالماق ایستمیر. مینلرله سومالی‌لی کیمی او دا غیری-قانونی یوللا آرالیق دنیزینی کئچمک، میقرانت کیمی آوروپایا گئتمک ایستییر. بس، او مقصدینه چاتاجاقمی؟ لوندون اولیمپییا اویونلاریندا اشتراک ائد‌جکمی؟ علی و سامییه‌نین عاقیبتی نئجه اولاجاق؟ بونو یالنیز اثری سونادک اوخوماقلا اؤیره‌نمک اولار.

اثری اوخویارکه‌ن قیزینی دستکله‌یه‌رک، هر چتینلیکده یانیندا اولان، سؤزلری ایله اونو موتیواسییا ائد‌ن، فداکار دوست و آتا کیمی سامییه‌نین آتاسینا بؤیوک رغبت دویوروق. او، سانکی اولاجاقلاری حس ائدیرمیشجه‌سینه قیزینا بئله نصیحت ائدیر: "آدام گرک هئچ واخت قورخدوغونو دیلینه گتیرمه‌سین، منیم بالاجا سامییه‌م! هئچ واخت! اگر بئله اولسا، قورخدوغون شئیلر سنه داها بؤیوک گؤرونه‌جک، سنی اوسته‌له‌یه‌جک".

سامییه میقرانت کیمی اؤلکه‌نی ترک ائتدیی او قورخونج "سیاحت" زامانی آتاسینین سؤزلرینی هر آن خاطیرلاییر. همین حیصه‌لری اوخویارکه‌ن آلدادیلان، آلچالدیلان، ساتیلان، اینسانلیقدان چیخمیش سومالیلیلری گؤردوکجه، سامییه‌نین بو "سیاحت"دن ساغ چیخدیغینا اینانماق اولمور.

هر زوقه خیتاب ائد‌ن، ترجمه و نشر کئیفیتی ده چوخ بیه‌نیله‌ن "دئمه کی، قورخورام..." رومانینی اوخومانیزی توصیه ائدیریک.