چاغداش آذربایجان ادبیاتین‌دا بختیار واهابزادنین دیله، دیل تاریخینه، اونون صافلیغینا، قورونماسینا حصر ائتدیی شعیرلر نینکی اوشاقلار، حتی بؤیوکلر طرفیندن سئویلمکده‌دیر.

Kult.az بیلدیریر کی، اونون «آنا دیلی» شعیری شاعرین یارادیجیلیغینین ان مونومنتال، شاه اثرلریندن بیری حساب اولونور.

شعیرده شاعر دیل اوچون دئییله‌جک ان مترقی فیکیر و ایدئیالارینی عکس ائتدیریب. دیلین خالقین حیاتین‌دا نه قدر واجیب بیر واسطه اولماسی فیکری ایله یاناشی، شعیرده دیلیمیزین هم گراماتیک، هم ده پویتیک امکانلارینین گئنیشلییندن صحبت آچیلیب. بوندان باشقا شعیرده آنا-وطن وحدتی حس اولونور.

او، اؤز اثرلرینده دیلین خالق اوچون نئجه دیرلی معنوی ثروت اولماسی فیکرینی آشیلاماق ایسته‌ییب و دیلیمیزین احاطه دایره‌سینی گئنیشلندیریب. شاعر دیلین اینسانلار آراسین‌دا تکجه اونسیت واسطه‌سی کیمی یوخ، مخصوص اولدوغو خالقین تاریخینی اؤزونده احتیوا ائد‌ن بیر واسطه کیمی قیمتلندیریب.

اورتا دورده نسیمی، فضولی، ختایی کیمی صنعتکارلار، یئنی دؤورده م. ف . آخوندزاده، م.جلیل، س .وورغون، چاغداش دؤورده ایسه بختیار واهاب‌زاده بو عنعنه‌نین گؤرکملی نماینده‌لریندندیر. شاعر آرا-سیرا قزئت و ژورناللاردا «آنا دیلیم-آنا کؤکوم!»، «تاریخ، دیل، عنعنه»، «آنا دیلی»، «دیل حاقین‌دا سورغو»، «بیر داها آنا دیلی حاقین‌دا»، «دیل و الیفبا»، «دیلیمیز-ادبیاتیمیز»، «دیل‌ده طبیعی‌لیک و گؤزللیک»، «آنا دیلی - دولت دیلی» کیمی مقاله‌لرله چیخیش ائدیب. او، بو جور مقاله‌لری ایله آذربایجان دیلینین یوکسک قیمتلندیریب، بیر شاعر کیمی ادبیات دیلیمیزی بدیعی تصویر و ایفاده واسطه‌لری ایله زنگینلشدیریب. او، بیر صنعتکار کیمی دیل و شعیر آراسیندا اولان باغلاری آشکارلاماغا چالیشیب.

بختیار واهابزادنین «آنا دیلی» شعرینی تقدیم ائدیریک:

دیل آچاندا ایلک دفعه «آنا» سؤیلییریک بیز،

«آنا دیلی» آدلانیر بیزیم ایلک درسلییمیز.

ایلک ماهنیمیز لایلانی آنامیز اؤز سودویله

ایچیریر روحوموزا بو دیلده گیله-گیله.

بو دیل بیزیم روحوموز، عشقیمیز، جانیمیزدیر،

بو دیل بیر-بیریمیزله عهدی-پیمانیمیزدیر.

بو دیل تانیتمیش بیزه بو دونیادا هر شئیی،

بو دیل اجدادیمیزین بیزه میراث وئردیی

قیمت‌لی خزینه‌دیر…اونو گؤزلریمیز تک

قورویوب، نسیللره بیز ده هدییه وئرک.

بیزیم اوجا داغلارین سون‌سوز عظمتیندن،

یاتاغینا سیغمایان چایلارین حیددتیندن،

بو تورپاقدان، بو یئردن،

ائلین باغریندان قوپان یانیقلی نغمه‌لردن

گوللرین رنگلریندن، چیچکلرین ایییندن،

میل دوزونون، مغانین سونسوز گئنیشلییندن،

آغساچلی بابالارین عقلیندن، کمالین‌دان،

دوشمن اوستونه جومان او قیراتین نالین‌دان

قوپان سس‌دن یاراندین.

سن خالقیمین آلدیغی ایلک نفس‌دن یاراندین.

آنا دیلیم، سن‌ده‌دیر خالقین عقلی، حیکمتی،

عرب اوغلو مجنونون دردی سنده دیل آچمیش.

اورکلره یول آچان فضولینین صنعتی،

ای دیلیم، قدرتینله دونیالارا یول آچمیش.

سن‌ده منیم خالقیمین قهرمان‌لیقلا دولو تاریخی واراقلانیر،

سن‌ده نئچه مین ایللیک منیم مدنیتیم،

شان- شهرتیم ساخ‌انیر.

منیم آدیم-سانیم‌سان، ناموسوم، ویجدانیم‌سان!

بو دیل تانیتمیش بیزه بو دونیادا هر شئیی،

بو دیل اجدادیمیزین بیزه قویوب گئتدیی

ان قیمت‌لی میراثدیر، اونو گؤزلریمیز تک

قورویوب، نسیللره بیز ده هدییه وئرک!

ای اؤز دوغما دیلین‌ده دانیشماغی آر بیله‌ن فاسونلو ادابازلار،

قلبینیزی اوخشامیر قوشمالار، تئللی سازلار.

بونلار قوی منیم اولسون،

آنجاق وطن چؤریی، سیزلره قنیم اولسون!