بو گون خالق یازیچی‌سی قیلمان ایلکینین دوغوم گونودور.

Kult.az بو مناسبتله یازیچی حاقیندا ماراقلی فاکتلاری تقدیم ائدیر.

قیلمان عیسی‌بالا اوغلو موسی‌یئو ۱۹۱۴-جو ایل آپرلین ۲۸-ده باکینین مردکان کندینده چوخ‌اوشاقلی عائله‌ده آنادان اولوب. آلتی یاشی اولاندا آتاسی دنیاسینی دییشیب. ۱۹۳۶-جی ایلده ایندیکی پداگوژی اونیورسیتتین دیل-ادبیات فاکولته‌سینی بیتیریب. امک فعالیتینه معلم کیمی باشلاییب. داها سونرا «گنج ایشچی» قزئتینده چالیشیب و اثرلری ده بورادا چاپ اولونوب.

قیلمان ایلکین ابتدای تحصیلینی زین‌العابدین تاغییئوین مردکاندا آچدیغی باغبانچی‌لیق مکتبینده آلیب.

قیلمان ایلکین تاغییئوین مکتبینی بیتیرندن سونرا واختیله "رشدیه" مکتبی آدلاندیریلان ۱۸ نمره‌لی اورتا مکتبده تحصیلینی داوام ائتدیریب. دوز بئش ایل بئله‌جه پیادا یول گلیب. سونرالار پیادا یول گئتمیی چوخ سئویب. اوزون‌اؤمورلولویونون بیر سببینی ده هر گون پیادا یول گئتمیینده گؤرورموش.

۱۹۲۹-جو ایلده، اورتا مکتبی قورتارماغینا بیر ایل قالمیش ۱۵ یاشیندا ایکن خاچماز رایونونون احمداوبا کندینه معلم گؤندریرلر. آرادا اونا خبر گؤندرمیشدیلر کی، سنی ده اؤلدورجییک، قیزلاریمیزی مکتبه چکمیسه‌ن. قیلمان ایلکین اوراداکی درس ایلینی باشا ووراندان سونرا باکییا قاییدیر. ایللر کئچه‌ندن سونرا او کندده باشینا گلن احوالاتلاری "اؤمرون اوغلان چاغلاری" پووستینده قلمه آلیر.

اونون ان چوخ بیندیی، سئودیی شاعر میکائیل موشفیق اولوب. قیلمان ایلکین موشفیق حاقیندا دانیشاندا هر زمان کؤورلرمیش.

اینستیتوتدا ۳-جو-۴-جو کورسلارا درس دئیه‌نده. گئجه-گوندوز اوخویورموش کی، طلبه‌لرین یانیندا پرت اولماسین. اسماعیل شیخلی، بؤیوک‌آغا قاسمزاده، تلت عیوبوو، عزیز میراحمدوو، زینال جبارزاده قیلمان ایلکینین طلبه‌لری اولوب.

او، ادبی یارادیجیلیغا بیر پوبلیسیست کیمی باشلاییب، "ادبیات قزئتی"نده تنقیدی مقاله‌لری درج ائدیلیب. اما بدیعی یارادیجیلیغا ۱۹۴۳-جو ایلده - "یارالی شاهین" آدلی حکایه ایله گلیب. سونرا نجف‌بئی وزیروون اوشاقلیق و ایلک گنجلیک ایللریندن بحث ائد‌ن "حیات یوللاریندا" آدلی پووستینی چاپ ائتدیریب. اللینجی ایللرین سونلارینا قدر اونون بیر نئچه حکایه‌لر کتابی ایشیق اوزو گؤروب. اونون بیر یازیچی کیمی مشهورلوغو ایسه "شمال کولیی" و "قالادا عصیان"، «یئتیمین اؤلومو» رمانلاری ایله باشلاییب. "شمال کولیی"نده قیلمان ایلکین شورا انقلابینا قدرکی باکینی، بورادا باش وئرن حادثه‌لری تصویر ائدیر.

قیلمان ایلکین «یئرآلتی چایلار دنیزه آخیر» اثرینده بیر سیرا «مقاملار»این اولماسینا باخمایاراق اثری چاپ ائتدیریر. حتی مهدی حسین اونا دئییر کی، اثرده ائله یئرلر وار کی، اونلارا گؤره سنین باشین آغرییا بیلر. آنجاق قیلمان ایلکین هئچ ندن قورخمادان بو اثری چاپ ائتدیریر.

قیلمان ایلکین ۲۰۰۹-جو ایل نویابرین ۶-دا اورک چایشمازلیغیندان ۹۶ یاشیندا وفات ائدیب. ۲-جی فخری خیاباندا دفن اولونوب.