بو گون آذربایجانین خالق شاعری موسی یعقوبون دوغوم گونودور.

Kult.az خالق شاعری موسا یاقوب حاقیندا ماراق‌لی فاکتلاری تقدیم ائدیر:

یعقوبوو مساوات صفی‌محمد اوغلو ۱۹۳۷-جی ایل مایین ۱۰-دا اسماعیل‌لی رایونونون بوینوز کندینده آنادان اولوب. گؤیچای پداقوژی مکتبینی بیتیردیکدن سونرا تیرجان کند اورتا مکتبینده معلم، بوینوز کند ابتدای مکتبینده معلم و مدیر ایشله‌ییب. ۱۹۶۷-جی ایلده آذربایجان دولت اونیورسیتتینین فیلولوگییا فاکولته‌سینه داخیل اولوب، غیابی تحصیل آلیر.

ادبی فعالیته ۱۹۵۷-جی ایلده «آذربایجان» قزئتین‌ده چاپ اولونان «ایکی قلب، ایکی دونیا» پویماسی ایله باشلاییب. اسماعیل‌لی رایون خالق مجلیس‌ینین میلت وکیلی سئچیلیب.

او، ۲۴ مای ۲۰۱۹-جو ایلده «آذربایجان رسپوبلیکاسینین خالق شاعری» فخری آدینا لاییق گؤرولور.

ان مشهور شئیری «بو دونیانین قارا داشی گؤیرمز»دیر. هئچ بیر شاعرین شعیرینه بو شعیره یازیلدیغی قدر نظیره یازیلماییب.

موسی یعقوب هم ده طبیعت شاعری کیمی تانینیب.

مکتب واختی صابر آدلی صینیف یولداشی ایستالینه شعیر یازیبمیش. موسی یعقوب صینفین اعلاچی‌سی ایدی، اما بو شعیر یازماق مسئله‌سی اونو دوشوندوروب. «اعلاچییامسا، گرک من ده شعیر یازیم» دئییب و او گوندن شعیر یازماغا باشلاییب.

گؤیچای‌دا بیر خانیما عاشیق اولوب. اما بو سئوگیسی باش توتماییب. موسی یعقوب او سئوگیدن ایلهام‌لاناراق چوخلو شعیرلر یازیب.

دئیی‌لنه گؤره، سئودیی قادین اؤزوندن یاشجا بؤیوک اولوب. سونرادان موسی یعقوبو چوخ چتین‌لیکله ائولندیریبلر. آناسی اؤز کندلرینده‌کی بیر قیزا ائلچی دوشوب. موسی یعقوبون سونرادان حیات یولداشی اولان همین قیز گیزلیجه اونون محبت شعیرلرینی اوخویوب.

موسی یعقوب ان قالین شعیر کیتابی اولان شاعردیر. اونون کیتابلاریندان بیری مین صحیفه‌دن چوخدور.

همیشه یئییب-ایچن آدام اولوب . دئدیینه گؤره، ۱۰ یاشیندان ایچیر. آراق ایچمیینین تاریخچه‌سی ده ماراقلی‌دیر: «مالیارییا خسته‌لیینه توتولموشدوم، دهشتلی قیزدیرمام اولوردو. کیمسه آناما دئمیشدی کی، آراق ایچیرتسن دوشر. او دا آراق وئریردی منه».

اصل آدی موساواتی آتاسی جمهوریتین شرفینه قویوب. سونرا «وات»ی آتیبلار «موسی» قالیب.

دوغولوب، بویا-باشا چاتدیغی و دونیادا ان چوخ سئودیی بوینوز کندینی اونا گؤره تانیییرلار. چوخ واخت بو کنده «موسی یعقوبون کندی» دئییرلر.
موسی یعقوبون یاشی ۸۰-ی کئچ‌سه ده، اونون ساچلاری آغارمامیش، قاپقارا قالمیشدی.

عمرونون آهیل چاغیندا وئردیی مصاحیبه‌لرینین بیرینده او، حیات یولداشی اوچون داریخدیغینی، اونا شعیر حصر ائتدیینی آچیقلاییر:

«سنی پوزان کیمدی، منی یازان کیم،

ایندی آغ دونلو بیر آغ ملکسه‌ن...

دونیانین ان خوشبخت آدامی‌سان کی،

منیم اؤلمیی‌می گؤرمه‌یه‌جکسه‌ن...»

او، خیرخواه و الی آچیق بیری اولوب. فضولی رایونوندان قاچقین دوشن شاعر مطلب مصرین عائله‌سینه اؤز ائوینده اوزون مدت سیغیناجاق وئریب، اونلارا ان آغیر گونلریندن یاخیندان کمک‌لیک ائدیب.

موسی یعقوب ائینه‌ن دوستو مممد آراز کیمی پارکینسون خسته‌لیین‌دن اذیت چکیب.

او، ۷ مای ۲۰۲۱-جی ایلده، آد گونونه اوچ گون قالمیش ۸۴ یاشیندا وفات ائدیب. خالق شاعری وصیتینه اساساً دوغولدوغو بوینوز کندینده والیدینلرینین و حیات یولداشینین مزاری یانیندا تورپاغا تاپشیریلیب.