اردبیل ایالتینین خالخال شهرینین اندبیل کندی گونئی آذربایجانین ان قدیم کندلریندن بیریدیر.

Kult.az خبر وئریر کی، کند خالخال شهرینین ۳ کیلومتر شیمال-شرقینده، اردبیل شهرینین ۱۱۰ کیلومترلیینده یئرلشیر.

طبیعی گؤزللیی، زنگین بیتکی اؤرتویو، اؤزونه‌مخصوص عادت-عنعنه‌لری و هیرکانی مئشه‌لرینین بیر حصه‌سینین بورادا یئرلشمه‌سی اندبیلین اهمیتینی داها دا آرتیریب.

ِدنیز سویه‌سیندن ۱۸۵۵ متر یوکسکلیکده یئرلشن و ۲۲۰۰ هکتار اراضی‌سی اولان تاریخی کندین اهالی‌سینین هامی‌سی آذربایجان تورکلریدیر. اونلارین اساس مشغوللوغو اکینچی‌لیک، حیواندارلیق و ال ایشلری صنایع‌سیدیر.

کند قادینلارینین توخودوغو خالچا، جئجیم، کیلیم ایالتله یاناشی، ایرانین مختلف بؤلگه‌لرینده ساتیلیر.

اندبیلین قورولماسینیب ۸-۹-جو عصرلره دایاندیغی بیلدیریلیر. آنجاق بورادا مؤوجود اولان تاریخی قالیقلار و کشف ائدیله‌ن اثرلر کندده یاشاییشین داها قدیم زمانلاردان باشلادیغینی گؤستریر.

کند کیشیلرینین یئنی ایستیلده گئیینمه‌سینه باخمایاراق، اندبیللی قادینلار هله ده «شلته» آدلانان آذربایجانین عنعنه‌وی میللی گئییمینه اوستونلوک وئریرلر.

ساز کندده ان چوخ دینلنن موسیقی آلتی اولاراق قالیر. اهالینین آشیق موسیقی‌سینه افرات باغلی‌لیغینا گؤره، آذربایجانین مختلف بؤلگه‌لریندن بورایا آشیقلار گلیر. اونلار بوتون مراسملرده، تویلاردا و بایرام گونلرینده اشتراک ائدیرلر.

اندبیلین ان گؤرمه‌لی یئرلری اندبیل چایی حوزه‌سی، میر ادیل بولاغی، کفو قالاسی و کفو آتشکده‌سی، هیرکانی مئشه‌لری و سایردیر.

اندبیل آذربایجانین تانینمیش پداگوگو، یازی‌چی و ادبیات‌شوناسی، آذربایجان رسپوبلیکاسینین بیرینجی ویستئ-پرزیدنتی مهریبان علیئوانین باباسی میر جلال پاشایئوین دوغولدوغو کنددیر.