تبریزده و شرقی آذربایجان ایالتینین بیر نئچه بؤلگه‌سینده ۱۸ سنتیابر محمدحسین شهریارین آنیم گونو مناسبتیله «فارس دیلی و پوئزییاسی گونلری» آدلی سلسله تدبیرلر کئچیریله‌جک.

Kult.az خبر وئریر کی، بو باره‌ده شرقی آذربایجان ایالتینین مدنیت و اسلامی ارشاد اداره‌سینین باشچی‌سی محمد حسین بولاغی معلومات وئریب.

او، همین گونله علاقه‌دار حکومت ارگانلارینین ۱۳۹ خصوصی ادبی، بدیعی و مدنی پروگرام تشکیل ائد‌جکلرینی بیلدیریب.

«جاری ایلده بو علامتدار گون ایله علاقه‌دار بین‌الخالق کاراکتر داشییان تدبیرلر یالنیز تبریز شهرینده دئییل، تهران داخیل اولماقلا، ایرانین مختلف شهرلرینده ده کئچیریله‌جک»، - او دئییب.

قید ائدک کی، ۲۰۰۰-جی ایلده آذربایجان شاعری محمدحسین شهریارین اؤلوم تاریخینین - ۱۸ سنتیابرین - «فارس دیلی و پوئزییاسی گونو» کیمی قید ائدیلمه‌سی تکلیف اولونوب. درحال قبول ائدیله‌ن بو تکلیفه آذربایجانلی مدنیت خادملری، یئرلی آذربایجانلیلار اعتراض ائدیب، اونون لغوی ایله باغلی مراجعتلر ائتسه‌لر ده، بونا اهمیت وئریلمه‌ییب.

۲۲ ایلدیر قید اولونان گونله باغلی کئچیریله‌ن تدبیرلره آذربایجان‌لیلار اهمیت وئرمدیی اوچون حکومت دولت مأمورلارینی مجبوری جلب ائدیب، باشقا ایالتلردن قوناقلار گتیره‌رک تدبیری هر ایل گوندمده ساخلاماغا چالیشیر.

«فارس دیلی و پوئزییاسی گونو»نون ایدئیا مؤلفی علی‌اسگر شیردوستدور. ۱۹۶۲-جی ایلده تبریزده دنیایا گلن و چوخ‌سایلی وظیفه‌لرده چالیشان علی‌اسگر شیردوست اسلام انقلابی ایدئیالارینین، فارس دیلی و ادبیاتینین اورتا آسییا و قافقازدا یاییلماسی ساحه‌سینده‌کی فعالیتلرینه گؤره دفعه‌لرله حکومت طرفیندن مکافاتلاندیریلیب.

محمد فضولینین باکی‌دا کئچیریله‌ن ۵۰۰ ایللیک یوبلیینده شیردوست کئچمیش پرزیدنت حیدر علیئوه شاعرین فارسجا شعرلریندن عبارت نئچه جیلدلیک دیوانینی تقدیم ائدیب.

«محمد فضولی آذربایجان شاعریدیر و آذربایجان دیلینده اثرلر یارادیب. بس اونون اؤز آنا دیلینده یازدیغی شعرلری نیه نشر ائتمیرسینیز»، - محوم پرزیدنت حیدر علیئو ده اونا ایرادینی بیلدیرمیشدی.