بو گون آذربایجان یازیچی‌سی و دراماتورقو عبدالرحیم بی حاقوئردیئوین دوغوم گونودور.

Kult.az-این معلوماتینا گؤره، او، ۱۷ مای ۱۸۷۰-جی ایلده یلیزاوتپول قوبرنییاسینین آغبولاق کندینده (شوشا) آنادان اولوب.

عبدالرحیم بی حاقوئردیئو ابتدای تحصیلینی ۱۸۸۰-جی ایلده شوشادا یوسف بیین موقتی یای مکتبینده، سونرا شوشا رئال مکتبینده آلیب. تیفلیس رئال مکتبینی بیتیره‌ندن سونرا سانکت-پطربورگ یول مهندیسلری اونیورسیتتین‌ده تحصیلینی داوام ائتدیریب.

همین دورده اوندا ادبیاتا گوجلو میل اویانیب و «یئیرسن گاز اتینی، گؤررسن لذتینی» (۱۸۹۲) و «داغیلان اتفاق» (۱۸۹۶) اثرلرینی یازیب. «داغیلان اتفاق» اثری ۱۸۹۹-جو ایلده پطربورگدا نشر ائدیلیب.

عبدالرحیم بی حاقوئردیئو عالی تحصیل آلیب شوشایا قاییتدیقدان سونرا بورادا تاماشالار تشکیل ائدیب.

۱۹۰۲-۱۹۰۳-جو ایللرده باکی‌دا اونون رهبرلییی ایله شرق کونسرتلری وئریلیب. بورادا ایلک حکایه‌لری اولان «آتا و اوغول»، «آیین شاهیدلییی» اثرلرینی یازیب، «ایکی حکایه» آدی ایله چاپ ائتدیریب.

یازیچی ۱۹۰۵-جی ایل انقلابین‌دان سونرا روسییا دولت دوماسینا گنجه قوبرنییاسیندان نماینده سئچیلیب و بونا گؤره، پطربورگا گئدیب.

او، آذربایجانین بیرینجی دیپلماتلاریندان حساب اولونور. چالیشدیغی شهرده دولت کیتابخاناسیندا یئنی اثری اولان «آغا محمد شاه قاجار» اوچون ماتریاللار توپلاییب، ایرانا - مازانداران ویلایتینه سیاحت ائدیب.

«لیلی و مجنون» اوپراسی ۱۹۰۸-جی ایل، یانوارین ۱۲-ده تاماشایا قویولدوغو زامان ایلک آذربایجان دیریژورو کیمی خور و اورکستری، تاماشانی ایداره ائدیب.

«نجات» جمعیتینده و کور-خزر گمی‌چی‌لییی ایداره‌سینده ایشلدیی دؤورده زاقفقازییانی، داغستانی، اورتا آسییانی و ولگابویونو سیاحت ائد‌رک، «جیرانعلی»، «خورتدان»، «حکیم نون صغیر»، «لاغلاغی»، «موزالان»، «سوپورگه‌ساققال» و س. ایمضالارلا «ملا نصرالدین» ژورنالیندا حکایه، فلیتون چاپ ائتدیریب.

او، هشترخان‌دا یاشادیغی مدتده شهرین مدنی-اجتماعی حیاتیندا جدی چالیشیب. سونرا آغداما کؤچوب و اورادا یاشاییب.

ادیب شکسپیرین «حاملت»، شیللرین «قاچاقلار»، وولترین «سلطان عثمان»، زولیانین «قازماچیلار»، آندرسنین «بولبول»، «شاهین تزه لیباسی»، لانسکویون «قزوات»، چیریکووون «یهودیلر»، کورولنکونون «قوجا زنگ چالان» اثرلرینی ده ترجمه ائدیب.

«آذربایجان اس.اس.ار امکدار اینجه‌صنعت خادمی» فخری آدینا، ۱۹۳۳-جو ایلده ایسه آذربایجان مرکزی اجراییه کمیته‌سینین فخری فرمانینا لاییق گؤرولوب. اونون اثرلری اس.اس.ار.ای و خاریجی اؤلکه خالقلارینین دیللرینه ترجمه اولونوب.

کلاسیک ۱۹۳۳-جو ایل دکابرین ۱۲-ده باکی‌دا وفات ائدیب و فخری خیابان‌دا دفن اولونوب.