بو ایل ۹۰ یاشی تمام اولان «عصمت» فیل‌می آذربایجان کینماتوگرافییاسی تاریخینده علامتدار اکران اثرلریندن بیریدیر. او، آذربایجان کینماتوگرافییاسی تاریخینده سونونجو سس‌سیز فیلم و کینو صنعتینین محتشم نمونه‌سی حساب ائدیلیر.

Kult.az خبر وئریر کی، فیلمین پرمیراسی ۲۵ مای ۱۹۳۴-جو ایلده باکی‌دا کئچیریلیر.

«عصمت» فیلمینین سوژئتی او دورون طلبلرینه تام جواب وئریردی. اؤتن عصرین اوتوزونجو ایللری آذربایجان‌دا سوسیال حیاتدا بؤیوک دییشیکلیکلرین باش وئردیی، قادینلارین جمعیتده‌کی رولونون یئنی‌دن درک ائدیلدیی دوردور. سس حقوقو الده ائتمک، ساده‌جه ساوادلی اولماق و خیرییه‌چی‌لیکله مشغول اولماق اونا آزلیق ائدیردی. گنج آذربایجانلی قادینلار گئتدیکجه داها دا فعاللاشیردیلار، اؤزلری اوچون یئنی ساحه‌لر کشف ائدیردیلر، اؤز حقوقلارینین مدافعه‌سینه قالخیردیلار.

محض بئله قیزلاردان بیرینین حکایه‌سی ۱۹۲۷-جی ایلده مسکوادا دولت کینماتوگرافییا تکنیکومونو بیتیرن گنج مکاعیل مکاعیلوون رژیسسورو و سسناریستی اولدوغو «عصمت» فیلمینین سوژتینین اساسینی تشکیل ائدیر. آذربایجان اس.اس.ار.ای-نین امکدار آرتیستی خاطره‌لرینده قید ائدیب کی، سسنارینین یازیلماسی زمانی علی بایراموو آدینا قادین کلوبونون عضوو سریه (سارا) خلیلووانین طالع‌ییندن الهاملانیب. او، ۱۹۳۳-جو ایلده قادینلار آراسیندا فعال ایش آپاردیغی اوچون قارداشی و آتاسی طرفیندن وحشیجه‌سینه اؤلدورولوب. گنج فعالین دفن مراسمی علی بایراموو آدینا قادین کلوبوندا کئچیریلیب و بؤیوک اجتماعی عکس-صدا دوغوروب.

«آذربایجان قادینینین اوبرازینی عمومی‌لشدیررک اونو فیلمین قهرمانینا چئویردیم، لاکن اونون اوچون پیلوت پئشه‌سینی سئچدیم» دئیه‌ن مکاعیل مکاعیلوو بو صنعتین کینو اوچون یئنی بیر ساحه اولدوغونو و آذربایجان قادینلارینین یوکسکلیکلره جان آتماسینی تجسم ائتدیردیینی قید ائدیب.

فیلمین باش قهرمانینین داها بیر پروتوتیپی آذربایجانین ایلک قادین طیاره‌چی‌سی لیلا ممدبیووا اولوب. او، مسلمان قادینلار حاقیندا فورمالاشمیش ایستروتیپی آلت-اوست ائد‌رک پیلوت اولماغا قرار وئریب و ۱۹۳۱-جی ایلده باکی‌دا، ۱۹۳۳-جو ایلده ایسه مسکوادا آویاسییا مکتبینی بیتیریب.

کؤهنلمیش قایدالارا میدان اوخویان ایکی گنج آذربایجان‌لی قادینین حکایه‌سی «عصمت»ی چوخ جسارتلی و ایناندیریجی بیر فیلمه چئویره بیلیب. بوندان علاوه، مکاعیل مکاعیلوو فیلمین اورژینال بدیعی حلینی تاپماغا موفق اولوب. فیلمین چکیلیشی زمانی ۲۷ عدد قوراشدیریلمیش صحنه دکوراسییاسیندان گئنیش استفاده ائدیلیب. فیلم ۱۹۳۴-جو ایلده نمایش اولونوب.

لنتین سوژئتینه گؤره، گنج قیز عصمت، ایشلدیی تکستیل موسسه‌سینین بیر گروپ ایشچی‌سی ایله بیرلیکده طیاره‌چیلرین قوناغی اولور. او، اوچوش بلدچیلرینین بیر نئچه قوناغی طیاره ایله گزدیرمک دعوتینه راضیلیق وئریر و اوچوش زمانی کولک اونون باشینداکی چادرانی آپاریر.

اساس پرسوناژین غیر-عادی کاراکتری خصوصیله حیله‌گر تاجر، وسواسی قایینانا، رعیت صینفینه منصوب آتا دا داخل اولماقلا، دقتله ایشلنمیش ایکینجی درجه‌لی پرسوناژلارین فونوندا اؤزونو داها آیدین بروزه وئریر.

سسنارینین هم‌موللیفی مشهور رژیسور و سسناریست گریگوری براگینسکی‌دیر. فیلمین اوزرینده آذربایجان کینماتوگرافچیلاری ممد بابایئو، حیدر وزیروو و میرزه مصطفی‌یئو چالیشیبلار. عصمت رولونو ژوکا میخلسون ایفا ائدیب. فیلمده خیری عظیم‌زاده، محسن صنعانی، الیستار ملیکوو، حقیقت رضایئوا و میرزه علی کیمی آکتیورلار دا چکیلیب.

فیلمین نماییشیندن سونرا عصمت کاراکتری نمونه‌وی اوبرازا چئوریلدی و حتی اجتماعی دقتی ۱۹۲۹-جو ایلده جعفر جابارلینین عینی‌اآدلی پیسی اساسیندا چکیله‌ن «سئویل» فیلمینده قالدیریلان قادینلارین آزاد ائدیلمه‌سی پروبلمینه یؤنلتدی. عصمتین طالعییندن الهام آلان مینلرله قادین کئچمیشین قالیقلارین‌دان قورتولاراق جمعیتین فعال عضوو اولا بیلدیلر.

فیلم اونون اساس پرسوناژینین پروتوتیپی اولان طیاره‌چی قادینین دا طالع‌یینده ماراقلی رول اویناییب. او-۲ طیاره‌سی ایله آذربایجانین ان اوجقار رایونلارینا اوچان لیلا ممدبیووا بو فیلمی تئز-تئز اؤزو ایله آپاریب، کند ساکنلری آراسیندا آویاسییا و پیلوت پئشه‌سینی تبلیغ ائدیب. محاربه ایللرینده او، جبهه اوچون اونلارلا پیلوت و پاراشوتچو حاضرلاییب و اونلار جبهه‌ده دشمنه قارشی جسارتله مبارزه‌یه آتیلیبلار.

۲۰۱۹-جو ایلده آذربایجان رسپوبلیکاسی ناظیرلر کابینتینین قراری ایله «عصمت» فیلمی آذربایجانین دولت ثروتی اعلان ائدیلمیش فیلملرین سیاهی‌سینا داخل ائدیلیب.