بو گون گونش ایلی تقویمی ایله تبریزلی مدنیت خادیمی، موسیقی‌چی و شاعر حسن هرگلی‌نین (دمیرچی) آنیم گونودور.

Kult.az خبر وئریر کی، حسن هرگلی ۱۹۴۱-جی ایلده تبریزده آنادان اولوب.

او، آذربایجان تورکلری‌نین میللی کیم‌لییی، مدنیتی و آنا دیلی اوغروندا آپاردیغی مباریزه‌یه گؤره ائل آراسیندا «حسن آذربایجان» آدینی قازانیب.

حسن هرگلی گونئی آذربایجان‌دا کلاسیک و موغام موسیقی‌سی اوزره ان چالیشقان مدنیت خادیملریندن بیری اولوب.

موغام موسیقی‌سی حاقدا بیر نئچه جیلد کیتابین مؤلفی اولان حسن دمیرچی پروفسور محمدتقی زهتابی ایله بیرلیکده ۱۹۸۶-جی ایلده تبریزده «آذربایجان مدنیت اوجاغی» درنه‌یینین قوروجولاریندان اولوب.

حسن دمیرچی آذربایجان مدنیتی اوغروندا آپاردیغی فعالیتلره گؤره دفعه‌لرله حبس ائدیلیب، تضییقلره معروض قالیب.

او، "آذربایجان موغاملاری" درسلیک کیتابی، ۵ جیلدلیک "آذربایجان ماهنیلاری"، "سهندییه" اوپئراسی، "آذربایجان مارشلاری" آدلی کیتابلارین مؤلفی‌دیر.

اوزون ایللر آذربایجان مدنیتی اوغروندا فعالیت گؤسترن حسن هرگلی (دمیرچی) ۲۳ ایون ۲۰۱۸-ده تبریزده معالیجه اولوندوغو عالی‌نسب خسته‌خانادا حیاتینی ایتیریب.

او، بیر گون سونرا آذربایجانین بوتون بؤلگه‌لریندن تبریزه توپلاشان مینلرله انسانین مشایعتی ایله "وادی رحمت" قبریستانلیغیندا تورپاغا تاپیشیریلیب.