بو گون ملی قهرمان، دؤیوشچو ژورنالیست چینگیز مصطفی‌یئوین دوغوم گونودور.

Kult.az خبر وئریر کی، چینگیز مصطقی‌یئو ۱۹۶۰-جی ایل آوگوستون ۲۹-دا هشترخان ویلایتینین ولادیمیر رایونوندا حرب‌چی عائله‌سینده آنادان اولوب.

۱۹۶۴-جو ایلده عائله‌سی ایله باکی شهرینه کؤچوب. ۱۹۷۷-جی ایلده یاسامال رایونوندا ۱۶۷ سای‌لی مکتبی بیتیریب. ۱۹۷۷-جی ایلده آذربایجان طب اینستیتوتونا داخیل اولان چینگیز مصطقی‌یئو ۱۹۸۳-جو ایلده اینستیتوتو موفقیتله بیتیریر. تحصیلینی باشا ووران گنج چینگیز تعیناتلا دوه‌چی رایونون‌دا اوچ ایل حکیم ایشلییر. ۱۹۸۳-جو ایلده دونیادا ایلک دفعه اولاراق تورکجه رپ ژانرلی ماهنینی چینگیز مصطقی‌یئو سسلندیرمیشدیر. ۱۹۸۵-جی ایلده یاراتدیغی "جنگی" بیرلیین‌ده‌کی فعالیتی ایله آذربایجان گنجلرینین لیدری سَوییه‌سینه یوکسه‌لیب.

چینگیز حکیم اولسا دا، ژورنالیستیکایا بؤیوک هوسی وار ایدی. ۱۹۹۰-جی ایل ۲۰ یانوار حادثه‌لری زامانی بو فیکیر اؤزونو بیر داها گؤستردی. سووئت(شوروی) اوردوسونون باکی‌دا تؤرتدیی وحشی‌لیکلری چینگیز لئنته آلمیش‌دیر. ۱۹۹۱-جی ایلده‌ن ایسه حیاتینی ژورنالیستیکایا تام باغلادی. ارمنیستانین آذربایجانا قارشی قاراباغ تجاوزو باشلایان‌دان سونرا چینگیز ژورنالیستیکایا اوز توتدو. او، ۱۹۹۱-جی ایلدن آذربایجان دولت تلویزییاسیندا رپورتیور(گزارشگر) کیمی چالیشماغا باشلادی.

اونون رپورتاژلاری اینفورماسییا بلوکاداسیندا اولان آذربایجان حاققیندا گئرچکلیکلرین آمریکا و آوروپانین آپاریجی تله‌آگنت‌لیکلری و تلویزییالارینا یول تاپدی. دولت تلویزییاسیندا موجود اولان سنزورا(سانسور) و جدی یاساقلار چینگیز مصطقی‌یئوی گئنیش فعالیت امکانلاریندان محروم ائدیردی.

چینگیز مصطقی‌یئو آذربایجان-ارمنیستان محاربه‌سینین ۱۹۹۲-جی ایله قدر اولان دورونون اصل سالنامه‌سینی یاراتدی. اؤلکه‌نین دؤیوش گئدن بوتون بؤلگه‌لریندن اوپراتیو خبرلر، آیری-آیری عسکرلر حاق‌دا خصوصی رپورتاژلار و بوتون بونلارلا یاناشی، آذربایجاندا گئدن سیاسی پروسه‌لر باره‌ده اطرافلی اینفورماسییالار اونون مؤلف‌لییی ایله یاییلیردی. چینگیز مصطقی‌یئو آذربایجان تماشاچی‌سینا هر بیر رپورتاژی ایله تانیش اولسا دا، دونیا اونو داها چوخ خوجالی‌دا چکدیی فیلمله تانیدی. چینگیز مصطقی‌یئوین محض بو فیلمی ایله ارمنیستانین ایمیجی(چهره‌سی) بوتون دونیادا جدی سارسینتییا معروض قالدی. او دؤیوش منطقه‌لرینه یالنیز رپورتیور کیمی یوللانمیردی. او، جبهه‌ده بیر عسگر، ضابط و حتی کامان‌دان کیمی چوخ وظیفه‌نی اؤز اوزه‌رینه گؤتوروردو. لاچین‌دان چیخان عسگرلرله اونون گئری قاییتماق بره‌ده وئردیی کسکین و قیسا گؤستریشلر، بو امرلرین یئرینه یئتیریلمه‌دیی تقدیرده چینگیزین اموسیونال(احساساتلی) داورانیشی ان یئنی تلویزیا تاریخین ان دراماتیک صحیفه‌لری‌دیر. چینگیز مصطقی‌یئو بیر تِله‌ژورنالیست اولاراق جبهه‌ده یاراندیغی کیمی جبهه‌ده‌ده شهید اولدو.

۱۹۹۲-جی ایلین ایون آیینین ۱۵-ده خوجالی رایونونون ناخچیوان‌لی کندینده چکیلیش زمانی آلدیغی مرمی قَلپه‌سین‌دن(ترکش‌دن) هلاک اولان چینگیز، سونادک کامئرانی سؤندورمه‌دی. بو گون آذربایجان‌دا چینگیز مصطقی‌یئو آدینا رادیو ایستگاهی چنگیز مصطقی‌یئو آدینا فوند(بنیاد) فعالیت گؤسته‌ریر.