ایران‌دا آذربایجان دیلینده کیتاب درج ائد‌ن نشریاتلارا قارشی تضییقلرین آرتماسی اونلارین تمامیله فعالیتلرینی دایاندیرماق تهلوکه‌سی ایله اوز-اوزه قویوب.

بو باره‌ده Kult.az-آ گونئی آذربایجان‌لی نشریاتچیلار معلومات وئریبلر.

بیلدیریلیب کی، خصوصاً سون واختلار ارشاد و اسلامی تبلیغات تشکیلاتینین آذربایجان دیلینده کیتاب نشر ائد‌نلره قارشی آیری-سئچکیلیک عمللری آرتیب.

"تهران‌دا کئچیریلن سونونجو کیتاب سرگیسینده آذربایجان نشریاتلارینا دستک وئریلمه‌دی. اؤز شخصی وسایتیمیز حسابینا سرگی‌ده محدود شکیل‌ده اشتراک ائتدیک. بونا باخمایاراق، حتی سرگییه گلن ایالت رسمیلریندن بیری بئله آذربایجان کیتابلارینین سرگیلندیی بؤلمه‌یه باش چکمه‌دی. همچینین، بو باره‌ده مئدیادا قیسا بیر خبرین یاییلماسینا امکان وئریلمه‌دی. حکومته باغلی قوروملار و موسسه‌لر طرفیندن آذربایجان دیلینده بیر کیتابین بئله آلینمادیغی حال‌دا آذربایجان دیلینده نشر اولونان کیتابلارین کاغیذی ان باها قیمته وئریلیب، کیتابلارا یوکسک وئرگی تطبیق ائدیلیب. اؤلکه مدنیتینین بؤیوک بیر حیصه‌سینی تشکیل وئرمه‌سینه باخمایاراق، آذربایجان دیلی و ادبیاتینا هر زامان حؤرمتسیزلیک ائدیلیب، اؤگئی مناسیبت بسلنیلیب. دئمه‌لییه‌م کی، شرقی آذربایجان ایالتینین ارشاد و مدنیت تشکیلاتی آذربایجان دیلینده کیتاب نشر ائد‌ن ناشیرلرین سیرادان چیخاریلماسینا چالیشیر"،- آدینین چکیلمه‌سینی ایسته‌مه‌یه‌ن گونئی‌لی ناشیرلردن بیری دئییب.

۳ ایلدیر شرقی آذربایجان‌دا کتاب سرگی‌سینین کئچیریلمدیینی دئیه‌ن نشریاتچی اسلامی ارشاد تشکیلاتینین بو ساحه اوچون آیریلان ایللیک وسایتی آذربایجان دیلی و مدنیتینه قارشی اولان تبلیغات و فعالیتلره خرجلدیینی سؤیله‌ییب.

"نباتی" نشریاتینین مدیری حسین پورشریف ده آذربایجان دیلینده‌کی کیتابلارین نشرینین محدودلاشدیریلماسینین مقصدلی اولدوغونو دئییب:

"آنا دیلیمیزده نشر ائتمک ایستدییمیز کیتابلارلا باغلی ایکی اساس پروبلمیمیز وار. اونلاردان بیری مالیه آیریلماماسی، ایکینجی‌سی ایسه کیتابین نشری اوچون اجازه‌نین وئریلمه‌مه‌سی و یا اوزون سوروندورمه‌چیلیکدن سونرا اجازه وئریلمه‌سیدیر. آنا دیلیمیزده‌کی کیتابلارین نشری و اونلارا اجازه وئریلمه‌سی ایله باغلی رای وئرن اکسپرتلرین هئچ بیر ایستاندارت قایدالاری یوخدور، اؤز ایستکلری، زوقلری و عقیده‌لرینه اویغون حرکت ائدیرلر. سون واختلار آذربایجان دیلینده نشر ائدیله‌ن کیتابلارین سایینین حتی ۱۰۰ جیلددن آشاغی اولماسینا گؤره تأسف‌لنیرم. شرقی آذربایجان‌دا آنا دیلینده اولان کیتابلارین چاپ ائدیلمه‌سینه محدودیتلرین آرتماسی سببی ایله بیر سیرا ناشیرلر کیتاب چاپی اوچون فارسدیللی ایالتلره اوز توتوبلار".

حسین پورشریف بیلدیریب کی، قید اولونان مسئله‌لر، آذربایجان دیلینده‌کی کیتابلارین نشرینه محدودیتلرله باغلی علاقدار مسئوللارا دفعه‌لرله مکتوب یازیلیب، مراجعتلر ائدیلیب:

"بوتون سعیلریمیزه، مراجعتلریمیزه باخمایاراق مسئله ایله باغلی هئچ بیر آددیم آتیلماییب، بیزیمله گؤروشدن ایمتینا ائدیلیب"،- نشریاتچی ناراضی‌لیغینی بیلدیریب.

سایتیمیزا عنوان‌لانان شیکایتله باغلی شرقی آذربایجان ایالتینین مدنیت و ارشاد ایداره‌سینین مطبوعات مسئله‌لری اوزره صدر معاوینی حسن گولی‌دن آچیقلاما آلماغا چالیشساق دا، بو، ممکن اولماییب.

گولی ایشینین چوخ، واختینین آز اولدوغونو اساس گتیره‌رک، آذربایجان دیلینده‌کی کیتابلارین نشرینه محدودیتلرله باغلی سوالی جوابلاندیرماقدان ایمتینا ائدیب.

قید ائدک کی، بیر مدت اول حسن گولی ایران‌دا آذربایجان ادبی دیلینده اولان و آذربایجان رسپوبلیکاسینین دولت دیلی قایدالارینا رعایت ائدیلن کیتابلارین نشرینه اجازه وئریلمیجیینی دئییب. او، یالنیز «اصل تورک» دیلینده اولان «تبریز لهجه‌سی» ایله کیتابلارین نشرینه اجازه وئریلجیینی ادعا ائدیب. بیر سؤزله، ایران مدنیت و ارشاد ایداره‌سی آذربایجان ادبی دیلینده اولان کیتابلارین ایران‌دا معیشت و کوچه-بازار دانیشیغی سوییه‌سین‌ده ایستیفاده ائدیلن دیله اویغونلاشدیریلماسینی طلب ائدیر.