تانینمیش گونئی‌لی شاعر محمد چالغین ایران حاکمیتینه اعتراض ائتدیی اوچون حبس تهلوکه‌سی ایله اوزلشن و فارس رژیمینه قارشی چیخان ایستعدادلی ادبیات نماینده‌لریندن بیریدیر .

Kult.az خبر وئریر کی، محمد چالغین ۱۹۷۷-جی ایل مارتین ۲۱-ده تبریزده آنادان اولوب.

حاکمیتین قانون‌سوز عمللرینه قارشی ادبیاتدا مباریزه آپاریب، شعرلر یازان شاعرین ادبی نمونه‌لری تورکدیللی اؤلکه‌لرده منتظم اولاراق درج اولونور. لاکین کیتابلاری ایران‌دا درج اولونمور. شعرلری خاریجی رادیو و دیگر ادبیات پلاتفورمالاریندا سسلندیریلیر، درج ائدیلیر. ایران ظلمونه اعتراض ائد‌ن دیگر ادبیات‌چیلار کیمی حاکمیت طرفین‌دن کناردا ساخلانیلیر.

محمد چالغینین «ایستانبول» شعرینی سیزه تقدیم ائدیریک:

ایستانبول

گؤزلرین ندن قیزارمیش ایستانبول

یئنه باشینین اوستونده‌کی بولودلاری کیم قربان کسمیش؟

من دنیزدن قاچمیش بیر ساحلم

کولکلرینه سؤیلرسن تاکسیم میدانینا بو گون اسمه‌سین

منیم ملتم آدیندا خانیملا بیر گؤروشوم وار

گؤزلرین تبریزدیر

مقبره‌سینده شاعرلر سیغیشمیشلار

آیاقلارین آلماتیدیر

خزردن اوزانیب پکینه دوغرو

و اللرین قاراباغدیر

قاراباغی یامان قورتاردین کیم کارداشییانلاردان ایستانبول

فوتوگرافین خیالیمدان عطیر کیمی اوچور

گالاتا کؤرپوسوندن اؤزومو آچدیم

قاچ!

بیر جوت قول سنه دیرناق آراسی آچیلیب

ووراجاقسانسا وور، یوباتما

منی اؤلدوره‌جکسه‌ن، اؤزون اؤلدور منی ساتما

بو آلورچیلرین طرزی‌سی عقلی چکمیر، ایستانبول

منیم سلاحلا نه ایشیم وار؟

من چیچکلری سئویرم، ایستانبول

منیم قفسله نه ایشیم وار؟

من آزادلیغی سئویرم، ایستانبول

منیم مئچیدله نه ایشیم وار؟

من اوشاقلاری سئویرم، ایستانبول

اوشاقلاری-آزادلیغی-چیچکلری

اورتاکؤی میدانینا توپلایین بو آخشام چاغی

برابر رقص ائدجییک

و گؤسترجییک حیاتین نه قدر گؤزل اولدوغونو

ایستانبول کیمی

مهندیس دئییلم، ایستانبول

سنه بیر یول چکیم

سن اؤزون یولسان

ماسون دئییلم، ایستانبول

سنه بیر قول چکیم

سن اؤزون قولسان

تنهالیغیم‌دان کؤلگه‌منه‌ن دانیشیرام آخشام اوستلری

منه بیر یول چک

منه بیر قول چک

قورتاریم بو فارس فاشیستلرین ایستیثماریندان

سن کیمسن، ایستانبول؟

آغیرسان داغ کیمی

یونگولسه‌ن یارپاق کیمی

سوچلارین اؤزوندن بؤیوکدور

معصوم‌سان اوشاق کیمی

بو شعریم‌دن دیشاری چیخ، لطفاً

دیشاری چیخ جیبلریمدن

پالتومدان

چانتامدان

قلمیم‌دن دیشاری چیخ لطفاً

نه گؤزلرینین اؤیرنجیسییه‌م

نه ده سسینین معزونو

سن منه وحی اولوبسان، ایستانبول

بیر آخشام اوستو

ایللر بویو اورییمده اوتوردون

-کیرایه وئرمه‌دن

ایللر بویو گؤزلریمه سوخولدون

-منی گؤرمه‌دن

گؤزلرینه سؤیلرسه‌ن منی ایمتاحانا چکمه‌سینلر

-تحصیلی چوخدان بوراخمیشام

گؤر دلی‌لیییمی هارا چاتدیریبدیر گؤزلرین

مجنون منه تمکین‌لی اول سؤیلییر

و بو قدر دئدی-قودودان دولایی

تکرار سنی سئویرم، ایستانبول

بو سنین سوچون دئییل

منی آشیق یاراتمیشلار

گؤزیاشلاریم ماوی‌‎لشیب

گؤیلره باخیب آغلاماق‌دان

گؤزیاشلاریم آلتینلاشیب

اولدوزلارا باخیب آغلاماق‌دان

بوراخین!

گنراللار دؤیوشلره گئتسینلر

مجنونلار داغلارا

و سیزلر...

سیزلر اونیورستتلره دوغرو

منه بیر آز کلیمه وئرین

بیر آز شعر

من ایستانبولا دوغرو گئتمک ایستییرم

ایستانبولا دوغرو

مین دؤرد یوز اللی اوچونجو ایلین ماییس آیینین ایگیرمی دوققوزوندا

محمت فاتح سنی اوردوسویلا فتح ائتدی

و بئش یوز آلتمیش سککیز ایل سونرا

یعنی..

ایکی مین ایگیرمی بیرینجی ایلین اکیم آیینین اوچونجو گونو

محمت چالغین سنی شعرله فتح ائتدی

بو ایکی ظفری سیرغا کیمی قولاقلاریندان آس

و اونوتما کی ...

سنی یالنیز محمتلر فتح ائده بیلیر، ایستانبول.