بو گون گونئی آذربایجاندا، ائله‌جه ده ایران‌دا معلم پئشه‌سینین سیموولونا چئوریلن یازیچی، معلم و انقلابچی صمد بهرنگی‌نین آنیم گونودور.

Kult.az خبر وئریر کی، او، ۱۹۳۹-جو ایل ایونون ۲۲-ده تبریز شهرینین تاریخی چرنداب محله‌سینده آنادان اولوب.

تبریزین «تربیت» مکتبینده ابتدایی تحصیلینی باشا ووردوقدان سونرا تبریز پداگوژی تکنیکومونو (دانشسرای مقدماتی پسران) بیتیریب. او، ایلک ادبی تنقیدی و ساتیریک یازیلارینی طلبه‌لیک(اؤیرنجی) ایللرینده نشر ائتدیی «خنده» (گولوش) آدلی هفته‌لیک دیوار قزئتینده یازیب.

بهرنگی توفارقان (آذرشهر) ماحالی‌نین ماماغان، گؤگان ابتدای مکتبلرینده معلم ایشله‌ییب. تبریز اونیورسیتتینین فیلولوگییا فاکولته‌سینین اینگیلیس دیلی شعبه‌سینده تحصیل آلیب (۱۹۵۶-۱۹۶۱). ۱۹۵۷-جی ایلدن اعتباراً کند مکتبلرینده درس دئییب، کیتابلارلا و چوخلو سایدا پداگوژی مقاله‌لر یازیب.

دوستو بهروز دهقانی ایله بیرلیکده آذربایجان کندلرینی گزه‌رک آذربایجان فولکلورونا عایید نمونه‌لری توپلایان بهرنگی داها سونرا احمد شاملو، فروغ فروخزاد کیمی مؤلفلرین اثرلرینی آذربایجان دیلینه چئویریب.

عینی زاماندا فارس دیلیندن دوغما دیله چئویردیی ترجمه‌لری دوری مطبوعاتدا چیخیب.

ایلک حکایه‌لری «عادت»، «بی‌نام» ۱۹۵۹-جو ایلده درج اولونوب. بوندان سونرا «اولدوز و قارغالار»، «چوغوندورساتان اوغلان»، «بالاجا قارا بالیق» کیمی بیر سیرا حکایه و ناغیللارینی یازیب (۱۹۶۷-۱۹۶۹). ماراقلا قارشی‌لانان حکایه‌لریندن اولان «بالاجا قارا بالیق» آزادلیغا حصر اولونوب.

اوشاقلار اوچون یازدیغی اثرلری داها چوخ سوسیال پروبلملری، جمعیتده‌کی حاقسیزلیقلاری قابارتدیغی اوچون شاه رژیمی طرفیندن قاداغان ائدیلیب.

ایتالییانین بولونیا شهرینده کئچیریلن اوشاق کیتابلاری مسابقه‌سینده قیزیل مدالا لاییق گؤرولن بهرنگی‌نین کیتابلاری ایتالیان، فرانسیز، اینگیلیس، تورک دیللرینده ایشیق اوزو گؤروب.

باکی‌دا «محبت ناغیلی» (۱۹۸۷) آدی ایله سئچیلمیش اثرلری کوتله‌وی تیراژلا بوراخیلیب.

اونا قدر اوشاق ادبیاتینا عایید کیتابلار یازان اولسا بئله، ایران ادبیاتچیلاری قبول ائدیرلر کی، صمد بهرنگی ایران‌دا اوشاق ادبیاتینین قوروجوسودور. همکارلاری اونو «آذربایجان کندلیلرینین جانلی دیلی»، «میللی مدنیتین اویاق وجدانی»، «خالق‌دان الهام آلان»، «سیار معلم» آدلاندیریبلار.

گونئی‌لی معلمین «محبت ناغیلی» آدی ایله سئچیلمیش اثرلری باکی‌دا ایلک دفعه ۱۹۸۷-جی ایلده کوتله‌وی تیراژلا بوراخیلیب.

قید ائدک کی، صمد بهرنگی ادبی و مدنی فعالیتلری ایله یاناشی دورون سیاسی-انقلاب‌چی شخصیتلری، او جمله‌دن علیرضا نابدل (اوختای)، بهروز دهقان، اشرف دهقان، کاظم سعادتی، مناف فلکی و باشقا تانینمیش انقلابچیلارلا یاخین مناسبتده اولوب.

اونون آدی‌چکیلن آذربایجانلی انقلابچیلار و ایرانین رژیمه مخالف تانینمیش ضیالیلاری ایله یاخین انسیتی، اؤلومونون حاکمیت مأمورلاری طرفیندن حیاتا کئچیریلدیی باره‌ده شبهه‌لری گوجلندیریب.

صمد بهرنگی ۱۹۶۸-جی ایل آوگوستون ۳۰-دا گونئی آذربایجانین خومارلی یاشاییش منطقه‌سی یاخینلیغیندا آراز چاییندا معمالی شرایط‌ده بوغولاراق دونیاسینی دییشیب.

هر ایل مترقی معلم‌لر، مدنیت خادملری و ضیالی‌لار اونون دوغوم و آنیم گونونده مزارینی زیارت ائتمک اوچون تبریزین امامیه قبرستانلیغینا توپلاشیرلار.

عنعنه‌وی اولاراق هر ایل کئچیریلن مراسیملره حکومت مأمورلاری مداخیله ائدیر، دینج مدنی تدبیرین کئچیریلمه‌سینه اجازه وئرمیرلر.

۱۳ ایول ۲۰۲۱-جی ایلده چوخ سایدا یازیچی و مدنیت خادمینین مراجعتلریندن سونرا تهران شهر شوراسی اوجقار کوچه‌لردن بیرینه صمد بهرنگینین آدینین وئریلمه‌سینه راضی‌لیق وئریب. بیر نئچه گون سونرا ایسه تهران فرماندارلیغی شهر شوراسی‌نین قرارینی لغو ائد‌ه‌رک صمد بهرنگینین آدی اولان لوحه‌نی سؤکدوروب.