چوخ سوسان، هانسی‌سا مسئله‌یه فکر بیلدیرمه‌یه‌ن آداملار حاقیندا «نیه آغزینا سو آلمیسان؟»، «آغزینا سو آلیب اوتوروب» کیمی افاده‌لر ایشلدیریک. معناسی سوسماق، دینمه‌مک آنلامینا گلیر. بس نه اوچون سوسان آداما بو سؤزو دئییرلر، سوسماقلا سویون نه علاقه‌سی وار؟

Kult.az «بئله یارانیب» روبریکاسیندا بو افادنین یارانما تاریخچه‌سینی تقدیم ائدیر:

اصلینده، بو سؤزون کؤکو اؤنجه قدیم تورکلره، اونلاردان دا نووروز بایرامینا کئچمیش بیر اینانجا دایانیر.

نووروز بایرامیندا اینسانلار آغیزلارینا بیر اودوم سو آلار و یول کناریندا قولاق فالینا چیخاردیلار. سوسوب اوتورار، گلیب کئچه‌ن آداملارین دیلیندن چیخان ایلک کلمه، ایلک جمله ایله نیتلرینین فال اولوب-اولمایاجاغینا ایناناردیلار. فالین چین اولماسی اوچون اساس ایش سوساراق گؤزله‌مک، هئچ کسه بو باره‌ده بیر کلمه دئمه‌مک ایدی.

بو عنعنه‌نی قادینلار بیر قدر فرقلی شکیلده ائدردیلر. کوچه‌یه، قونشویا کئچمک امکانی اولمایاندا، ائوده سفره باشیندا آغیزلارینا سو آلیب اوتوردوقدان سونرا ایلک دانیشان آدامین دئدیی کلمه‌لرله فال توتاردیلار.

بعضا ائوده‌ن، مجلس‌دن اوزون مدت سس چیخماز، کیمسه دانیشماز، آغزینا سو آلیب اوتوران آدام دا خیلی سوسمالی اولاردی. باخ بئله‌جه بو فرازئولوژی افاده ده دیلیمیزده، گونده‌لیک حیاتیمیزدا یئر آلیب.