بو گون آذربایجانین تانینمیش، گؤرکملی تئاتر و کینو آکتیورو، دولت مکافاتی لاورئاتی، خالق آرتیستی ممدرضا شیخ‌زمانووون دوغوم گونودور.

Kult.az خبر وئریر کی، او، ۱۹۱۵-جی ایل آوگوستون ۴-ده گنجه‌ده آنادان اولوب.

۲ یاشیندا ایکن آتاسینی ایتیرن صنعتکار ابتدایی تحصیل آلدیغی مدتده شاگردلر آراسیندا استعدادی، تربیه‌سی، ساوادی و بیلیی ایله فرقلنیب.

۱۹۳۴-جو ایلده جعفر جابارلی آدینا گنجه دولت درام تئاترینین رژیسسورو حبیب اسمائیلووون تشببوسو ایله تئاترا دعوت ائدیلیب. ایلک دفعه ا.حمیدین «هند قیزی» تاماشاسیندا براهما آدلی کیچیک رولدا چیخیش ائدیب. بو، گله‌جک آکتیورون پشکار تئاتر صحنه‌سینه، صنعت زیروه‌سینه دوغرو آپاران یولدا آتدیغی ایلک موفقیتلی آددیمی اولوب. چالیشدیغی دؤورده «واقیف»، «فرهاد و شیرین»، «یاشار»، «ایکی قارداش» و دیگر تاماشالاردا یادداقالان اوبرازلار یارادیب. یاراتدیغی مختلف سپکیلی اوبرازلارلا داها چوخ تانینیب و سئویلیب. تئاتردا «گؤز حکیمی»نده شاهبازوو، «قیش ناغیلی»ندا پولیکسن، «فرهاد و شیرین»ده خوسروو، «واقیف»ده قاجار، «اوتللو»دا اوتللو، «آیدین»دا آیدین، «قاچاق نبی»ده قاچاق نبی کیمی بیر-بیریندن فرقلنن، پسیخولوژی، دراماتیک اوبرازلاری اؤزونه‌مخصوص شکلده یارادیب.

شیخ‌زمانوو بؤیوک اکرانا ایلک دفعه ۱۹۵۵-جی ایلده چیخیب. بونونلا دا کینو یولوندا ایلک اوغورلو چیخیشی اولوب. داها سونرا جعفر جابارلی آدینا «آذربایجان‌فیلم» دولت کینوستودییاسینین استحصال ائتدیی فیلملرین چوخوندا چکیلیب. ۱۹۶۳-جو ایلده بؤیوک صنعتکار عادل ایسگندرووون ثابت رحمانین سسناری‌سی اساسیندا قورولوش وئردیی «احمد هارادادیر» موسیقیلی کمدییا فیلمینده شیرین کیشی رولوندا چیخیش ائدیب.

۱۹۷۵-جی ایلده ممدرزا شیخ‌زمانوو داها بیر یادداقالان اوبرازینی یارادیر. رژیسسور راسیم اوجاقووون عیسی حسینووون سسناریسی اساسیندا چکدیی «توتک سسی» فیلمینده اسفندیار کیشی رولوندا چیخیش ائدیب.

قید ائدک کی، خالق آرتیستی ممدرزا شیخ‌زامانوو ۱۹۸۴-جو ایل یانوارین ۲۵-ده ۶۸ یاشیندا وفات ائدیب.