ایران‌لی و ایسرایل‌لی کینماتوگرافچیلارین ایلک بیرگه ایستحصالی اولان «تاتامی» فیلمی گیزلین چکیلیب.

Kult.az خبر وئریر کی، فیلمین رژیسورلاری زهره امیر ابراهمی و قایی ناتتیو ونسییا فیلم فستیوالیندا بونو آچیقلاییبلار.

رژیسورلار فیلمی ایران‌لیلار اوچون یئترینجه الچاتان اولان گرجستاندا چکه‌رک، سیاسی مزمونلو اولدوغونو اعلان ائتمه‌ییبلر.

ایران‌لی کینماتوگرافچی گرجستان‌دا خیلی سایدا ایرانلینین اولدوغونون فرقینده اولدوغونو، اونا گؤره ده فعالیتلرینی گیزلی ساخلادیغینی بیلدیریب.

قید ائدک کی، اؤتن گون ونسییا فیلم فستیوالیندا کینولنتین نماییشی کئچیریلیب. آغ-قارا «تاتامی» فیلمی دونیا چمپیوناتینا قاتیلان ایرانلی قادین جودوچونون درامیندان بحث ائدیر. تورنیرین اورتاسیندا جودوچو لیلا و اونون مشق‌چیسی مریم اؤلکه‌لریندن خبردارلیق آلیرلار. بئله کی، لیلایا دولته خیانت دامغاسی وورولماماسی اوچون زده آلماسی گؤرونتوسو یاراتماغی و اودوزماغی تاپشیریلیر. اؤز آزادلیغی و عائله‌سینین آزادلیغی تهلوکه آلتیندا اولان لیلا سئچیم قارشی‌سیندا قالیر: مشق‌چیسی مریمین یالواردیغی کیمی ایران رژیمینه بویون ایمک و یا قیزیل اوغروندا مباریزه‌یه داوام ائتمک…

فیلم دؤرد ایل اول ایران‌لی جودوچو سعید مولایییه ۲۰۱۹-جو ایلده یاپونییانین پایتختی توکیودا کئچیریلن دونیا چمپیوناتیندا ایسرایللی جودوچو ساگی موکی ایله قارشیلاشماماق اوچون مباریزه‌ده اودوزماق امرینین وئریلدیی رئال حیات احوالاتیندان الهام‌لانیب. حکومتینه آچیق شکیلده میدان اوخویان مولایی آوروپایا قاچیب و آلمانییادا قاچقین ایستاتوسو آلیب. مولایی آذربایجانی تمثیل ائدیب. او، ساگی موکییه غالیب گلیب، مباریزه‌دن سونرا اونلار قوجاقلاشیبلار.