بستکار علی‌اکبر تاغییئوین میکاییل مشفیقین سؤزلرینه بستله‌دیی «سنه قوربان» ماهنی‌سی هم ماراقلی اینکیشاف یولو کئچیب، هم ده مختلیف اجنبی دیللره اویغونلاشدیریلاراق ایفا ائدیلیب. ایلک دفعه زینب خانلاراووانین رئپئرتواریندا یئر آلاراق سووئت اؤلکه‌لرینده و دونیادا تانینان ماهنی تأسف کی، بو گون داها چوخ ارمنی دیلینده تبلیغ اولونور.

Kult.az خبر وئریر کی، ۱۹۶۸-جی ایلده یازیلان ماهنی ائله همین ایلده ده زینب خانلاراووانین رئپئرتوارینا داخیل اولوب. آردینجا قاسترول سفرلرینه چیخان خالق آرتیستی تورکییه‌ده، یاخین شرقده، او جمله‌دن سورییانین حلب شهرینده وئریلن کونسرتلر زامانی بو ماهنینی ایفا ائدیب.

بیر مدت سونرا - ۱۹۷۱-جی ایلده لیوانلی آکتریسا تووراب «تیکی تیکی تاک» آدی ایله عرب دیلینده اوخویور. بون‌دان سونرا ماهنینین احاطه دایره‌سی داها دا گئنیشله‌نیر. ۱۹۷۳-جو ایلده «ارمنی سویقیریمی»ندان ساغ چیخانلارین اوغلو کیمی تانینان، لیواندا دوغولان ارمنی اصیللی مغنی آدیسس هارماندییان ماهنینی ارمنیجه اوخویور. آدیسس هارماندییان (اصل آدی آودیس هارماندییان) ۱۹۴۵-جی ایلده لیواندا دونیایا گلیب. موسیقی کاریئراسینا ۱۹۶۰-جی ایلده باشلایان هارماندییان ارمنی دیاسپوروندا قیسا مدت‌ده پاپولیارلیق قازانیب. اونون یارادیجیلیغی هم لیواندا، هم ده گلوبال ارمنی دیاسپوروندا ارمنی کیملیینین فورمالاشماسیندا خصوصی رول اویناییب. ائله بونون نتیجه‌سی‌دیر کی، لیوان وطنداشی اولان مغنی ارمنستانین چوخسایلی موکافاتلارینی آلیر.

۱۹۷۴-جو ایلده ماهنی «ماوی بونجوق» آدی ایله نجاتی دینداش، ائمئل سایین کیمی مغنی‌لرین ایفاسیندا تورک دیلین‌ده، ۱۹۷۵-جی ایلده سورییالی صنعتچی دوراید لاههام «فاطووم فاطوومه»، ۱۹۷۷-جی ایلده یونان مغنی فیلیپپوس نیکولاوو «پاره پاره پاره مه» آدی ایله یونانجا ایفا ائدیر. یونان مغنی‌نین ماهنییا ارمنیجه - «کاروون کاروون» دئیه‌رک گیریش ائتمه‌سی ده داها بیر دیقت‌چکن مقامدیر.

تأسف کی، ماهنینین اورژینال نسخه‌سینین آذربایجانجا اولدوغو بوتون منبع‌لرده وورغولانماسینا باخمایاراق، ارمنی دیاسپورونون و لوبیسی‌نین سعیلری نتیجه‌سینده موسیقی اثری بو گون «ارمنی بسته‌سی» کیمی تبلیغ اولونور. آدینی اسپانییانین اندلوس شهریندن گؤتوره‌ن «ال-آندالوس» آنسامبلی، مصرلی مغنی عمر خورشید اوریئنتال رقص کیمی ارمنی آدی ایله ، او جمله‌دن مشهور لیوانلی مغنی نانسی آژرام تلویزییا وئریلیشلرینین بیرینده ماهنینی ارمنیجه ایفا ائدیر.

تاسف‌لندیریجی داها بیر مقام ایسه هر نه قدر ماهنینین تقدیماتیندا آذربایجان موسیقی‌سینه عایید اولدوغو بیلدیریلسه ده، بعضیلری بونو «ارمنی ماهنی‌سی «کاروون کاروون»، او جمله‌دن اوشاقلار اوچون یازیلمیش ماهنیلار سلسله‌سینه عایید ائدیر.