»دیلی بیزیم» آرتیق اوچ ایله یاخیندیر کی، باکی بین‌الخالق قیسا فیلملر فستیوالیندا بؤیوک ماراقلا قارشیلانان پروگرامدیر. مقصدیمیز مختلف اؤلکه‌لرده یاشایان هم‌یئرلیلریمیزین آذربایجان دیلینده چکدیکلری فیلملری نمایش ائتدیرمکدیر.

بو سؤزلری Kult.az-آ باکی بین‌الخالق قیسا فیلملر فستیوالینین دیرکتورو فهروز شامییو پروگرام حاقیندا دانیشارکن دئییب.

او، بئله بیر پروگرامین یارانماسینین بیر چوخ سببلری اولدوغونو دقته چاتدیریب:

«اساس نتیجه فستیوالیمیزا هر ایل گونئی آذربایجانلی کینماتوگرافچیلارین آنا دیلینده چکدیکلری فیلملرینی گؤندرمه‌سی اولدو. چوخ ماراقلی و رغبت اویاندیران بیر آخین ایدی. فستیوالین قایدالارینا گؤره، بوتون مسابقه بؤلمه‌لرینده یاریشماق حقوقو قازانان فیلملر سئچیم کمیسسیاسینین قیمتلندیرمه‌سیندن کئچمه‌لیدیر. بو، چتین و گرگین بیر مبارزه‌دیر. دوشوندوک کی، آنا دیلینده فیلملر چکن رژیسسورلارین دا اؤز پلاتفورماسی اولسون. بو سببدن «دیلی بیزیم» بؤلمه‌سی یاراندی. پروگرامین یارادیلماسیندا گونئی‌لی رژیسسور رضا سیامینین امیینی خصوصی قید ائتمه‌لییم».

او، گونئی‌لی رژیسسورلارین چکدیکلری فیلمه تاماشاچیلارین خصوصی ماراق گؤستردیینی بیلدیریب:

«دیلی بیزیم»ده نمایش اولونان فیلملر تاماشاچیلار طرفیندن بؤیوک ماراقلا قارشیلانیر. چونکی گونئی‌لی همکارلاریمیزین آذربایجان دیلینده بو قدر چوخ فیلم چکمه‌سیندن آز آدامین خبری وار. اؤتن ایل «دیلی بیزیم» پروگرامینین مودراتورو رژیسسور ارتوران نجفی گؤل ایدی و او، محض بونونلا باغلی تاماشاچیلارین سواللارینی هرطرفلی جوابلاندیردی. حقیقتا، ماراقلی دیسکوسییا گئرچکلشدی».

فهروز شامییئو بو ایلین پاییزیندا کئچیریلمه‌سی نظرده توتولان فستیواللا باغلی بعضی یئنی‌لیکلرین نظرده توتولدوغونو بیلدیریب:

«نویابرین ۱۰-۱۵-ی تاریخلرینده باکی بین‌الخالق قیسا فیلملر فستیوالی ۱۴-جو دفعه کئچیریلجک. بو ایل ده فستیوالدا «دیلی بیزیم» پروگرامی اولاجاق. اونون داها دا گئنیشله‌نمه‌سی اوچون بعضی پلانلاریمیز وار. فستیوالین تاسیسچی‌سی گنج کینماتوگراف‌چیلار مرکزی بونونلا باغلی ایشه باشلاییب. فیلملرین قبولو ایله باغلی آرتیق اعلانلاریمیز یاییملانیب. حاضردا فیلم قبولو مرحله‌سیندییک. آرتیق مسابقه‌یه ماراقلی اکران ایشلری گؤندرمه‌یه باشلاییبلار.

دوشونورم کی، بو فستیوال اؤتن ایللردن یئترینجه فرقلی آددیملارلا یاددا قالاجاق. لایحه‌نین رئاللاشماسی اوچون مدنیت ناظیرلیینه مراجعت ائتمیشیک. امید ائدیریک کی، ناظرلیک یئنیجه فعالیته باشلایان کینو آگنتلیی طرفیندن فستیوالین دستکلنمه‌سینی رئاللاشدیراجاق».