بریتانییانین «شورتلیست» ژورنالی واختی ایله کیتابخانا رفلریندن و ماغازالاردان مصادیره ائدیله‌رک، مطالعه‌سینه قاداغا قویولموش کیتابلارین سیاهی‌سینی ترتیب ائدیب.

Kult.az همین سیاهی‌دا اولان ولادیمیر نابوکووون «لولیتا» کیتابی حاقین‌دا معلوماتلاری تقدیم ائدیر.

ولادیمیر نابوکووا دونیا شهرتی گتیره‌ن اینگیلیس دیلینده یازدیغی «لولیتا» رومانی ۱۹۵۵-جی ایلده پاریسین «اولیمپیا پرس» نشریاتیندا چاپ اولونوب. بیر ایل سونرا کیتابین ساتیشی فرانسادا، ۱۹۵۵–۱۹۵۹-جو ایللر آراسیندا اینگیلتره‌ده، ۱۹۷۴-جو ایلده‌ن ۱۹۸۲-جی ایله قدر ایسه جنوبی آفریکادا قاداغان ائدیلیر.

اینگیلتره داخلی ایشلر ناظرلیینین گمروک اداره‌سی کیتابین اؤلکه‌یه داخیل اولان بوتون نسخه‌لرینین مصادیره ائدیلمه‌سی حاق‌دا امر وئرمیشدی. بو قاداغا همین اؤلکه‌ده ۱۹۵۹-جو ایله قدر داوام ائدیب. داها سونرا کتابین تکرار نشری بؤیوک سس-کویه سبب اولوب. «لولیتا» آرگنتینا و یئنی زلاندییادا دا بیرمعنالی قارشیلانماییب. آمریکادا ایسه کتابین نشری اوچون هئچ بیر قاداغا تطبیق ائدیلمه‌ییب.

معلوم اولدوغو کیمی رومان اورتایاش‌لی بیر کیشی ایله ۱۲ یاشلی قیز آراسینداکی یاساق سوگی مناسیبتلریندن بحث ائدیر. «تایم» ژورنالینین سیاهی‌سیندا ۱۰۰ ان یاخشی رومان آراسیندا «لولیتا» ۴-جو پیلله‌نی توتور. فرانسانین «لموند» قزئتینین معلوماتینا گؤره رومان ۱۰۰ ان اوخوناقلی کتابلار سیاهی‌سیندادیر. رومان اساسین‌دا ایکی دفعه فیلم چکیلیب (۱۹۶۲ و ۱۹۹۷-جی ایللر).

اؤنجه قالماقال و تعقیبلردن احتیاط‌لانان مؤلف اثری آنونیم امضایلا چاپ ائتدیرمیی پلانلاشدیریب. حقیقتاً ده رومان بؤیوک قالماقالا سبب اولوب، آنجاق نابوکووون کاریراسینا و شهرتینه منفی تأثیر گؤسترمه‌ییب. عکسینه، «لولیتا» مؤلفه بؤیوک قازانج گتیریب. بو اثر سایه‌سینده نابوکوو آمریکاداکی معلم‌لیک فعالیتینه سون قویاراق ایسوچره‌یه کؤچوب و اؤزونو صرف یارادیجیلیغا حصر ائدیب.