آذربایجان تاریخین‌ده ایلک دیپلمات قادین کیمی هر زامان دولتی بایاندورییه‌نین باشچیلاریندان بیری اولان حسن پادشاهین آناسی سارا خاتون یادا دوشور. لاکین او دؤورده سارا خاتون کیمی دیپلوماتییا ساحه‌سین‌ده اوغورلار قازانان باهارلی دولتینین (قاراقویونلو) باشچیلارین‌دان بیری اولان جهانشاهین حیات یولداشی جانبییم خاتون باره‌سینده یازماغی اونودورلار. جانبییم خاتون دورون دیپلماتی، دولت ایشلرینده نفوذو اولان بیر خانیم اولماقلا یاناشی باهارلی ائلینین آناسی کیمی ایستاتوس داشیییردی.

قید ائدیم کی، باهارلی دولتینین باشچیسی اولان جهانشاهین اوچ خانیمی اولوب. بیری جانبییم خاتون، ایکینجی‌سی ایسه حسن علینین آناسی ایدی. اونون آدی منبع‌لرده قید ائدیلمیر. بعضی منبع‌لر جهانشاهین بونلاردان باشقا داها بیر آروادینین اولدوغونو و همین قادینین شاه علی بی بایرامینین قیزی اولدوغونو یازیرلار. چوخ حیف کی، آختاردیغیمیز قایناق و منبع‌لرده آنجاق جانبییمین آدی چکیلیر، دیگرلرینین آدی یوخدور.

مظفرالدین جهان ابن یوسیف و یا جهانشاه قارا یوسیفین اوچونجو اوغلو ایدی.

جانبییم خاتون تاغ الدین رجب ابن افریدونون قیزی ایدی. حسین کاتیب «تاریخی-ی جدید-ی یزد» آدلی کیتابین‌دا جانبییم خاتون‌دان بحث ائد‌رک «ایکی دونیانین قولو، شرافتلی جانبییم خاتون» ایفاده‌لرینه یئر وئرمیشدیر.

ایلک دیپلماتیک آددیمی عین العروس‌داکی دوشرگه‌ده عثمانلی سفیرینی قبول ائتمه‌سی اولوب، ایکینجی ایسه دیاربکیر سفری ایله قایناقلاردا قید ائدیلیب.

دیپلماتییا تاریخین‌ده یگانه و یالنیز ایکی قادین آراسیندا ایمضالانمیش ایلک و تک مقاویله سارا خاتون و جهانبییم آراسیندا دولتی بایاندورییه ایله باهارلی دولتی آراسیندا اولان مقاویله‌دیر.

جانبییم خاتونون اؤزونمخصوص مهرو وار ایدی. مهرون اوزرینده یازیردی: «اوجا الله کی، دونیانیزا حالینی وئرن‌ده فلیین قارشیسیندا اییلمه‌سینه مغرور اولما، خاتون جان».

جانبییم خاتونون اینسانلارین حقوقلارینی قورویان و اونلارا هئچ بیر چتین‌لیک وئرمک ایسته‌مه‌یه‌ن عدالت‌لی بیر اینسان اولدوغو منبع‌لرده خصوصیله قید ائدیلیر. او، عینی زامان‌دا دولتین داخیلینده معمارلیق بینالارینین تیکیلمه‌سینه مهم اؤنم وئریب. جهانشاه دؤورونه عایید گؤی مسجیدین اوزرینده‌کی کیتابه‌ده اونون جانبییم خاتون و قیزی طرفیندن تیکیلدیی باره‌ده معلومات یازیلیب. منبع‌لرده ده جانبییم خاتون گؤی مسجید و مظفریه آدی ایله تانینان کمپلکسی تیکن و قورویان شخص کیمی گؤرونور. هر نه قدر بو تیکینتیلرینین سفاریشی جهانشاه طرفیندن وئریلسه ده، وقفلرده و «ساریه السعود»ده یازیلانا گؤره، کمپلکسین آرخاسیندا دوران ایدئیا و اونون تماملانماسین‌دا سونا قدر دستک اولان شخص جانبییم خاتون ایدی. اردبیلده‌کی شیخ صوفی سارایی جهانشاه و حیات یولداشی جانبییم خاتونون امری ایله اینشا ائدیلیب.

لاکین اونون بیر دوشمنی وار ایدی، جهانشاهین دیگر خاتون‌دان اولان اوغلو حسن علی خان. محض بو دوشمن‌چی‌لیک جانبییم خاتونون اؤلومونه سبب اولدو. ۱۴۶۸-جی ایلده جوشین قالاسیندا اؤگی اوغلو حسن علی طرفیندن قتل ائدیلیب. قبری تبریزده‌کی مظفرییه مدرسه‌سینده‌دیر.