یئرسیز یئره ایشین ایچینه گیره‌ن، کیملرینسه خیر ایشلرینه مانع اولان، نفاق یارادان آداملار حاقین‌دا «قارا کشیش کیمی اورتادا بیتدی» ایفاده‌سی ایشلدیلیر. بو قارا کشیش کیم‌دیر، او نیه اورتادا بیتیر؟

Kult.az «بئله یارانیب» لایحه‌سینده ایفاده‌ده بحث ائدیله‌ن قارا کئشیش حاقین‌دا معلوماتی تقدیم ائدیر:

بو ایفاده آذرایجانین مشهور «اصلی و کرم» داستانی اساسیندا یارانیب.

داستانا گؤره، اولادلاری اولمایان زیاد خانلا، اونون وزیری قارا کشیش عهد ائدیرلر کی، اولادلارینی بیرلیکده بؤیوتسونلر، اوشاقلار اوغلان و قیز اولارسا اونلاری ائولندیرسینلر.

قارا کشیشین قیزی اولور. اوشاقلار یتکین‌لیک یاشینا چاتاندا کشیش اؤز قیزینی مسلمان اوغلانا وئرمک ایستمیر، بونا گؤره، وزیرلیکدن ال چکیب، خانلیغین اراضی‌سیندن قاچیر.

اصلی‌یه آشیق اولان کرم اونو تاپماق اوچون دیار-دیار گزیر، باشینا چوخلو مصیبتلر گلیر. نهایت ایللر سونرا اصلی‌سینی تاپیر. قارا کشیش زور گوجونه قیزی اصلینی کرمه وئرمه‌یه راضی اولور، اما توی گونو اصلینین گئییندیی لباسا جادو ائدیر. اصلی ایله کرم توی گئجه‌سی یاناراق اؤلورلر. اونلاری یاناشی دفن ائدیرلر.

ناکام عاشیقلرین مزارلارینین هر بیریندن بیر قیزیلگول فیدانی بیتیر و بیر-بیرینه سارماشماغا چالیشیر. لاکین اورتادا بیر قاراتیکان کولو بیتیر و بو چیچکلری قوووشماغا قویمور. هر نه قدر تیکانی قیریرلار، او یئنی‌دن بوی آتیب، اورتالیق‌دا دیوار کیمی دایانیرمیش.

دئیی‌لنه گؤره، همین قاراتیکان دا قارا کشیشین روحو اولوب، اورتالیق‌دا بیتیب، یئنه سئونلره مانع اولوب.

اونا گؤره، پیس آداملار حاقین‌دا «قارا کشیش کیمی اورتادا بیتیب» ایفاده‌سی ایشلدیلیر.

قید ائدک کی، آراشدیرمالارا گؤره، داستان قهرمانلارینین قبیرلرینین قدیم گنجه اراضی‌سینده اولماسی حاق‌دا صحبتلر گزیر. گؤیگؤل رایونونون «قارا کشیش یوردو» آدلانان کرم‌لی کندینده اصلی و کرمین مزارلاری دئییلن ایکی مزار وار.