بو گون معنوی-اخلاقی کیفیتلره مالیک زنگین یارادیجیلیغی ایله آذربایجان خالقینین بدیعی فیکیر سالنامه‌سینه یئنی پارلاق صحیفه یازمیش سؤز اوستالاریندان اولان ایسماییل شیخلینین آنیم گونودور.

Kult.az خبر وئریر کی، او، ۱۹۱۹-جو ایل مارتین ۲۲-ده قازاخین ایکینجی شیخلی کندین‌ده معلم عائله‌سینده آنادان اولوب. کوسالار کندینده ابتدای مکتبی بیتیریب، قازاخ پئداگوژی مکتبینده، داها سونرا ایسه آذربایجان پداگوژی اینستیتوتونون دیل و ادبیات فاکولته‌سینده تحصیل آلیب. قازاخ رایونونون کوسالار کند اورتا مکتبینده درس حصه مدیری ایشله‌ییب. ایکینجی دونیا محاربه‌سی دؤورونده سووت اوردوسو ترکیبینده اؤن جبهه‌ده اولوب.

ایلک متبوع اثری "قوشلار" شعیری ۱۹۳۸-جی ایلده "ادبیات" قزئتینده درج اولونوب. ایسماییل شیخلی بوندان سونرا نثره یول آلاراق و «کنسرو قوتولاری»، «حکیمین ناغیلی»، «سحری گؤزلییردیک»، «کئرچ سولاریندا»، «هارالیسان، آی اوغلان؟»، «رایکوم کاتیبی»، «داشکسن» اوچئرکلرینی، «آیریلان یوللار»، «دلی کور»، «اؤلن دنیام» رومانلارینی یازیب.

«آیریلان یوللار» رومانی نثر ساحه‌سینده ایسماییل شیخلینین اؤزونه اولان اینامینی آرتیریب. همین اینام، اوغور اونو «دلی کور»ا گتیریب. ادیبین مشهور «دلی کور» رومانی اجتماعی شعوردا دؤنوشه و اؤزونودرکه یول آچان مهم ادبی-مدنی حادثه کیمی قیمتلندیریلیر.

اونون یارادیجیلیغین‌دا ترجمه ادبیاتی دا مهم یئر توتور. او، ۱۹-جو عصر فرانسیز ادبیاتینین مشهور رئالیست یازیچیسی گی دموپاسانین، تورکییه‌لی یازیچی عزیز نسینین "تاختالیکؤیدن مکتوبلار" سرلؤحه‌لی ساتیریک حکایه‌لرینی ایلک دفعه ۱۹۸۰-جی ایللرده ترجمه ائد‌رک آذربایجانلی اوخوجویا تقدیم ائدیب.

"قیزیل اولدوز"، "شرف نشانی"، "قیرمیزی امک بایراغی"، ۲-جی درجه‌لی "بؤیوک وطن محاربه‌سی" اوردنلری و مئداللارین، آذربایجان اس.اس.ار عالی سووتینین فخری فرمانینین و آذربایجان رسپوبلیکاسینین "شهرت" اوردنینین صاحبی خالق یازیچیسی ۱۹۹۵-جی ایل ایولون ۲۶-دا باکی‌دا وفات ائدیب و فخری خیاباندا دفن اولونوب.