روبرت حوسین و یاخود روبر اوسین…

اونو بوتون دنیا سئویردی.

او، پاریسده دوغولوب بؤیوسه ده، اؤزونو آذربایجانلی حساب ائدیردی.

داهی آکتیور حاقیندا بیلدیکلرینیز و بیلمدیکلرینیز...

اؤتن عصرین اوزاق ۷۰-جی ایللری.

گونلرین بیر گونو تیکینتی‌ده چالیشان بیر تانیشیم اوردان-بوردان صحبت آچاندان سونرا آستادان سوروشدو:

- سن کتاب اوخویانسان، بیر آدام دئسه‌م، تانییارسان؟

تعجبله چینیمی چکیب دئدیم:

- او باخیر همین آدامین کیملیینه...

تانیشیم ندنسه ترددله دئدی:

- من فهله بابایام... کهنه کیشیلردن ائشیتمیشه‌م کی، بیزیم بیر یئرلیمیز اولوب، علی بی حسین‌زاده...

من ال‌اوستو جواب وئردیم:

- بلی، البته، حاقیندا اوخوموشام. فیوزاتچی اولوب...

طبیعی کی، منیم بو «جوابیم» او واختکی کتابلاردا تقدیم ائدیله‌ن معلوماتلاردان قایناقلانیردی.

تانیشیم دئدی:

- دوزو، من اونون حاقیندا تزه‌لیکجه ائشیتمیشه‌م. دئییلنه گؤره، علی بی شیخ‌السلام سالیانینین نوه‌سی اولوب، تورکیه‌یه کؤچوب، اورادا اؤلوب. اؤزو ده رسام اولوب، اوغلو ایسه مشهور آکتیور روبرت حسین‌دیر، اما روسیادا داها چوخ روبر اوسین کیمی تانینیر. اصل آد-فاملیاسی رستم حسین‌زاده‌دیر...

و سونرا تانیشیم کیمینسه ائشیدجییندن احتیاط ائدیرمیش کیمی آز قالا پیچیلتی ایله علی بی حسین‌زاده ایله اوزاق قوهوملوغونون اولدوغونو دا بیلدیردی...

سونرالار بیلدیم کی، نهنگ اجتماعی-سیاسی-ادبی شخصیت و اوسته‌گل، استعدادلی رسام علی بی حسینزاده-نین اوغلو سلیم توران دا رسام‌دیر، اؤزو ده... فرانسادا یاشاییر... فرانسادا همچنین روبرت حوسسین آدلی دونیاجا مشهور بیر آکتیور دا یاشاییر. اونو دا اؤیرندیم کی، روبرت حوسینوو ایله علی بی حسینزاده-نین هئچ بیر قوهوملوق علاقه‌سی یوخ‌دور...

اوسینین اصلا کیم اولدوغونو او زمانلار آز آدام بیلیردی. هارادان بیلسینلر کی؟ چکیلدیی فیلملرله دنیانی، او جمله‌دن اس.اس.ار.ای-نی دولاشان بو آد هله اؤزلویونده هئچ نه دئمیردی. او، طبیعی کی، دنیادا فرانسیز آکتیورو کیمی تانینیردی. اوسته‌لیک ده او زمان موجود اولان سیستمین «دمیر پرده‌لری» بیر چوخ مسه‌لرین اوستونه ده «پرده» کیمی چکیلمکده ایدی. بیر ده کی، کیمین هارالی اولماسی چوخلاری اوچون او قدر ده ماراقلی دئییلدی... اما آدینی ایلک دفعه اوزاق ۷۰-لرده عادی بیر تیکینتی فهله‌سیندن ائشیتدییم روبر اوسینین (روبرت حوسین/حسین) ائله فوتو-شکلندن گؤرونوردو کی، او، ظاهری گؤرونوشو اعتباری ایله آوروپالی‌دان داها چوخ شرقلی‌دیر، آذربایجانلی‌دیر.

سونرالار بیلدیم کی، حقیقتا فرانسادا حسینوو (حسین‌زاده) سویادلی چوخ مشهور بیر آکتیور یاشاییر. سن دئمه، اصلا آذربایجانلی‌دیر. داها دوغروسو، اونون آتاسی امین‌الله حسینوو (آندرئ اوسین-حوسین) بیزیم سویداشیمیز اولوب، سمرقندده دوغولوب. گله‌جک آکتیورون آناسی یهودی‌دیر، بسارابیالی‌دیر، یعنی مولدوواداندیر. ۱۹۲۷-جی ایل تولدلو، پاریسده آنادان اولموش روبر اوسینی بوتون دنیادا، او جمله‌دن کئچمیش اس.اس.ار.ای-ده تانیدان اونون «آنژلیکا» سریاللاریندا چکیلدیی گراف ژوفری ده پیراک اوبرازی اولوب. بیر زمانلار بو سریال فیلملر دنیادا توفان قوپارمیشدی. آنن گولونون (سونرالار اونون اری سرژ گولون دا اثرین مؤلفی قسمینده ظهور ائتدی) ۱۳ جلددن عبارت ماگیک-ماجرا رمانی اساسیندا چکیلمیش بئش سریالیق فیلم‌ده باش رولون ایفاچیلاری - میشل مرسیئ و روبر اوسین قیسا بیر مدتده میلیونلارین سئویملی‌سینه چئوریلدی. اونون «صفتی‌چاپیقلی» شکلی داها چوخ مشهور ایدی.

یئری گلمیشکه‌ن، سووئتلرده بؤیوک آژیوتاژلا قارشیلانان فیلمی روس دیلینده مشهور آکتیورلار سسلندیرمیشدی. بئله کی، میشل مرسینی - آنژلیکا سانسئ ده مونتلو اوبرازینی دوبلیاژدا ناتالیا کازناچئوا، پوبر اوسیننی - گراف ژوفری ده پیراک اوبرازینی ایسه ویاچسلاو تیخونوو سسلندیرمیشدی. یاخشی یادیمدادی کی، آکتیورلارلا یاناشی، اونلاری اکراندا سسله‌ندیرنلرین آدی دا آز قالا سووئتلرده‌کی بوتون صنعت‌سئورلرین دیلینین ازبری ایدی. اما بوراسی وار کی، دنیا روبرت اوسینی کینواکتیور کیمی تانیییب سئوسه ده، او اؤزونو داها چوخ تئاتر آکتیورو حساب ائدیر.

روبر اوسین رسما اوچ دفعه عائله قوروب. او اؤزو دئییردی کی، من حیاتیمی اوچ دفعه یئنی‌دن باشلامیشام. اونون بیرینجی آروادی دنیاجا مشهور روس اصللی آکتریسا، موغه‌ننی، رسام، هیکل‌تراش مارینا ولادی اولوب. اوسینین مارینادان ایکی اوغلو وار (ایگور و پیوتر).

(م. ولادی صنعت‌سئورلره یاخشی تانیشدیر. یئری گلمیشکه‌ن، بو مشهور خانیم اوسیندن بوشاندیقدان سونرا آویاشرکت رهبری و پیلوت ژان-کلود برویئ ایله عائله قوروب. مارینانین اوچونجو اری شاعر، موغه‌ننی و آکتیور کیمی تانینمیش ولادیمیر ویسوتسکی اولوب. ولادی ویسوتسکینین ائولندیی سون قادین اولسا دا، ویسوتسکی ولادینین حیاتینداکی نوبتی کیشیلردن بیری اولدو. خانیم ولادی بوندان سونرا دا اؤز شخصی حیاتینی یاشاماقدا داوام ائتمیش، حکیم-اونکولوق لئون شوارسنبرگله یئنی‌دن عائله قورموشدور. من بونو نه اوچون یازدیم؟ زیرا روس مطبوعاتیندا حتی ایندی ده بئله بیر فکر تلقین اولونور کی، گویا مارینا ولادی هر گون ولادیمیر ویسوتسکی اوچون گؤز یاشلاری تؤکور. بو، یالاندیر).

سونراکی دؤورده اوسسین کارولینا ائلیاشئو ایله عائله قوروب. کارولینانین آتاسی آناتول ائلیاشئو باکی‌دا دوغولموش کینوپرودوسر ایدی. کارولینا ایله اولان ازدواجدان نیکولای آدلی اوغلو دنیایا گلیب.

اونون اوچونجو، رسما سونونجو آروادی آکتریسا کندیس پاتودان ژولین آدلی اوغلو آنادان اولوب.

روبر اوسینین حیاتینین ان بؤیوک سئوگیسی میشل وترین آدلی آکتریسا اولوب. ۱۹۷۵-جی ایلده روئر اؤز سئویملی‌سی میشل ایله آوتوقضایا دوشور. مطبوعاتدا بئله بیر معلومات گئدیر کی، ایکی مشهور آکتیور - اوسین و وترین هلاک اولوب. حتی روئرین بو خبری ائشیدن یاخینلاری-دوغمالاری قبریستانلیقدا قوشا (ایکی) مزار یئری قازدیریرلار. بوتون پاریس یاس ایچینده ایدی. آغیر ضربه آلمیش میشل ووترین هلاک اولدو. اما اوسینین قسمتینده هله یاشاماق پایی وارمیش؛ بئله کی، او، قضادان بیر مدت سونرا آییلدی، ساغالدی و اؤز ایشینه باشلادی. دی گل کی، بؤیوک آکتیور اؤز بؤیوک سئوگیسینه صادق قالدی. او اؤز صحبتلرینده اعتراف ائدیردی کی، اوریینین بیر پارچاسی میشل ایله بیرلیکده دفن اولونوب. روبر اوسین حیاتینین سونونا قدر «قوشا مزارا» باش چکر، میشل وترینین قبرینین اوستونه گوللر سپردی...

روبر اوسین اؤزونو آذربایجانلی حساب ائدیردی. او اؤز تاریخی وطنینی چوخ سئویردی. نه یاخشی کی، او، اؤمرونون آهیل چاغلاریندا دولتیمیزین رهبرلیی سویه‌سینده دعوتله بیر نئچه دفعه، داها دقیق دئسک، اوچ دفعه آذربایجانا گلدی. عادتا طیاره‌ده اوچماغی خوشلامایان آکتیور اؤز تاریخی وطنینه گلرکه‌ن بو «فوبیانی» اونوداردی. ماراقلی‌سی بودور کی، ۲۰۱۵-جی ایلده باکی‌دا کئچیریله‌ن بیرینجی آوروپا اویونلاریندا مشعلچیلردن بیری اولوب.

اوسین هم ده ماراقلی مموارلار مؤلفی‌دیر. اونون «کور آدام» و «قبیله‌سیز گزرگی» آدلی کتابلاری واردیر.

بؤیوک آکتیور روبر اوسین ۲۰۲۰-جی ایلده دکابر آیینین ۳۱-ده ۹۴ یاشیندا کورونا ویروسدان وفات ائتدی. یاخینلارینین دئدیینه گؤره، او، یئنی ایل شاملارینین پاریلتیلاری، ایشیقلاری آلتیندا گؤزلرینی ابدی یومدو.