بو گون آذربایجان موسیقی‌سینین گؤرکملی نماینده‌سی، خالق آرتیستی، شرقده ایلک اوپرا یازان قادین بسته‌کار شفیقه آخوندووا و اوغلو تالح حاجییئوین آنیم گونودور.

Kult.az خبر وئریر کی، شفیقه آخوندووا ۱۹۲۴-جو ایلده شکی شهرینده دونیایا گلیب.

او، آ . زینال‌لی آدینا باکی موسیقی مکتبینده اوخویارکه‌ن بسته‌کار اوزئییر حاجیبی‌لی‌دن درس آلیب، معلمینین توصیه‌سی ایله تحصیلینی آذربایجان دولت کنسرواتورییاسیندا داوام ائتدیریب.

ایلک بسته‌سی اولان «بالا» ماهنی‌سینی معلمی اوزئییر حاجیبی‌لییه گؤستره‌رک اونون خییر-دعاسینی آلان شفیقه آخوندووا اوستادیندان بهره‌لندیی یارادیجی‌لیق عنعنه‌لرینه و یوکسک اینسانی کئیفیتلره اؤمرونون سونونادک صادق قالیب. تصادفی دئییل کی، ش.آخوندووانین اثرلری میللی موسیقی و پروفسیونال بسته‌کارلیق عنعنه‌لرینی اؤزونده بیرلشدیریب. او، ۱۹۷۲-جی ایلده یازدیغی «گلین قایاسی» اوپئراسی ایله شرق‌ده ایلک اوپئرا یازان قادین بسته‌کار کیمی تاریخه دوشوب. «گلین قایاسی» اوپراسیندا کلاسیک موسیقی ایله موغامین قوووشماسی اوزئییر حاجیبی‌لی اوصلوبونون ساخلانماسینی بیر داها تصدیق ائدیب. اوپئرادا آرییالارلا یاناشی، موغام پارچالارینین دا سسله‌نمه‌سی بسته‌کارین خالق موسیقی‌سینی مکمل بیلمه‌سیندن ایر‌لی گلیب و اثره اوغور قازاندیریب.

بسته‌کارین موسیقی یازدیغی شعیرلر آذربایجان پویزییاسینین ان گؤزل نمونه‌لری‌دیر. او، سلیمان روستم، نبی خزری، بختیار واهابزاده، نریمان حسن‌زاده و دیگر شاعرلرین اثرلرینه ماهنیلار بسته‌له‌ییب.

شفیقه خانیم چوخ قیسا مدت عائله‌لی اولوب. بو ائولیلیکدن اونون جمعی بیر اؤولادی دوغولوب. او، بیر ده هئچ واخت عائله قورماییب، عمرونون سونونا قدر تک یاشاییب. شفیقه خانیم مشهور «لای-لای» ماهنی‌سینی ایسه اوغلونا بسته‌له‌ییب. بوتون اومیدلرینی باغلادیغی تالح حاجییئو گنج یاشلاریندا روحی خسته‌لییه توتولوب. اوغلو تالئه حاجییئو چوخ بؤیوک ایستعدادا مالیک اولسا دا، آناسی قدر تانینمیردی. ایندی ده چوخ آز اینسان تالحین یارادیجیلیغی ایله تانیشدیر. اما اونون ۱۸-۲۰ یاشلارین‌دا بسته‌لدیی "بئله غملی دایانما" آدلی ماهنی‌سی چوخ بؤیوک مشهورلوق قازانیب. اینسانلارین اکثریتی تالح حاجییئوی داها چوخ پیانوچو کیمی تانیییبلار. تالح اوزون ایللر بو خسته‌لیکله مباریزه آپارسا دا، ۲۰۰۸-جی ایلین ایول آیینین ۲۶-دا ماشتاغادا یئرلشن روحی عصب خسته‌خاناسیندا وفات ائدیر.

اوغلونون اؤلومو شفیقه خانیم‌دان اوزون مدت گیزلدیلیر. یالنیز قیرخ مراسیمی باشا چاتاندان سونرا شفیقه خانیم اوغلو تالحین وفات ائتدیینی اؤیرنیر. تالح حاجییئوین ان اوغورلو ایشلریندن بیری ایسه آناسی شفیقه آخوندووانین «حسرتیندن» ماهنی‌سینین پیانو ایفاسی‌دیر.
شفیقه آخوندووانین اثرلری شوکت علکبرووا، گولاغا مممدوو، فاتما مهرعلیئوا، آناتوللو قنیئو، روبابه مرادووا، زینب خانلارووا، المیرا رحیمووا، زاور رضایئو، سکینه ایسماییلووا، گولیاز و گولیاناق مممدووا باجیلاری، ائلدار علکبروو، تورکییه‌ده ابراهیم تاتلیسس و بیر چوخ ایستعدادلی ایفاچیلار طرفین‌دن سئویله-سئویله اوخونوب، بو گون ده ایفا ائدیلیر.

شفیقه آخوندووا ۲۰۱۳-جو ایلین ایول آیینین ۲۶-دا، اوغلو تالئه‌دن بئش ایل سونرا اونون وفات ائتدیی گون‌ده دونیاسینی دییشیر. خالق آرتیستی ۲-جی فخری خیاباندا دفن اولونوب.

گؤرکملی بسته‌کارین وفاتین‌دان ۱۰ ایل اؤتمه‌سینه باخمایاراق، اونون یاراتدیغی بنزرسیز صنعت نمونه‌لری هر زامان گونده‌مده‌دیر.
سؤزلری عادیل بابایئوه، موسیقی‌سی شفیقه آخوندووایا عایید اولان «حسرتیندن ماهنی‌سینی تالح حاجییئوین ایفاسیندا تقدیم ائدیریک: