بو گون آشیق صنعتینین گؤرکم‌لی نماینده‌سی دده علسگرین اوغلو آشیق طالیبین آنیم گونودور.

Kult.az خبر وئریر کی، آشیق طالیب علسگر اوغلو ۱۸۷۷-جی ایلده آغکیلسه کندینده آنادان اولوب.

آشیق طالیب آشیق‌لیق صنعتینه بؤیویوب، بویا-باشا چاتدیغی ائوده، آتاسینین یانیندا ییلنیب. او، قربانی‌دن باشلایاراق، دؤوروموزه قدرکی مشهور آشیقلارین یارادیجیلیغینی، خالق داستانلارینین، دئمک اولار کی، هامیسینی حافیظه‌سینده جمعله‌ییب.

ایلین یاز-یای آیلاریندا اکینچی‌لیک ائد‌ن صنعتکار پاییز-قیش آیلاریندا خالقیمیزین تویلاریندا، ائل شنلیکلرینده سازلی-سؤزلو صحبتلری ایله شرفلی عمور یولو کئچیب.

آشیق طالیب یازی-پوزو بیلمه‌سه ده، چوخ کسکین حافظه‌سی وار ایدی. کلاسیک و معاصر آشیق صنعتینی مکمل بیله‌ن آشیق طالیب گؤیچه صنعتکارلارینین، خصوصاً آتاسی آشیق علسگرین ارثینین سینه‌دفتری کیمی آشیقلار آراسیندا بؤیوک نفوذا مالیک اولوب.

آشیق علسگر ادبی ارثینین اوزه چیخماسیندا آشیق طالیبین خدمتی عوضسیزدیر. او، آیری-آیری شعیرلرین دئییلمه سببلری باره‌ده ماراقلی خاطره‌لر سؤیله‌ییب. بو خاطره‌لر بؤیوک صنعتکار حاقیندا یازییا آلینان داستان و روایترین اساسینی تشکیل ائدیر.

یاشادیغی، عمور سوردویو محیطین تأثیری اونو اوستاد آشیق زیروه‌سینه قالدیریب:

ائشیدین سؤزومو، عاریف اولانلار،

بو دونیا فانی‌دیر، فانی دئییم من.

بئش گون دم ائیله‌یه‌ن، اون گون غم ائیلر،

بئله قوروب کرم‌کانی، دئییم من.

مغریب‌دن مشریقه توتان دونیانی،

گوندن خراج آلان اسگندر هانی؟!

نئچه داننده‌نین بوشدو میدانی،

نئچه-نئچه سلیمانی دئییم من.

من طالیبام، هرزه-هدیان بیل‌منم،

درد الین‌دن دقیقه‌سی ایل منم.

اؤلنه‌دک آغلایارام، گول‌منم،

گؤرمیینجه اول ایمانی، دئییم من.

آشیق طالیب ۱۹۷۹-جو ایلین ۲۱ مایین‌دا ۱۰۲ یاشیندا آغکیلسه کندینده وفات ائدیب.