آذربایجانین ناخچیوان شهرینده تونج دورونه عایید مزارلیقدا آپاریلان سون آرخیولوژی تدقیقاتلار نتیجه‌سینده سلاحلارلا بیر یئرده دفن ائدیلمیش قادینلارین قالیقلارینین اولدوغو قبیرلر آشکار ائدیلیب.

Kult.az خبر وئریر کی، بو باره‌ده «ده اوبسرور»ده درج اولونان مقاله‌ده بیلدیریلیر.

معلوماتا گؤره، اونلارین یانیندا ایتی اوخ اوجلاری، تونج خنجر و گورز اولوب.

تدقیقات مؤلفلری قید ائدیرلر کی، قادینلارین قالیقلاریندا اوزون مدت یای و اوخلاردان استیفاده‌نین آیدین علامتلری وار کی، بو دا اونلارین دؤیوشلرده فعال اشتراکینی گؤستریر.

دیرناقلارین دفورماسییاسینین گرگین آتیش مشقلری نتیجه‌سینده یاراندیغی گمان ائدیلیر. بوندان علاوه، سوموکلرده یهرده اوزون مدت اوتورماغین علامتلری گؤرونوب کی، بو آمازون قادینلارا خاص اولان آت سورمیی گؤستریر.

آرخیولوقلار بئله قناعته گلیبلر کی، بونلار ۴۰۰۰ ایل اول یاشامیش آمازون قادینلار اولا بیلر.

«بو، قدیم یونانیستانین میف و افسانه‌لرینین آرخاسیندا حقیقتین اولدوغونو گؤستریر»، - دئیه تاریخچی بتانی هیوز بیلدیریب.

یئری گلمیشکن قید ائدک کی، آمازونلارین آذربایجان‌دا یاشامالاری حاقیندا اساس معلوماتلاری ایسترابون «جغرافییا» اثرینده وئریب:

«آلبانییانین یوخاری داغلاریندا آمازونلار یاشاییر. بو یئرلرله یاخشی تانیش اولان سکپسییالی مترودور و قیپسیکارت ادعا ائدیرلر کی، آمازونلار قفقاز داغلارینین کراون آدلانان شمال اتکلرینده قارقارلارلا قونشولوقدا یاشاییرلار. آمازونلار بوتون واختلارینی اؤزلری اوچون ایستیفاده ائدیرلر، یئر شوملاییر، باغچیلیق، مال-قارا، خصوصیله، آتلارا قوللوق ائتمک کیمی مهم ایشلر گؤرورلر. آمازونلار آت بئلینده اولا و حربی تعلیمله مشغول اولورلار»، - اثرده قید اولونوب.