آنا صحیفه کولت |
بو گون آذربایجان دراماتورگو، ناثر، معارف خادیمی س. س. آخوندووون آنیم گونودور.
Kult.az بؤیوک ادیب حاقیندا ماراقلی معلوماتلاری تقدیم ائدیر:
س. س. آخوندوو ۱۸۷۵-جی ایل اوکتیابرین ۳-ده شوشا شهرینده آنادان اولوب.
۱۸۸۵-۱۸۹۴-جو ایللرده قوری معلملر سمینارییاسیندا تحصیل آلدیقدان سونرا ۳-جو درجهلی روس-تاتار مکتبینده معلم ایشلهییب.
۱۹۲۱-۱۹۳۰-جو ایللر عرضینده، کئچمیش سووئتلر اتفاقیندا باکی سووئتینین عضوو اولسا دا، عمرونون سونونا کیمی پداگوژی فعالیتله مشغول اولوب، یازیچی، ژورنالیست کیمی تانینیب.
ایلک اثری "تاماهکار" کومئدییاسی ایله تانینمیش یازیچی بو اثرینی بؤیوک دراماتورگ میرزه فتحعلی آخوندزادنین "حاجی قارا" اثرینین تأثیری ایله قلمه آلیب.
او، ۱۹۱۲-۱۹۱۴-جو ایللرده «قورخولو ناغیللار» آدی آلتیندا «احمد و ملیکه»، «عباس و زینب»، «نورالدین»، «قاراجا قیز»، «اشرف» حکایهلرینی یازیب. بو حکایهلرده والیدینلرینی ایتیرمیش اوشاقلارین آجی طالعییندن صحبت آچیلیر.
قوری معلملر سمینارییاسیندا اوخودوغو واخت اؤزونه قصد ائتمهسی بارهده ده ماراقلی فاکتلار وار.
تدقیقاتچیلارین یازدیغینا گؤره، بیر گون سولیمانین نوبتچی اولدوغو واخت پانسیوناتا کیفیتسیز چؤرک گتیریلیر. سولیمان بونا اعتراض ائدرک سمینارییانین اینسپئکتورو چئرنیایئوسکییه معلومات وئریر. چئرنیایئوسکینین امری ایله ناغد پوللا چؤرک آلینیب سمینارییانین شاگیردلرینه پایلانیر. بو ایش نوبتچی کیمی سولیمانا تاپشییلیر. سولیمان دا مکتبین خزینهسیندن گؤتوردویو پولا سمینارییانین یاخینلیغیندا یئرلشن سئخدن چؤرک آلاراق پانسیوناتا گتیریر. کیچیک بیر آنلاشیلمازلیق اوزوندن اینسپئکتور سولیمانی یالانچیلیقدا، تاماهکارلیقدا تقسیرلندیریر. (گویا سولیمان چؤریین پولونو ۱ ماناتا آلیب، اما سمینارییانین خزینهسیندن ۱ مانات ۲۰ قپیک پول گؤتوروب).
بو حادثهدن سونرا سمینارییانین معلم و شاگیردلری آراسیندا سولیمانا مناسبت دییشیر. مسئلهیه سولیمانین داییسی، سمینارییانین معلمی سفرلیبی ولیبیوو قاریشاراق چؤریین قیمتینین هر یئرده ۱ مانات ۲۰ قپیک اولدوغونو آشکارلاییر و بو ایشده سولیمانین گناهسیز اولدوغونو ثبوت ائتسه ده، پئداگوژی سووئتده اونون تعلیم-تربییه قیمتینی علادان بیرباشا کافییه ائندیریرلر. بوندان سونرا سولیماندا عصب گرگینلیگی و روح دوشکونلویو یارادیر. و بیر گون بوتون شاگیرد یولداشلاری یاتاندان سونرا او اؤزونه قصد ائدرک تاپانچادان آتش آچیر. خوشبختلیکدن گولله اونون اوریینه دیمیر...
۱۸۹۴-جو ایلده سمینارییادا تحصیلینی باشا ووران ۱۹ یاشلی سولیمانا خالق معلمی آدی وئریلیر.
آناسی دورنیسه خانیم اونون تکلیگی اوچون چوخ ناراحات ایدی. اودور کی، اوغلونو قارداشی قیزی نیگارلا ائولندیرمک ایستهییر. نیگار سولیماندان ۱۹ یاش کیچیک اولدوغو اوچون سولیمان بو ازدواجا راضیلیق وئرمیر. باکیدا ساوادلی، مسلمان بیر قیزلا ائولنیر. ساده، لاکین خوشبخت یاشایان بو جوتلویون بیر اوغلو اولور. آنا خیر-دعاسی آلمایان سولیمان خوشبخت اولا بیلمیر. کؤرپه اوغلونون و سئویملی عؤمور-گون یولداشینین قفیل اؤلومو سولیمانا حیاتدا ان آغیر ضربه اولور.
اونا ایکینجی بؤیوک ضربهنی ایسه «بؤیوک قارداشلاری» بخش ائدیر. بئله کی، ۱۹۳۷-جی ایلده بی عائلهسیندن اولدوغونا گؤره ایلک تعقیبه معروض قالان بؤیوک قارداشی روستم اولور. مادی چتینلیک و هده-قورخو ایله اوز-اوزه قالان روستم حاقسیزلیقلارا دؤزمهییب وفات ائدیر. نوبه سولیمانین عمیسی اوغلانلارینا چاتیر. نریمان، یحیی، اسد، ایلدیریم، بهادور «خالق دوشمنی» آدی ایله گئدر-گلمزین قوربانی اولور. بو حاقسیزلیقلار سولیمان ثانی آخوندوا چوخ عذاب وئریر.
اونون ۲۰-جی عصر آذربایجان اوشاق ادبیاتینین اینکیشافیندا بؤیوک خدمتلری وار. ۱۹۲۰-جی ایلدهن سونرا یازدیغی اثرلرده ده گئریلیگی و محافظهکارلیغی تنقید ائدن سولیمان ثانی آخوندوو ۱۹۳۹-جو ایل مارتین ۲۹-دا ۶۳ یاشیندا وفات ائدیب.
تاریخ
2024.03.29 / 12:17
|
مولف
اسماعیلووا سوزانا
|