گونئی آذربایجان‌دا نوروزون ان طنطنه‌لی شکیلده کئچیریلدیی بؤلگه‌لردن بیری قاراپاپاق ائلیدیر.

Kult.az قاراپاپاق ائلینین نوروزلا باغلی بیر نئچه عادت و عنعنه‌سینی تقدیم ائدیر:

قاراپاپاق ائلینین اینسانلاری دا نوروزا بؤیوک اهمیت وئریرلر و اسفند آیینی (۲۰ فورالدان ۲۰ مارتا قدر) «بایرام آیی» آدلاندیریرلار. اسفندین بیرینجی چرشنبه‌سینه «یالانچی»، ایکینجی‌سینه «دوغروچو»، اوچونجوسونه «قارا»، دؤردونجوسونه «اجر» (اؤلموش اینسانلارا عمللرینه گؤره قیمت وئریلمه‌سی ) چرشنبه‌سی دئییرلر.

ایلک چرشنبه گونو جوانلار دامین و یا تپه‌نین اوستونه چیخیب، تونقال قالاییر، گؤیه فیشنگ و گوله آتیرلار. اوچونجو چرشنبه گونو او آداملار کی، ایل عرضینده اونلارین یاخینلاری وفات ائدیب، میوه و شیرنیاتلا اؤلموشلرین قبری اوستونه گئدیب، فاتحه اوخودوقدان سونرا شیرنیاتی و میوه‌نی احتیاجی اولانلارا وئریرلر. دؤردونجو، یعنی سونونجو چرشنبه گونو اهالی تزه پالتارلار گئیینیر، فرح و شادلیق حسلری ایله تونقاللار قالاماغا باشلاییر و بیر-بیرینین گؤروشونه گئدیرلر.

سونونجو چرشنبه‌نین سحری، گونش چیخمازدان اول آرواد-اوشاق چای کنارینا گئدیب، چرشنبه سویوندان ایستیفاده ائدیر و اؤز کوزه‌سینی سو ایله دولدوروب، یئنی ایل خوشبخت‌لییی اوچون ساخلاییر.

قاشقای الینین جماعاتی دا نوروزدان اولکی گونه بؤیوک اهمیت وئریرلر. نوروز بایرامیندان بیر گون اول بعضیلری اؤز قوهوم-اقرباسینین قبری اوستونه گئدیب فاتحه اوخویورلار. سونرا وارلی، کاسیب، بؤیوک، کیچیک هامیسی گرک حماما گئتسینلر. قادینلار و اوشاقلار حکمه‌ن گرک باشلارینا و اللرینه هنا قویسونلار و تزه پالتارلار گئیینسینلر. ایلین سونونجو گئجه‌سی حؤکمن پلوو اولمالیدیر و عمومیتله، قویون، قوزو و یا هئچ اولمازسا خوروز قربان کسیلمه‌لی‌دیر».

بئله‌لیکله، بیز گؤروروک کی، قدیم‌دن ملائکه‌لرین و اؤلموش اینسانلارین روحونون یئره ائنمه‌سی گونو کیمی قید ائدیله‌ن ایلاخیر بایرامی قوزی آذربایجاندا اولدوغو کیمی گونئی آذربایجان‌دا دا داها طنطه‌نه‌لی شکیل‌ده قید ائدیلیر. اودون، آتشین یارادیلماسی ایله یئددی عنصردن عبارت اولان دونیانین یارانیشینین باشا چاتماسی و بونا گؤره ده تاریخین ایلک گونو ساییلان نوروزلا باغلی کئچیریله‌ن مراسیملر ده آرازین هر ایکی طرفینده اساساً اویغون شکیلده اجرا ائدیلیر.