بو گون داهی بسته‌‍کار، آذربایجان موسیقی تاریخینده ایلک رومانسلارین مؤلفی آصف زیناللینین آنیم گونودور.

Kult.az خاتیرلادیر کی، او، ۱۹۰۹-جو ایلده دربندده دوغولوب.

یئددی یاشین‌دا اوخودوغو دربند رئالنی مکتبینین اوشاق خوروندا اوخوماغا باشلاییب، کلارنئت چالماغی اؤیرنیب. همین ایللرده دربندده‌کی نفس‌لی اورکستر یای آخشاملاریندا شهر پارکین‌دا کنسرت وئریردی. آصف ده هردن‌بیر اورکسترین ترکیبین‌ده کلارنت چالماغا دعوت ائدیلیب.

آصفین ۱۱ یاشی اولان‌دا عائله‌سی باکییا کؤچوب. او، اولجه، حربی مکتبین نزدینده‌کی نفس‌لی اورکسترده تروبا چالماغی اؤیرنیب، سونرا باکی موسیقی تکنیکومونون تروبا، ویولونچل، فورتپیانو صینیفلرینده تحصیل آلیب. «تروبا اوچون پیس»اینی ۱۴ یاشیندا تکنیکومدا اؤزو ایفا ائدیب.

آصف زینال‌لی ۱۹۲۳-۲۶-جی ایللرده باکی موسیقی تکنیکومونو، ۱۹۳۱-جی ایلده آذربایجان دولت کنسرواتورییاسینین بستکارلیق شعبه‌سینده اوزئییر حاجیبیووون صینفینی بیتیریب. ۱۹۲۹-۱۹۳۱-جی ایللرده تورک (آذربایجان) فهله تئاترین‌دا موسیقی بؤلمه‌سینین مدیری و آذربایجان پرولتار موسیقی‌چیلری بیرلیینین صدری ایشله‌ییب. توفیق قولیئو و قارا قارایئو بیر مدت اونون طلبه‌لری اولوبلار.

۲۳ ایل عمور سورمه‌سینه باخمایاراق، آصف زینال‌لی میللی موسیقی صنعتینده سیلینمز ایز قویوب. میللی رومانس، پیانو و سیمفونیک موسیقینین بانی‌سیدیر. اونون «اؤلکه‌م»، «سرحدچی»، «چادرا»، «سوال»، «سیران» رومانسلاری میللی وکال موسیقیمیزین اینجیلریدیر. پیانو اوچون «اوشاق سویتاسی» سیلسیله‌سی، «چهارگاه» پیئسی، سکریپکا و پیانو اوچون «مغامسایاغی»، ایکی فوقا، سیمفونیک اورکستر اوچون «فراقمنتلر»، تئاتر تاماشالارینا موسیقی، خالق ماهنیلاری ایشله‌مه‌لرینین مؤلفی‌دیر. آذربایجان موسیقی فولکلورونون توپلانیب نوتا کؤچورولمه‌سی و ایشله‌نمه‌سی ساحه‌سین‌ده بؤیوک ایش آپاریب. «ایبتی‌دای نوت سوادی» آدلی درسلیک ترتیب ائدیب.

او، همچینین تورک (آذربایجان) فهله تئاترین‌دا اوینانیلان جعفر جاببارلینین «سئویل»، «قاییدیش»، ۱۰-جو .نزیرلی و س.روسته‌مین «آلوو»، آ.حمیده‌ین «هیند قیزی»، کیرشونون «کولکلر شهری» اثرلرینه موسیقی بسته‌له‌ییب، «اوشاق سویتاسی» اثری ایله ایلک دفعه آذربایجان موسیقی تاریخین‌ده اوشاق موسیقی‌سی رپرتوارینین اساسینی قویوب. آصف زینال‌لی ۷۰-ا یاخین آذربایجان خالق ماهنیسینی نوتا آلیب. جعفر جبارلینین سؤزلرینه بستلدیی «اؤلکه‌م» رومانسی ان مشهور اثری حساب اولونور.

زینال‌لی آذربایجان موسیقی فولکلورو نمونه‌لرینین توپلانماسی اوچون قاراباغا سفر ائدیر و اورادا دا آغیر خسته‌لنیر. قارین یاتالاغینا توتولان بستکار معالیجه آلماق اوچون باکییا قاییدیر. او، خسته‌خانادا اولارکه‌ن اوتاغینین دیوارینا سون سیمفونییاسینی یازیر و قارداشیندان اثرینین دیواردان کاغیذا کؤچورولمه‌سینی خواهیش ائدیر. تأسف کی، اونون سون وصیعتینی هئچ کیم یئرینه یئتیرمیر…

داهی بسته‌کار آصف زینال‌لی ۲۷ اوکتیابر ۱۹۳۲-جی ایلده باکی شهرینده وفات ائدیب.

آصف زینال‌لی موسیقی‌چی کوکب سفرلیوا ایله نیشان‌لی اولوب. بسته‌کار ۱۹۳۲-جی ایلده ۲۳ یاشین‌دا وفات ائتدیکدن سونرا کوکب خانیم اوندان سونرا هئچ واخت عائله حیاتی قورماییب. باکی موسیقی کولجی و پایتختین کوچه‌لریندن بیری بسته‌کارین آدینی داشیییر.